Haheitalai ta amo Iesu be ena hahediba taudia ese do idia badinaia karana ia herevalaia. Namona be natu maragina bamona sibodia idia laloa, idia be dagi lasi bona ladana maragi. Bena Iesu ia gwau: Egu ladanai unai bamona natuna maragina ta ia abia dae tauna ese lau ia abia dae danu.”​—Mataio 18:5.

Dina haida gunanai, aposetolo taudia be daika ia bada idia hepapahuahulaia, unai dainai reana Iesu ena hereva ese idia ia hagoadaia. Aposetolo Ioane ese ia vara gauna ta ia gwauraia: “Tau ta ai itaia, ia be emu ladanai demoni ia luludia, to ai koua toho, badina ia be ita ia bamoa lasi.”​—Luka 9:49.

Ioane ia laloa aposetolo taudia sibona be mai edia maoro gorere taudia idia hanamoa bona demoni idia lulua totona, a? Bema unai be maoro, vadaeni edena bamona unai Iuda tauna be lauma dikadia ia lulua? Ioane ia laloa unai tauna be Iesu bona ena aposetolo taudia ia bamoa lasi dainai, unai hoa karadia ia karaia be maoro lasi.

Ioane ia hoa, badina Iesu ia gwau: “Ia umui koua toho lasi, badina bema tau ta ese egu ladanai siahu karana ta ia karaia, ia ese gabeai lau do ia gwauraia dika lasi. Badina ita ia inai henia lasi tauna be iseda kahanai. Umui be Keriso murinai umui raka dainai, umui lau hamaoroa momokani, bema tau ta ese ranu ia henia umui inua totona, unai tauna be ena ahuna do ia abia.”​—Mareko 9:39-41.

Anina be, ena be unai tauna be Keriso ia bamoa lasi, to ia be Iesu ena kahanai. Unai nega ai Keristani kongrigeisen ia do noho lasi dainai, ena be unai tau be Iesu ia bamoa lasi, to unai ese ia hahedinaraia lasi ia be idia ia inai henia eiava tomadiho koikoi ia durua. Unai tauna be Iesu ena ladana ia abidadama henia, bona Iesu ena hereva ese ia hahedinaraia ia be ahuna namona do ia abia.

To bema aposetolo taudia edia hereva bona kara ese unai tauna ia hekwakwanai, unai be kerere bada. Iesu ia gwau: “Bema lau ia abidadama henia ladana maragi tauna ta be ta ese ia hahekwakwanaia, do ia namo bema unai tauna ena aiona dekenai nadi badana ta idia kwatua bona davara ena gadobada dekenai idia negea.” (Mareko 9:42) Bena Iesu ese ena hahediba taudia ia hamaoroa, bema edia imana, aena, o matana ese idia ia hahekwakwanaia, namona be idia kokia, unai amo Dirava ena Basileia lalonai idia vareai diba. Bema unai tauanina ena kahana idia kokia lasi bona Gehena (Hinoma Kourana) dekenai idia lao be dika. Reana aposetolo taudia be unai koura idia diba, ia be Ierusalema kahirakahira bona unuseniai momoru idia gabua, unai dainai idia laloparara ia be mase hanaihanai ia laulaulaia.

Iesu ma ia gwau: “Namo lasi umui ese inai ladana maragi tauna ta umui dadaraia, badina umui lau hamaoroa, edia aneru guba dekenai be  hanaihanai egu guba Tamana ena vairanai idia gini.” Iena Tamana ese unai ‘ladana maragi taudia’ be edena bamona ia laloa? Iesu ese sivarai ta ia gwauraia, tau ta be mai ena mamoe 100, to ta ia boio. Unai tauna ese ena mamoe 99 ia rakatania, bona ia lao unai boio mamoe ia tahua totona, ia davaria neganai, ia moale bada. Iesu ma ia gwau: “Egu Tamana guba dekenai ia noho be ia ura lasi inai ladana maragi tauna ta ia boio.”​—Mataio 18:10, 14.

Reana Iesu be aposetolo taudia ese daika be bada idia hepapahuahulaia karana ia laloatao, unai dainai ia gwau: “Emui mauri lalonai damena ia noho be namo, bona umui ta ta huanai maino do ia noho.” (Mareko 9:50) Damena ese aniani ena mamina ia hanamoa. Laulau dalanai, damena ese ta ena hereva ena mamina ia hanamoa, bena kamonai tauna ese ia abia dae bona maino ia noho, hepapahuahu ese unai ia havaraia lasi.​—Kolose 4:6.

Nega haida, hekwakwanai badadia do idia vara, bona Iesu ese hamaoromaoroa dalana ia gwauraia. Ia gwau: “Bema emu tadikaka be kara dika ta ia karaia, oi lao bona umui ruaosi sibona huanai iena kerere oi hahedinaraia. Bema oi ia kamonai henia, emu tadikaka be dala maorona dekenai oi hakaua lou vadaeni.” To bema ia kamonai lasi be edena bamona? Iesu ia gwau: “Taunimanima ta eiava rua oi hakaua lao, unai amo hereva hamomokania taudia rua eiava toi edia hereva amo gau ibounai do idia hamomokania.” Bema unai ese hekwakwanai ia hamaoromaoroa lasi, idia ese “kongrigeisen” do idia hadibaia, anina be elda taudia ese hahemaoro do idia karaia. Bema kara dika tauna ia kamonai lasi be edena bamona? “Namona be oi dekenai ia be abidadama lasi tauna bamona bona takisi gogoa tauna bamona ai do ia lao,” Iuda taudia be unai bamona taudia idia bamoa lasi.​—Mataio 18:15-17.

Elda taudia ese Dirava ena Hereva idia badinaia be namo. Bema idia davaria ta be ia kerere bona idia matahakani henia be namo, unai hahemaoro karana be hegeregere “guba dekenai idia kwatua vadaeni.” To bema idia davaria ia be kerere lasi, unai be “guba dekenai idia ruhaia vadaeni” danu. Unai hakaua herevadia ese Keristani kongrigeisen do ia hagoadaia. Iesu ia gwau: “Egu ladanai taunimanima rua eiava toi idia hebou neganai, lau be idia huanai lau noho.”​—Mataio 18:18-20.