Yesũ aĩ anauma kũelesya amanyĩw’a make kana maĩle kwĩthĩwa ta syana nini, me na wĩnyivyo na mate kũmantha monene. Amanyĩw’a maaĩle ‘kũthokya syana nini ĩsyĩtwanĩ ya Yesũ nũndũ meeka ũu meethĩawa maimũthokya.’—Mathayo 18:5.

Atũmwa maĩ manakananĩa ĩũlũ wa ũla mũnene katĩ woo, na kwoou nĩmamanyie kana Yesũ eekaa kũmanenga ũkany’o. Ĩndĩ yu ve ũndũ ũngĩ waĩ ũneekĩka na nĩw’o mũtũmwa Yoana wamũtavisye Yesũ. Amwĩie atĩĩ: “Nĩtwonie mũndũ ũkumasya ndaimoni aitũmĩa ĩsyĩtwa yaku, na twatata kũmũsiĩĩa, nũndũ ti ũmwe witũ.”—Luka 9:49.

Yo noĩthwa Yoana oonaa kana no atũmwa me oka maaĩlĩte kũvosya andũ kana kumya ndaimoni? Ethĩwa ũu nĩw’o vailyĩ, vatonyekie ata mũndũũme ũsu Mũyuti aumye maveva mavuku? Veonekana kana Yoana oonaa mũndũ ũsu ataĩlĩte kwĩka syama nene nũndũ ndaendanasya na Yesũ na atũmwa.

No nginya Yoana ethĩwe aseng’ie mũno yĩla Yesũ wamũsũngĩie amwĩa atĩĩ: “Mũikatate kũmũsiĩĩa, nũndũ vaiĩ mũndũ wĩka kyama kĩnene ĩsyĩtwanĩ yakwa na ĩtina wa ũu ayambĩĩa kũneena naĩ ĩũlũ wakwa. Nũndũ mũndũ o na wĩva ũla ũteũleana naitũ e ngalĩko yitũ. Na mũndũ o na wĩva ũla ũmũnengae kĩkombe kya kĩw’ũ mũnyw’e nũndũ mwĩ ma Klĩsto, nĩmũtavya w’o, ndakasya ĩtuvi yake nongi.”—Maliko 9:39-41.

Ĩvindanĩ yĩu, ndyaĩ lasima mũndũũme ũsu aendanasye na Klĩsto nĩ kana atw’ĩke nĩ mũatĩĩi wa Yesũ. Nũndũ kĩkundi kya Kĩklĩsto kĩyaĩ kĩnambĩĩw’a, mũndũũme ũsu ndaĩ atalĩlwa ĩvĩtyo aĩ nũndũ ndaendanasya na Yesũ. Na kũlea kwĩka ũu kũyoonanasya kana aĩ mũvĩnganĩsya wa Klĩsto na kana nĩwakwataa mbau ndĩni sya ũvũngũ. Vate nzika mũndũũme ũsu nĩwamũĩkĩĩaa Yesũ, na ndeto ila Yesũ watavisye Yoana syoonanasya kana mũndũ ũsu ndakalea kũkwata ĩtuvi.

Ĩndĩ meko ma atũmwa na ndeto syoo ikesa kũtuma mũndũũme ũsu alulutĩka, ũsu wĩthĩwa wĩ ũndũ mũito mũno. Na kĩu nĩkyo kyatumie Yesũ ea amanyĩw’a make atĩĩ: “Mũndũ o na wĩva ũla ũlulutĩkasya kamwe ka tũũ tũnini twĩ na mũĩkĩĩo, nĩ kavaa akoveewa ngingonĩ ĩvia ya kũthia yĩla yĩthyũũkaw’a nĩ ĩng’oi na ayĩkw’a ũkanganĩ.” (Maliko 9:42) Ĩtina wa ũu Yesũ aisye kana amanyĩw’a make maĩle kũveta vyũ kĩndũ o na kĩva kĩla kĩtonya kũtuma malulutĩka. Ndeto syake syoonanasya kana o na vatonyeka maĩ matonya kũtila ĩmutha ya vata ta kw’oko, kũũ, kana kũveta itho ethĩwa nĩyĩũtuma malulutĩka. Na kwoou nĩ kavaa mũndũ kwĩthĩwa ate na kĩndũ kya vata kwake na ailika Ũsumbĩnĩ wa Ngai kwĩ kwĩthĩwa nakyo na ayĩsa kũlika Ngienanĩ (Mwanda wa Inomu). Nĩvatonyeka atũmwa makethĩwa moonete mwanda ũsu waĩ vakuvĩ na Yelusaleme vala kĩko kyavĩvĩaw’a, na kwoou nĩmaeleiwe kana Yesũ aũwetie ta ngelekany’o ya kwonany’a wanangĩko wa tene na tene.

Yesũ nĩwanengie amanyĩw’a make ũkany’o  ũngĩ. Ameie atĩĩ: “Ĩsũvĩei mũikavũthye kamwe ka tũũ tũnini, nũndũ mavinda onthe alaĩka matw’o nĩmasiasya ũthyũ wa Asa wakwa ũla wĩ ĩtunĩ.” Mo andũ asu Yesũ weetaa “tũũ tũnini” ko me vata ata methonĩ ma Yeova? Yesũ nĩwawetie ũndũ meany’a vata yĩla waeleisye ĩũlũ wa mũndũũme wĩ na malondu 100 ĩndĩ ayasya ĩlondu yĩmwe. Aeleisye kana mũndũũme ũsu atiaa malondu 99 na aithi kũmantha ĩlondu yĩmwe yĩla yau, na ayona atanaa mũno kwĩ ũndũ ũtanaa e na ala 99. Yesũ ongeleeile kwasya atĩĩ: “Asa wakwa ũla wĩ ĩtunĩ ndendeeaw’a nĩ kwona o na kamwe ka tũũ tũnini kayaa.”—Mathayo 18:10, 14.

Noĩthwa Yesũ asũanĩaa ĩũlũ wa ũndũ amanyĩw’a make makananĩaa ĩũlũ wa ũla mũnene katĩ woo yĩla wamatavisye ndeto ii: “Ĩthĩwai na mũnyũ nthĩnĩ wenyu, na mũyĩthĩwa na mũuo katĩ wenyu.” (Maliko 9:50) Mũnyũ nĩw’o ũtumaa lĩu wĩthĩwa na mũsamo. O ta ũu, yĩla mũndũ watũmĩa ndeto nzeo na syĩ na mũnyũ, nĩ laisi ũla ũkosanĩte nake akaeka kũthata na ũu ũituma vethĩwa mũuo. Ĩndĩ yĩla andũ makosanĩte makananĩa, maũndũ mekaa kũthũkĩĩa.—Akolosai 4:6.

Mavinda kwa mavinda, maũndũ maito makeekĩkaa, ĩndĩ Yesũ nĩwawetie ũndũ twaĩle kwĩka. Aisye atĩĩ: “Ethĩwa mwana-a-asa waku nĩweeka naĩ, enda ũmũtavye naĩ ĩla wĩkĩte mwĩ o elĩ. Na akwĩthukĩĩsya wĩĩthĩwa wakwata mwana-a-asa waku.” Ethĩwa mwana-a-asa ndanatwĩthukĩĩsya, Yesũ nĩwoonanisye kĩla twaĩle kwĩka. Aisye: “Osa mũndũ ũngĩ ũmwe kana elĩ, nĩ kana kĩla ũndũ ũĩkĩĩthw’e nĩ ũkũsĩ wa ngũsĩ ilĩ kana itatũ.” Ethĩwa o na ĩtina wa kwĩka ũu maũndũ nĩmaemela, twaĩle kũneena na “kĩkundi,” na ũu nĩ kwasya twaĩle kũneena na atumĩa ma kĩkundi meke ũtwi nemo. Nao nata ethĩwa ũla ũvĩtĩtye ndekwenda kwĩthukĩĩsya? Yesũ aisye: “Eka ethĩwe kwaku ta mũndũ wa mbaĩ ingĩ na ta mumĩthya wa koti.” Aisye ũu nũndũ andũ nĩmeesĩ kana Ayuti mayeethĩawa na ngwatanĩo na andũ ma mũthemba ũsu.—Mathayo 18:15-17.

Atumĩa ma kĩkundi nĩmaĩle kũatĩĩa vyũ Ndeto ya Ngai. Ethĩwa nĩmamanya kana mũndũ nĩwĩkĩte naĩ na nĩwaĩle kũkanw’a, kĩla meũtw’a “kĩkeethĩwa kĩ kyove ĩtunĩ.” Ĩndĩ mamanya kana mũndũ ndavĩtĩtye, kĩla meũtw’a “kĩkeethĩwa kĩ kĩthasye ĩtunĩ.” Myolooto ĩsu Yesũ wanenganie yaĩ yambĩĩe kũtũmĩwa ĩtina wa kĩkundi kya Kĩklĩsto kũseũvw’a. Yesũ aisye ũũ nĩ kana onany’e kĩla kĩkĩkaa yĩla maũndũ asu maito maendeee kũneenewa: “Vala ve elĩ kana atatũ mombanĩte ĩsyĩtwanĩ yakwa, nyie nĩ vamwe namo.”—Mathayo 18:18-20.