Jesu akorũo onania mwerekera ũrĩa arũmĩrĩri ake magĩrĩire gũkorũo naguo. Mabatiĩ kwĩyona ta twana, marĩ a kĩrathi gĩa thĩ na mategwĩcarĩria igweta. Arutwo magĩrĩirũo ‘kwamũkĩra twana ta tũu nĩ ũndũ wa rĩĩtwa rĩake na njĩra ĩyo mamwamũkĩre o nake.’​—Mathayo 18:5.

Atũmwo megũkoretwo makararania igũrũ rĩgiĩ nũ mũnene, kwoguo no mone ciugo cia Jesu irĩ cia kũmarũnga. Mũtũmwo Johana rĩu akagweta ũndũ wakorũo wekĩka, akoiga: “Nĩ harĩ mũndũ tuonire akĩruta andũ ndaimono na rĩĩtwa rĩaku, na twageria kũmũkaania tondũ ndekũrũmanagĩrĩra na ithuĩ.”​—Luka 9:49.

Hihi Johana arona ta atũmwo arĩ o tu marĩ na rũtha rwa kũhonania kana kũruta ndaimono? Angĩkorũo nĩguo-rĩ, nĩ kĩĩ gĩatũma mũndũ ũcio Mũyahudi ahote kũingata maroho moru? No gũkorũo Johana arona ta mũndũ ũcio atagĩrĩirũo gũkorũo akĩruta mawĩra ma hinya tondũ ndararũmanĩrĩra na Jesu na atũmwo ake.

Ngũrani na ũguo Johana areciria, Jesu akoiga: “Mũtikagerie kũmũgiria, tondũ gũtirĩ mũndũ ũngĩringa ciama na rĩĩtwa rĩakwa ũngĩhiũha kuuga ũndũ mũru igũrũ rĩakwa. Tondũ mũndũ o wothe ũtararegana na ithuĩ arĩ hamwe na ithuĩ. Nake ũrĩa wothe ũkaamũhe gĩkombe kĩa maĩ nĩ ũndũ mũrĩ a Kristo, ngũmwĩra atĩrĩ o ma, mũndũ ũcio no mũhaka akaaheo kĩheo gĩake.”​—Mariko 9:39-41.

Kwa ihinda rĩrĩ, mũndũ ũcio ndarabatara kũrũmanĩrĩra na Kristo nĩguo akorũo mwena wa Jesu. Kĩũngano gĩa Gĩkristiano gĩtirĩ kĩrathondekwo, kwoguo mũndũ ũcio kwaga kũrũmanĩrĩra na Jesu ti kuuga atĩ nĩ araregana nake kana akanyita mbaru ndini ya maheeni. Hatarĩ nganja mũndũ ũcio arĩ na wĩtĩkio harĩ rĩĩtwa rĩa Jesu, na ciugo cia Jesu ikonania atĩ mũndũ ũcio no mũhaka akaaheo kĩheo gĩake.

O na kũrĩ ũguo, no akorũo arĩ mahĩtia manene kũngĩtuĩka mũndũ ũcio nĩ ahĩngirũo nĩ ciugo na ciĩko cia atũmwo. Jesu akoiga: “Ũrĩa wothe ũkaahĩnga ũmwe wa aya matariĩ ta twana tũnini arĩa monanĩtie wĩtĩkio, nĩ kaba ohererũo ihiga inene rĩa gĩthĩi ngingo na aikio iria thĩinĩ.” (Mariko 9:42) Jesu agacoka akoiga atĩ arũmĩrĩri ake mabatiĩ kweheria nginya kĩndũ kĩa bata ta guoko, kũgũrũ, kana riitho angĩkorũo nĩ kĩramahĩngithia. Nĩ kaba mũndũ orũo nĩ kĩndũ kĩu kĩa bata na aingĩre Ũthamaki-inĩ wa Ngai gũkĩra aikare nakĩo na arigĩrĩrie Jehanamu (Mũkuru wa Hinomu). No kũhoteke atũmwo nĩ monete mũkuru ũcio hakuhĩ na Jerusalemu harĩa gĩko gĩcinagĩrũo, kwoguo no mataũkĩrũo ũrarũgamĩrĩra kũninwo gwa tene na tene.

Jesu ningĩ akaheana mũkaana ũyũ: “Mũtikananyarare arĩa matariĩ ta twana, nĩ ũndũ ngũmwĩra atĩ araika ao nĩ monaga ũthiũ wa Awa ũrĩa ũrĩ igũrũ hĩndĩ ciothe.” Acio matariĩ ta “twana” nĩ a bata na gĩkĩro kĩrĩkũ harĩ Ithe? Jesu akaheana  ũhoro wa mũndũ ũrĩ na ng’ondu 100 no ĩmwe ĩkora. Mũndũ ũcio agatiga icio ingĩ 99 agathiĩ gũcaria ĩyo yũrĩte, na amĩona akamĩkenera mũno kũrĩ icio ingĩ 99. Jesu akongerera: “Ũguo noguo Awa ũrĩa ũrĩ igũrũ atangĩenda o na ũmwe wa aya matariĩ ta twana ore.”​—Mathayo 18:​10, 14.

Jesu hihi agĩĩciria ũhoro wa atũmwo ake gũkararania igũrũ rĩgiĩ nũ ũgaakorũo arĩ mũnene, akameera: “Gĩai na cumbĩ thĩinĩ wanyu, na mũtũũrie thayũ gatagatĩ-inĩ kanyu.” (Mariko 9:50) Cumbĩ nĩ ũtũmaga irio igĩe na cama. Cumbĩ wa mũhaano nĩ ũtũmaga ũndũ ũrĩa mũndũ aroiga wĩtĩkĩrĩke na njĩra hũthũ na kwoguo no ũteithie kũiga thayũ, ũndũ ũrĩa gũkararania gũtangĩka.​—Akolosai 4:6.

Rĩmwe na rĩmwe maũndũ maritũ no moimĩre, na Jesu nĩ ataarĩirie ũrĩa tũngĩka. Akoiga ũũ: “Mũrũ wa Ithe wanyu angĩkwĩhĩria, thiĩ ũmuonie rĩhia rĩake mũrĩ o inyuerĩ. Angĩkũigua-rĩ, nĩ mwacokanwo na mũrũ wa Ithe wanyu.” Ĩ angĩaga gũkũigua? Jesu akaheana ũtaaro ũyũ: “Thiĩ na mũndũ ũmwe kana erĩ, nĩguo kũgerera ũira wa andũ erĩ kana atatũ, maũndũ mothe mamenyeke wega.” Kũngĩrema ũguo, wagĩrĩirũo kwaria na “kĩũngano,” ũguo nĩ kuuga, athuri a kĩũngano nĩguo matuithanie cira. Ĩ angĩaga kũigua nginya kĩũngano? “Nĩ atuĩke o ta mũndũ wa ndũrĩrĩ kana mwĩtia wa mbeca cia igooti harĩ wee,” andũ arĩa Ayahudi matangĩanyitanĩire nao.​—Mathayo 18:​15-17.

Arori a kĩũngano mabatiĩ kũrũmĩrĩra Kiugo kĩa Ngai biũ. Mangĩona mũndũ nĩ ehĩtie na nĩ arabatara kũrũngwo, itua rĩao ‘rĩngĩkorũo rĩrĩ rĩohe kũrĩa igũrũ.’ No mangĩona mũndũ ndehĩtie, itua rĩao ‘rĩngĩkorũo rĩrĩ rĩohore kũrĩa igũrũ.’ Motaaro macio nĩ mangĩateithirie mũno kĩũngano gĩa Gĩkristiano gĩathondekwo. Maũndũ-inĩ ta macio maritũ, Jesu akoiga: “Harĩa andũ erĩ kana atatũ macemanĩtie hamwe nĩ ũndũ wa rĩĩtwa rĩakwa, o na niĩ nĩ ndĩkoragwo hamwe nao.”​—Mathayo 18:18-20.