Yesu wafunjishe baana banji ba bwanga byubilo byo bafwainwe kwikala nabyo. Bafwainwe kwimonanga nobe baana, bepelula babula kukeba bifulo. Baana ba bwanga bafwainwe ‘kutambula baana ba bacheche na mambo a jizhina janji,’ pa kuba byo byo ko kuba’mba batambwile ne Yesu.—Mateo 18:5.

Batumwa po po bafuminetu na kwipachika pa wajinga mukulumpe pe abo, onkao mambo, lujimuno lwa kwa Yesu lwibafikile pa muchima. Mutumwa Yoano waambile pa kikwabo kyamwekele. Waambile’mba: “Mufunjishi, twamwene muntu umo wapangilenga bandemona mu jizhina jenu, kabiji twaesekele kumukanya, mambo kechi wajinga wa mwi atweba ne.”—Luka 9:49.

Nanchi Yoano wamwenenga batumwa nobe bo bonka baji na luusa lwa kubuka bantu ne kupanga bandemona nyi? Inge kyajinga bino, mambo ka mwanamulume Muyudea o apangijilenga bapashi batama? Kyamweka Yoano walangulukilenga’mba awa muntu waubilenga mingilo ya kukumya mu jishinda jabula kufwainwa mambo kechi wajinga pa jibumba ja batumwa jalondelanga Yesu ne.

Bino Yoano wakuminye bingi pa kumvwa Yesu waamba’mba: “Kange mumukanye ne, mambo kafwako ukooba mingilo ya kukumya mu jizhina jami ukafikenatu kwamba kintu kyatama pe amiwa ne. Mambo yense ubula kwitulengulula uji ku lubaji lwetu. Kabiji yense ukemupapo mema a kutoma na mambo a kuba’mba mwi ba kwa Kilishitu, kine nemwambila namba, kechi ukabula kutambula mfweto yanji ne.”—Mako 9:39-41.

Pa kyo kya kimye awa muntu kechi wafwainwe kulondelanga Kilishitu pa kuba’mba amweshe’mba uji ku lubaji lwa kwa Yesu ne. Kipwilo kya bwina Kilishitu kyajinga kikyangye kulengwa. Onkao mambo, kubula kulondela Yesu kechi kwalumbulwilenga’mba awa mwanamulume walengulwilenga bupopweshi bwa kine, nangwa’mba watundaikilenga bupopweshi bwa bubela ne. Awa muntu kine waitabijile mu jizhina ja Yesu, kabiji byaambile Yesu bimwesha’mba ukatambula mfweto yanji.

Pano kyakonsheshe kwikala byepi umvwe awa muntu wituntwile na mambo a byambo ne byubilo bya batumwa? Yesu waambile’mba: “Yense utuntwisha umo wa mu bano baana ba bacheche baji na lwitabilo, kyamufwainwa kumukashila mu nshingo jibwe ja kupelelako jizhokolosha mbongolo ne kumutaya najo mu kalunga ka mema.” (Mako 9:42) Kepo Yesu aambile’mba baana banji ba bwanga bafwainwe kwela kintu kyonse kyakonsheshe kwibatuntwisha mu bwikalo bwabo nabiji kuboko, kulu nangwa jiso. Kyawama kubula kwikala na bino bintu ne kutwela mu Bufumu bwa Lesa kukila kwibilama ne kutayiwa mu Ngehena (kimpachiko kya Hinomu). Batumwa bafwainwa bekimwene kino kimpachiko kyajinga kwipi na Yelusalema ko basokelanga biswaswa, onkao mambo, bayukile kuba’mba ino mpunzha ibena kwimenako lonaiko lwa myaka.

Kabiji Yesu wibajimwine amba: “Mwafwainwa kumona’mba kechi mwalengulula bano bantu baji nobe baana ba bacheche ne, mambo kine nemubuula namba, bamalaika babo ba mwiulu kimye kyonse bamona kilungi kya Batata ba mwiulu.” Kepo aambile’mba  “bantu baji nobe baana babacheche” banema bingi kwi Bashanji. Yesu waambile pa muntu wajinga na mikooko 100, bino paelekele umo. Uno muntu washile mikooko 99 ne kuya na kukeba mukooko waelekele, byo amutaaine wasekejile bingi kukila pa yoya 99. Yesu wanungilepo’mba: “Ne Batata ba mwiulu kechi bakeba nangwa umotu wa mu bano bantu baji nobe baana ba bacheche konaika ne.”—Mateo 18:10, 14.

Yesu kampe byo alangulukilenga pa bipachikilenga batumwa banji pa wafwainwa kwikala mukulumpe, wibakambizhe’mba: “Ikalai na mukele mukachi kenu ne kwikala mu mutende anwe bene na bene.” (Mako 9:50) Mukele ye ulengela kajo kuwama. Onkao mambo, mukele wa kifwanyikizho ulengela kuswa byaamba muntu. Kwikala na mukele wa uno mutundu kukwasha kulamawizha mutende, pano kwipachika kechi kuleta mutende ne.—Kolose 4:6.

Bimye bimo pakonsha kubuuka makatazho, bino Yesu waambile bya kwiapwisha. Waambile’mba: “Umvwe mulongo wobe wakulenga mambo, yanga ukamubuule mambo o akulenga. Umvwe wakumvwa, ko kuba’mba wabwezha mulongo wobe mu jishinda jawama.” Pano umvwe wakana kukumvwa, kyafwainwa kwikala byepi? Yesu waambile’mba: “Wafwainwa kusendapo muntu umo nangwa babiji, kuba’mba na byambo bya bakamonyi babiji nangwa basatu mambo alumbuluke.” Umvwe wabula kwibomvwa, buula “kipwilo,” ko kuba’mba bakulumpe bakonsha kufuukulapo bulongo. Pano kyakonsha kwikala byepi inge ndengamambo wabula kumvwina kipwilo? “Ekale kwi obewa nobe wa mu bisaka bikwabo nangwa nobe musonkeshi,” bantu babulanga kupwanañana na Bayudea.—Mateo 18:15-17.

Bakalama bafwainwa kulondela bulongo mikambizho iji mu Mambo a Lesa. Onkao mambo, umvwe bataana muntu amba wazhatwa kabiji wafwainwa kukambulwa, ko kuba’mba bunchibamambo ‘bebukasa kala mwiulu.’ Kabiji umvwe bataana kuba’mba muntu mambo ufwao, ko kuba’mba ‘bamukasulula kala mwiulu.’ Ino mikambizho ikwasha bingi kipwilo kya bena Kilishitu inge kyalengwa. Pa kuchiba mambo Yesu waambile’mba: “Ponse paji babiji nangwa basatu bapwila mu jizhina jami, ne amiwa nji nabo.”—Mateo 18:18-20.