Jesu kihona hasazo talusa ka za moya obaswanela kuba ni ona balutiwa bahae. Baswanela kuikunga sina banana, ili kuikokobeza ni kusabata litulo. Balutiwa baswanela ‘kuamuhela banana bao kabakala libizo lahae; habaeza cwalo baamuhela Jesu.’—Mateu 18:5.

Baapositola kihona basazo kananisana kuli yomutuna mwahalaa bona ki mañi, ka mukwa ocwalo, bakona kuunga manzwi a Jesu sina kelezo. Cwale muapositola Joani ubulela nto yeñwi yesazo ezahala, uli: “Luboni mutu yomuñwi yaleleka madimona ka kuitusisa libizo lahao, mi selulika kumuhanisa, kakuli haayo ni luna baba kulatelela.”—Luka 9:49.

Kana Joani uunga kuli baapositola ki bona feela babaswanela kufolisa batu ni kuleleka madimona? Haiba ki cwalo, kutaha cwañi kuli muuna wa Mujuda yo akone kuleleka mioya yemaswe? Mwendi Joani uikutwa kuli muuna yo haswaneli kueza limakazo kakuli hazamai ni Jesu ni baapositola.

Joani ukomokiswa ki manzwi a Jesu aali: “Musike mwalika kumuhanisa, kakuli hakuna mutu yakaeza musebezi omaata ka libizo laka yakaakufela kubulela sesimaswe ka zaka. Kakuli mutu kaufela yasa lulwanisi u kwa lineku laluna. Mi mutu kaufela yamifa komoki ya mezi a kunwa kabakala kuli muba Kreste, kaniti namibulelela nili, haana kulatehelwa ki mupuzo wahae.”—Mareka 9:39-41.

Ka nako ye, muuna yo hatokwi kulatelela Kreste kuli abe kwaneku la Jesu. Puteho ya Sikreste ituha itomiwa, ka mukwa ocwalo, bakeñisa kuli muuna yo hazamai ni Jesu fo hakutalusi kuli ki mulwanisi kamba kuli uyemela bulapeli bwa buhata. Kaniti, muuna yo unani tumelo mwa libizo la Jesu, mi zabulela Jesu libonisa kuli muuna yo hana kulatehelwa ki mupuzo wahae.

Kwaneku leliñwi, neikaba mafosisa amatuna muuna yo hanaaka sitataliswa ki manzwi kamba likezo za baapositola. Jesu uli: “Mutu kaufela yasitatalisa alimuñwi ku babanyinyani babanani tumelo ba, nekukaba hande ku yena hanaaka tamelelwa mwa mulala licwe lelituna la kubelisa lelipikuluswa ki mbongolo, ni kunepelwa mwa liwate.” (Mareka 9:42) Jesu cwale ubulelela balutiwa bahae kuli bakona kuzwisa nihaiba nto yabutokwa hahulu kubona yecwale ka lizoho, lihutu, kamba liito haiba la basitatalisa. Ki hande kusaba ni nto yelatiwa hahulu yeo ni kukena mwa Mubuso wa Mulumu kufita kuba ni yona ni kuya mwa Gehena (Musindi wa Hinomu). Baapositola mwendi baiponezi musindi wo woli bukaufi ni Jerusalema ili kokucisezwa lika, ka mukwa ocwalo, bakona kuutwisisa Gehena kuli iyemela sinyeho ya kuya kuile.

Jesu hape ubalemusa kuli: “Mubone teñi kuli hamukendi yomuñwi wa babanyinyani ba, kakuli namibulelela nili, mangeloi abona kwa lihalimu, kamita abona pata ya Ndate.” “Babanyinyani” bao, ki babutokwa cwañi ku Ndatahe Jesu? Jesu  ubulela ka za muuna yanaani lingu ze 100 mi ulatehelwa ki iliñwi. Muuna yo usiya lingu ze 99 mi ubata iliñwi yelatehile, mi haifumana ubani tabo yetuna kufita kuba ni ze 99. Jesu uekeza kuli: “Haki nto yetabisa ku Ndate ya kwa lihalimu kuli nihaiba alimuñwi ku babanyinyani bao ashwe.”—Mateu 18:10, 14.

Mwendi ka kunahana za baapositola bahae babakananisana za yakaba yomutuna mwahalaa bona, Jesu uli: “Mube ni lizwai ku mina, mi mubukeleze kozo mwahalaa mina.” (Mareka 9:50) Lizwai litahisa kuli lico litabuse. Lizwai la swanisezo litahisa kuli mutu aamuhele ka bunolo zebulelwa ni kubukeleza kozo, ili nto yesakonahali kutahiswa ki kukananisana.—Makolose 4:6.

Ka linako zeñwi, kwakona kuzuha litaba zetuna, mi Jesu ubulelela balutiwa bahae mwakutatululela litaba zeo. Jesu uli: “Haiba mwanahenu aeza sibi, uye uyo mupunyeza bufosi bwahae muli bababeli feela. Haiba akuutwa, uzibe upilisize mwanahenu.” Kono kucwañi hasateelezi? Jesu ueleza kuli: “Uye ni alimuñwi kamba bababeli, ilikuli ka bupaki bwa batu bababeli kamba babalaalu, taba kaufela ikone kutiiswa.” Haiba kueza cwalo hakufelisi butata bo, muswanela kuzibisa “puteho,” fo kikuli, baana-bahulu babaswanela, babakona kutalima taba yeo. Kono kucwañi haiba kuli muezalibi yo hape hateelezi? Jesu uli: “Abe ku wena sina mulicaba ni sina mutelisi,” ili batu babasakoni kueza siango ni Majuda.—Mateu 18:15-17.

Baokameli mwa puteho baswanela kukumalela kwa Linzwi la Mulimu. Haiba bafumana kuli muezalibi unani mulatu mi utokwa kalimelo, katulo yebaeza ‘ikabe itamilwe kale ni kwalihalimu.’ Kono haiba bafumana kuli haana mulatu, katulo yabona ‘ikabe itamuluzwi kale kwa lihalimu.’ Litaelo ze, likatusa hahulu puteho ya Sikreste haika tomiwa. Mwa litaba zetuna zeo, Jesu uli: “Fokunani bababeli kamba babalaalu babakopani kabakala libizo laka, ni na ni teñi mwahalaa bona.”—Mateu 18:18-20.