Yesu ahanjikile chakutalilaho chize chasolwele muchima vatelelele kupwa nawo vaka-kumukavangiza. Vatelelele kulimona kupwa vanyike hakupwa namuchima wakulinyisa nakuhona kufwila vihela. Tumbaji vatelelele kutambula vana vavandende ‘mwomwo yalijina lyenyi’ numbanyi vahase kumutambula naYesu nawa.—Mateu 18:5.

Kamwahichile tando yayinene kufuma haze tumbaji twenyi valipulile jipami nakusaka kutachikiza iya apwile wamulemu muWangana. Shikaho vatelelele kumona mazu ahanjikile Yesu kupwa akuvahuhumuna. Kaha nawa kaposetolo Yowano anehele chihande chikwavo chize chasolokele. Ahanjikile ngwenyi: “Twamonanga mutu umwe ali nakulovola vandemone mulijina lyove, kaha twesekanga kumukanda, mwomwo keshi nakutukavangizako.”—Luka 9:49.

Uno Yowano amwene nge vaposetolo vakiko kaha vapwile nangolo jakuka vatu nakulovola vandemone tahi? Nge mukiko chapwile, kaha mwomwo ika uze lunga wakaYuleya ahashililile kulovola vashipilitu vakuhuka? Yowano aputukile kushinganyeka nge uze lunga katelele kulinga vyuma vyakukomwesako mwomwo kapwile nakukavangiza Yesu navaposetolo jenyiko.

Yowano alikomokelele hakwivwa Yesu mwahanjika ngwenyi: “Kanda kweseka kumukandako, mwomwo kakweshi mutu mwazata mulimo wangolo mulijina lyami, kufumaho mwahanjika mazu amapi hali amiko. Mwomwo weshowo keshi nakutwimanyina nakoleko napu wetu. Weshowo mwamihana lupasa lwameya akunwa mwomwo munapu muvatu vaKulishitu, chamuchano vene nangumilweza ngwami, keshi kukatokesa fweto yenyiko.”—Mako 9:39-41.

Halwola kana kachasakiwile uze lunga kukavangiza Kulishitu numba apwenga kambaji kenyiko. Kwasalile katando kakandende vatunge chikungulwilo chavaka-Kulishitu, shikaho numba tuhu uze lunga kapwile nakukavangiza Yesuko kachasolola nge apwile muka-kole waYesu chipwe himutu uze akundwijilenga kwitava chamakuliko. Chasoloka nge uze lunga apwile nalufwelelo muli Yesu, kaha navyuma ahanjikile Yesu nawa vyasolola nge mwakatambula fweto yenyi.

Tuyokutuyoku nawa, nge uze lunga ahukanyine hamazu vahanjikile vaposetolo nahavyuma valingile, kachi chapihile chikuma. Mwomwo Yesu ambile ngwenyi: “Weshowo mwahukanyisa umwe hali ava vavandende vaze vali nalufwelelo, nachiwaha kachi nge navamukashilila lilolwa lyakuchekesa unga mushingo nge lize eji kunyengumunanga chimbulu, nakumumbila mukalungalwiji.” (Mako 9:42) Yesu alwezele vaka-kumukavangiza ngwenyi vatelelele kufumisa chipwe kuteta chuma chachilemu chize nachihukanyisa vakwavo, chakufwana nge livoko, chipwe lihinji, chipwe liso. Chachilemu kutwama chakuzeneka chuma kana nakwingila muWangana waKalunga kuhambakana kutwama nachuma kana nakukumbila muNgehena (muChinema chaHinome). Vaposetolo pamo vamwene chinema kanechi kwakamwihi naYelusalema chize vochelelelenga swali, shikaho vatachikijile mwalumbunukilile mazu aYesu kulumbununa kunonga chahaya myaka yosena.

Yesu avahuhumwine ngwenyi: “Nyingililenu nakumona  ngwenu kamweshi nakulumbilisa umwe hali ava vavandendeko, mwomwo nangumilweza ngwami vangelo javo mwilu lwola lwosena veji kumonanga kumeso aTata.” Uno “ava vavandende” vapwile ngachilihi vavalemu kumeso aIse? Ngocho, Yesu avalwezele chakutalilaho chalunga uze apwile namikoko 100, kaha hajimbalile umwe. Asezele mikoko 99 nakuya nakutondatonda uze ajimbalile, kahomu amuwanyine awahililile chikuma kuhambakana vaze 99. Yesu atwalileho ngwenyi: “NaTata uze ali mwilu, kasaka kumona umwe hali ava vavandende mwanongako.”—Mateu 18:10, 14.

Yesu atela apwile nakushinganyeka vyuma vapwile nakulipula jipami vaposetolo jenyi hakusaka kutachikiza iya apwile wamulemu, ngocho ambile ngwenyi: “Pwenunga namungwa muli enu, kaha twamenunga mukuunda navakwenu.” (Mako 9:50) Mungwa weji kuyemesanga vyakulya. Mungwa wachifwanyisa weji kulingisanga vyuma nahanjika mutu vavitavile nakulingisa vatu vatwame mukuunda, oloze omu keshi mukiko cheji kupwanga nge vatu navalipula jipamiko.—Wavaka-Kolose 4:6.

Lwola lumwe kunahase kwepuka ukalu, kaha Yesu atulweza mwakuukumishila. Yesu ambile ngwenyi: “Kachi nge ndumbwove nalingi shili, yako ukamulweze mulonga wenyi kwauka wenu naikiye kaha. Kachi nge mwakwivwilila, kaha unanganyala ndumbwove.” Nyi ngachilihi nge mwakana kukwivwilila? Yesu ambile ngwenyi: “Mbatako mutu umwe chipwe vavali, mangana haunjiho wavatu vavali chipwe vatatu, chihande chosena chihase kuzama mbe.” Kachi nge chuma kana kachakumishile ukaluko, kaha “lweza chikungulwilo,” vakulwane vaze vakwechi mulimo wakumikafwa. Nyi ngachilihi nge muka-shili kate lika kwivwilila? “Kaha apwenga nge himutu muka-lifuchi lyeka kuli ove, chipwe nge himuka-kutambula mitelo,” kulumbununa mutu uze vazenekele vaYuleya kulikata nenyi.—Mateu 18:15-17.

Vyuma kanevi nge vinasoloka, tulama muchikungulwilo vatela kukavangiza Mazu aKalunga. Nge navawana mutu namulonga nakusaka kumuzangamisa, kaha vyuma navakasa vakulwane hali mutu kana ‘vanavikase lyehi namwilu nawa.’ Oloze nge mutu mwasamba, kaha ‘vanamukasununa lyehi namwilu nawa.’ Jindongi kana javakafwile nomu vatungile chikungulwilo chavaka-Kulishitu. Halwola navasopa mulonga kana, Yesu ambile ngwenyi: “Kuze kuli vavali chipwe vatatu vanakunguluka mulijina lyami, nayami kunguli vene kuze mukachi kavo.”—Mateu 18:18-20.