Yesu nafumi tuhu nakuhana chakutalilahu chayilwilu yatela kwikala nawakakumulondela indi. Atela kudimonaña neyi anyana anyanya, adikehesha nawa abula kulema. Atumbanji atela ‘kutambwila mwana wanyanya wudi neyi iwu muloña wejina dindi, dikwila nawu anamutambwili niYesu nawa.’—Matewu 18:5.

Hanashimbuli wanyi apostolu anaditadikisheña nawu wabadika hinyi hakachi kawu, dichi hadaha anamoni nawu Yesu nakuyifumba. Yowanu nahoshi nindi: “Ntañishi, twamona muntu wafumishaña andemoni mwijina deyi, tweseka kumukaanisha muloña hanakukulondela eyi hamu nanetuku.”—Luka 9:49.

Komana Yowanu nakutoñojoka nindi apostolu hohu diwu etejawu kuuka antu nikufumisha andemoni? Neyi diwu, hanu muloñadi iwu iyala kaYudeya chinakufumishayi aspiritu atama? Yowanu nakutoñojoka nindi iwu iyala hatela kukoñaña nyidimu yañovuku, muloña yena nakumulondela wanyi Yesu niapostolu.

Yowanu nahayami chinahoshiyi Yesu nindi: “Bayi mweseka kumukaanishaku, muloña hikudi muntu wukuzata mudimu wakuhayamisha mwijina dami wukushikena kuhosha chuma chatama hadi amiku. Muloña wejima wabulaña kutwimakena wudi kukabadi ketu. Nawa muntu wejima wukuyinka kaapu kamenji muloña wakwila mudi antu jaKristu, inakuyileja chalala nami, wakatambwila wufwetu windi.”—Maku 9:39-41.

Inehi, yinu mpinji hichinakukeñeka iwu iyala kulondela Kristu kulonda ekali kukabadi kaYesuku. Keña atuñi chipompelu chawakaKristu, dichi iwu iyala chinakubula kwendela hamu naYesu chinayi wanyi mukwila nawu himukakudikaña hela nakutandisha kwitiya kwakutwamba. Kafwampi nakuhweleli mwijina daYesu, nawa yuma yinakuhosha Yesu yinakumwekesha nawu iwu iyala wakajimbesha wanyi wufwetu windi.

Kwambukaku, wadi kwikala namuloña weneni neyi iwu iyala wahukana namazu niyilwilu yawapostolu. Yesu nahoshi nindi: “Muntu wejima wukuhukesha wumu wahadi awa akehelamu akweti chikuhwelelu, chikuwaha owu muntu akumukasila ilola dakuhalilaku munshiñu danyeñumunañayi chimbuulu nakumunatila mukaluñalwiji.” (Maku 9:42) Kuhiñahu Yesu nahoshi nindi akakumulondela atela kufumisha chuma chalema chidi neyi chikasa, mwendu hela diisu neyi dinakuyihukesha. Chikuwaha kufumisha ichi chiidi chalema nakwiñila muWanta waNzambi kubadika kwikala nachu nakuya muGehena (Chinekineki chaHinomi). Hadaha apostolu anamoni ichi chinekineki chidi kukamwihi naYerusalema mwochelañawu nswadi, dichi anatiyishishi nawu chinakwimenaku kujilumuka kwayaha nyaaka.

Yesu nayileji cheñi nindi: “Dichi bayi mudiwula wumu hadi awa akehelamuku, muloña inakuyileja nami añelu jawu mwiwulu mpinji yejima atalaña kumesu aTata yami wekala mwiwulu.” Indi “awa akehelamu” alema ñahi kudi Tata yindi? Yesu  nahoshi hadi iyala wadiña nanyikoku 100 ilaña yajimbeshahu wumu. Iwu iyala washili nyikoku 99 nakuya nakukeñakeña wumu wajimbeli nawa chamuwaniniyi wazañaleli chikupu kubadika owu 99. Yesu nabombelihu nindi: “Tata yami wekala mwiwulu niyena hakeñaña nindi wumu hadi awa akehelamu akisikiku.”—Matewu 18:10, 14.

Hadaha nakutoñojoka chadiña nakuditadikishawu apostolu indi kutalisha hadi wabadika, Yesu nayileji nindi: “Ikalenuña namuñwa mudi enu aweni nawa shakamenuña mukuwunda wumu namukwawu.” (Maku 9:50) Muñwa wawahishaña yakuda. Muñwa wamuchifwikija waleteshaña mazu anakuhoshayi muntu ayiteji nawa dichi waleteshaña kulonda hekali kuwunda, chuma chinateli kubula kufuma muntaadi.—AKolosi 4:6.

Mpinji yikwawu, kukala kweneni kunateli kumwekana nawa Yesu nashimuni chakukumanisha. Yesu nahoshi nindi: “Neyi manakweyi nakoñi nshidi, yaku wumuleji chiluwa chinakoñiyi muwuyedi wenu. Neyi nakutiyilili, dikwila nawu wunamukwashi manakweyi kwila chuma chaloña.” Indi neyi natiyi wanyi? Yesu nahoshi nindi: “Sendaku muntu wumu hela ayedi, muloña wejima akuwusompa hohu neyi awushimuna kudi ayinsahu ayedi hela asatu.” Neyi anakañanyi kumanisha kukala, atela kulejamu “chipompelu,” dikwila nawu kulejamu akulumpi anateli kufuukula. Indochu neyi mukanshidi nakaani kutiyilila? “Owu muntu mumoneña hohu neyi mukanyuza nawa neyi mukakutambula nyisonku,” muntu abulañawu kudikunda nindi aYudeya.—Matewu 18:15-17.

Akulumpi muchipompelu atela kulondela chahosha Izu daNzambi. Neyi awana muntu wudi namuloña nawa nakukeñeka kumubabesha, chuma chakukasawu ‘akwikala anachikasa dehi mwiwulu.’ Ilaña neyi amuwana nawu wudana muloña, ‘akumukasununa mwiwulu.’ Iyi nshimbi yikukwashana neyi chipompelu chawakaKristu anachituñi. Haniyi nsañu, Yesu nahoshi nindi: “Hanapompi antu ayedi hela asatu mwijina dami, ninami nidi hakachi kawu.”—Matewu 18:1818-20.