Yesu oa tiyo gi ranyisi mar nyathi matin mondo okony jolupne obed gi paro makare. Onego gibolre mana kaka nyithindo matindo ma ok odich gi laro duong’ e kindgi. Jopuonjre onego ‘orwak nyithindo ma kamago nikech nying Yesu, kendo mano biro nyiso ni girwake en bende.’​—Mathayo 18:5.

Nyocha joote obedo gi ywaruok e wi ng’at maduong’ie moloyo. Kuom mano, ginyalo kawo weche ma Yesu owachogo kaka weche ma nyalo konyogi loko pachgi. Koro jaote Johana wuoyo e wi gimoro machielo moa timore. Owacho niya: “Nende waneno ng’at moro ka golo jochiende kotiyo gi nyingi, mi ne watemo geng’e nikech ok oluwwa.”​—Luka 9:49.

Be dibed ni Johana neno ni joote kende e ma omi ratiro mar chango ji kendo golo jochiende? Ka en kamano, obet nade ni Ja-Yahudino nigi nyalo mar golo jochiende? Nenore ni Johana paro ni ng’atno ok onego obed ni timo honni nikech ok owuoth kanyachiel gi Yesu kod joote.

Nyaka bed ni weche ma Yesu tiyogo miyo Johana bwok. Yesu wacho niya: “Kik utem geng’e nikech onge ng’at ma biro timo tich moro amora maduong’ e nyinga kae to mapiyo bang’e owacho gimoro marach kuoma. Nimar ng’at ma ok kwedwa en ng’atwa. Kendo ng’ato ang’ata ma miyou pi mondo umodh nikech un mag Kristo, adier awachonu ni, ng’atno ok nolal pokne ngang’.”​—Mariko 9:39-41.

Nenore ni gie kindeno, ok ochuno ni ng’atno owuoth gi Kristo Yesu eka mondo onyis ni oriwo Yesu lwedo. Nyaka chop kanyo, pok ochak kanyakla mar Jokristo. Omiyo, bedo ni ng’atno ok wuoth kanyachiel gi Yesu ok nyis ni okwedo Yesu kata ni oriwo lwedo din mar miriambo. Kuom adier, ng’atno nigi yie kuom nying Yesu kendo weche ma Yesu wacho nyiso ni ng’atno ok nolal pokne.

Mopogore gi mano, nyalo bedo marach moloyo kapo ni ng’atno ne ochwanyore nikech weche moa e dho joote kata gik ma ne gitimo. Yesu wacho kama: “Ng’ato ang’ata ma chwanyo achiel kuom joma tindo ma nyiso yiegi, dibed maber moloyo ka otue e ng’ute kidi mar pong’, kaka mirundo gi punda, mondo onyumego e nam.” (Mariko 9:42) Bang’ mano, Yesu wacho ne jolupne ni onego gigol kata ging’ad oko gik ma dwarore ahinya kaka lwedo, tielo, kata wang’ kapo ni mano nyalo miyo gichwany jomamoko. Ber moloyo mondo ng’ato olal gimoro mogeno ahinya mondo odonj e Pinyruodh Nyasaye, kar makruok gi gino kae to gikone iwite e Gehena (Hoho mar Hinom). Hohono en kar wang’o yugi. Nyalo bedo ni joote ong’eyo kama entie, nimar ochiegni gi Jerusalem. Omiyo, ginyalo ng’eyo tiend Gehena kaka gima ochung’ ne kethruok ma ng’ato ok nochak obedie nyaka chieng’.

Yesu bende chiwo siem kowacho niya: ‘Kik ucha achiel kuom joma tindogi, nimar awachonu ni, malaike mekgi e polo neno wang’ Wuora  kinde duto.’ ‘Joma tindogo’ nigi duong’ e wang’ Wuon mare e yo mane? Yesu wuoyo e wi ng’at moro ma nigi rombe 100 to achiel kuomgi olal. Ng’atno weyo 99 chien mondo odhi omany molalcha. Bang’ yude, obedo mamor ahinya gi ma ne olalno moloyo mamoko 99. Yesu medo wacho kama: “Ok en gima long’o ne Wuora manie polo mondo kata mana achiel kuom joma tindogi olal.”​—Mathayo 18:10, 14.

Yesu jiwo jootene niya: “Beduru gi chumbi e iu, kendo urit kuwe e kindu.” Nenore ni owacho kamano nikech ywaruok ma jootene ne nigo e wi ng’at maduong’ie moloyo e kindgi. (Mariko 9:50) Chumbi medo ndhadhu e chiemo. Inyalo pim chumbi gi weche mamit ma ng’ato wacho, ma nyalo miyo jawinjo okaw okang’ ma dwarore. Weche kaka mago rito kuwe to mbaka matek kod ywaruok to ketho kuwe.​—Jo-Kolosai 4:6.

Nitie kinde ma weche ma korgi tek biro betie, kendo Yesu nyiso jolupne kaka ginyalo tiekogi. Yesu wachonegi kama: “Ka owadu otimo richo, dhi iel kethone e kindi kode kar kendu. Ka owinji, to iseyudo owadu.” To nade ka ok owinji? Yesu puonjo kama: “Dhi ire gi ng’at achiel kata jomoko ariyo mondo kuom neno ma joneno ariyo kata adek chiwo, tiend wach moro amora mondo ong’ere malong’o.” Kapo ni mano ok los wachno, onego giwuo gi “kanyakla,” tiende ni jodong-kanyakla momi ting’ mar ng’ado bura e wi wachno. To nade kapo ni jarichono pod ok winj? “We mondo owaduno obedni mana kaka ng’at moa e ogendni mamoko kendo kaka jasol osuru,” ma gin joma Jo-Yahudi ok riwregago.​—Mathayo 18:15-17.

Jorit mag kanyakla onego oti ahinya gi Wach Nyasaye ma en Muma. Kapo ni joritgo oyudo ni ng’ato otimo richo adier kendo dwarore ni orieye, bura ma ging’ado biro ‘bedo gima osetue e polo.’ To ka giyudo ni ng’atno onge ketho, bura ma ging’ado biro bedo gima “osegony e polo.” Paro ma Yesu ochiwogo biro konyo bang’ ka kanyakla mar Jokristo osechak. Yesu wacho kama e weche ma kamago ma dwarore ni ong’adie bura: “Kama ji ariyo kata adek ochokoree e nyinga, kanyo antie e diergi.”​—Mathayo 18:18-20.