Sẽn nan pa kaoose, a Zeezi rɩka makr n sõng a karen-biisã tɩ b bãng tɩ b pa segd n yɩ neb sẽn baood naam ye. B segd n yɩɩ sik-m-mens rãmb wa kom-bõonego. A yeel-b lame tɩ ned ning fãa sẽn na n deeg bi-bilf yẽ yʋʋrã yĩnga, yaa yẽ mengã la a reegda.—Matye 18:5.

Tõe tɩ tʋm-tʋmdbã tagsame t’a Zeezi zab-b lame. Bala b ra wẽe no-koeemd n dat n bãng sẽn yaa-a kãseng n yɩɩdã. La bũmb n maan sẽn nan pa kaoose, tɩ tʋm-tʋmd a Zã rat n togs a Zeezi. A yeela a Zeezi yaa: “Karen-saamba, tõnd yãnda rao sẽn digd zĩn-dãmb ne yãmb yʋʋre, la tõnd gɩdg-a lame, a sẽn ka naag tõnd n tũud yãmbã yĩnga.”—Luk 9:49.

Rẽ yĩnga, a Zã ra tagsdame tɩ yaa tʋm-tʋmdbã bal n tar sor n na n sãoog bãas la b rig zĩn-dãmb bɩ? Sã n yaa rẽ, raoã sẽn yaa zʋɩfã paama tõogã yɛ n digd zĩn-dãmba? Wõnda a Zã ra tagsdame tɩ raoã sẽn pa tũud bãmb ne a Zeezi n gilgdẽ wã, a pa tar sor n maan yel-soalem ye.

A Zeezi sẽn yeel a Zã bũmb ningã ling-a lame. A yeelame: “Da gɩdg-y-yã-a ye. Bala, ned ka be sẽn na n maan bõn-bãnd ne mam yʋʋre, n wẽneg n sãbs maam ye. Ned sã n ka kis tõndo, a bee ne tõndo. Mam yeta yãmb sɩda, tɩ ned ning fãa sẽn na n kõ yãmb koom tɩ y yũ yãmb sẽn yaa Kiris nebã yĩnga, a soab kõn kong a keoor ye.”—Mark 9:39-41.

Sɩd me, nan pa tɩlɛ tɩ raoã tũud Kirisã n gilgdẽ, sẽn na yɩl n wilg t’a bee a poorẽ ye. B ra nan pa lugl kiris-neb tigingã ye. Dẽnd raoã sẽn pa tũud a Zeezi n gilgdẽ wã pa wilgd t’a yaa kɩɩsda, bɩ t’a zãmsda nebã sẽn pa sɩd ye. Raoã ra tẽeda a Zeezi tɩ sãmbg kae ye. A Zeezi sẽn yeel bũmb ningã wilgdame me tɩ raoã kõn kong a keoor ye.

Tʋm-tʋmdbã goamã la b manesmã sã n da kɩt tɩ raoã bas Wẽnnaam sakre, rẽ ra na n yɩɩ wẽng wʋsgo. Rẽ n so t’a Zeezi yeele: “Ned sã n maan kom-bãooneg kãens sẽn tẽed maamã ned a yembr t’a lʋɩ, sẽn yaa neer n yɩɩd a soab yĩnga, yaa b sẽn na n loe a yubl ne neer kugr n lob-a ko-kãsengã pʋgẽ.” (Mark 9:42) Yaa rẽ yĩng la a Zeezi sẽn yeel t’a karen-biisã segd n yãka bũmb ning fãa sẽn tõe n kɩt tɩ ned wa pa le sakd Wẽnnaamã n lobe, baa bõn-kãng tara yõod wala nugu, karg bɩ nifu. D sẽn maand woto n paam n kẽ Wẽnnaam soolmã pʋgẽ n são b sẽn na n wa lob-d Zeyɛn (Hinom longã) pʋgẽ. Tʋm-tʋmdbã ra zoe n yãa longã sẽn pẽ Zeruzalɛm tɩ b yõogd sagd beenẽ wã. Dẽnd b bãngame t’a Zeezi ra gomda sãoong zãng-zãng yelle.

A Zeezi leb n keoog-b-la woto: “Gũus-y n da paoog-y kom-kãensã ned ba a yembr ye. Bala, mam yeta yãmb tɩ bãmb malegsã sẽn be arzãnã [“saasẽ,” MN] geta mam ba sẽn be arzãnã neng daar fãa.” Bõe n wilgd t’a Zeezi Ba sẽn be saasẽ wã nanda “kom-bãooneg” a woto? A Zeezi rɩka makre. A yeelame tɩ rao n da tar piis 100, t’a yembr meneme. A basa 99 wã n na n tɩ gẽes sẽn menem-a wã. A sẽn yã-a wã, a maana sũ-noog a yĩng n yɩɩd bãmb 99 wã. A Zeezi paasame: “Woto me, yãmb ba sẽn be arzãnã ka rat tɩ kom-kãensã ned ba a yembr menem ye.”—Matye 18:10, 14.

A Zeezi kõo a karen-biisã saglg a to. Tõeeme tɩ yaa b sẽn wẽ no-koeemd n dat n bãng sẽn yaa-a kãseng n yɩɩdã yĩnga. A yeel-b-la woto: “Tall-y yamsem noosem n zĩnd ne taab ne laafɩ.” (Mark 9:50) Yamsem paasda rɩɩb noosem. Ned no-goam sã n tar yamsem noom, sakda reegre, la sõngdẽ tɩ laafɩ zĩndi. La mo-gãgsã wata ne zaba.—Koloos-rãmbã 4:6.

Wakat ninga, yell tõe n wa zĩnda neb sʋka. A Zeezi wilga d sẽn tog n welg rẽ to-to. A yeelame: “Fo ba-biig sã n maan yel-wẽnde, kẽng n tɩ yãnd-a, foom ne yẽnda sʋka n wilg-a a kongrã. A sã n kelg foom, fo paama f ba-biiga. La a sã n ka kelg foom, bɩ f peeg nin-yɛng bɩ neb a yiib n kẽnge, tɩ yellã fãa tõe n paam manegr kaset dãmb a yiib bɩ a tãab taoore, wa Wẽnnaam gʋls-sõamyã sẽn yetã.” A Zeezi wilgame tɩ rẽ sã n pa tõog n welg yellã, bɩ b togs tigingã, rat n yeel tɩ yel-gɛtbã sẽn tar sor n na n kao bʋʋdã. La sẽn kong-a wã sã n kell n pa kelg-ba? A Zeezi yeelame tɩ rẽ masã bɩ b “ges a soabã wa ned sẽn ka pʋʋsd Wẽnnaam la a wa yaood dɛɛgda,” sẽn yaa neb zʋɩf-rãmbã sẽn da pa sakd n maand tũud-n-taar ne wã.—Matye 18:15-17.

Tigingã yel-gɛtb segd n kaoo bʋʋdã tɩ tũ Biiblã sẽn yetã. B sã n tog n kibl neda, sardã b sẽn na n dɩkã ra zoe n ‘loee saasẽ.’ La a soabã sã n ka tar taale, sardã b sẽn dɩkã na n yɩɩ sẽn da zoe n ‘lok saasẽ.’ Sagl-kãensã ra na n wa sõnga kiris-nebã, a Zeezi sã n wa lugl a tigingã. A Zeezi wilgame tɩ bʋ-kaoor a woto sasa, yẽ bee ne yel-gɛtbã. A yeelame: “Zĩig ning neb a yiib bɩ a tãab sẽn tigim taab ne mam yʋʋre, mam bee bãmb sʋka.”—Matye 18:18-20.