Jesu wazwa aakutondezya mbobeelede kuzibona zintu basikumutobela. Beelede kulibona mbuli bana basyoonto, nkokuti kulicesya alimwi akutayandisya kuba ampuwo. Basikwiiya beelede ‘kutambula bana basyoonto ibali boobu muzina lyakwe icaamba kuti bamutambula awalo Jesu.’—Matayo 18:5.

Calino-lino baapostolo balikukazyanya kuti naa nguni mupati kwiinda boonse, aboobo kweelede kuti majwi aa Jesu baabona kuti ndulayo kulimbabo. Lino mwaapostolo Johane waleta makani amwi aacintu icakacitika caino-ino, wati: “Twakabona muntu umwi katanda madaimona kwiinda mukubelesya zina lyako, alimwi twakasola kumukasya, nkaambo takutobeli antoomwe andiswe.”—Luka 9:49.

Sena Johane uyeeya kuti baapostolo balikke mbabapedwe nguzu zyakuponya bantu naa kugusya madaimona? Ikuti naa mboobo, ino caba buti kuti mwaalumi ooyu mu Juda wacikonzya kugusya myuuya mibi? Kuboneka kuti Johane ulimvwa kuti mwaalumi ooyu teelede kucita milimo mipati nkaambo tatobeli Jesu alimwi abaapostolo.

Jesu waamba cintu camugambya Johane, wati: “Mutasoli kumukasya, nkaambo kunyina muntu uucita milimo mipati muzina lyangu uukonzya kutalika kundisampaula ndilyonya. Nkaambo kufwumbwa muntu uutatulwani uli kulubazu lwesu. Alimwi kufwumbwa uumupa nkapu yamaanzi kuti munywe akaambo kakuti muli bokwa Kristo, ncobeni ndimwaambila kuti, kunyina nayoosweekelwa bulumbu bwakwe.”—Marko 9:39-41.

Inzya, aciindi eeci muntu ooyu tayandiki buya kutobela Kristo kutegwa abe kulubazu lwa Jesu. Mbungano ya Bunakristo tainingapangwa, aboobo nokuba kuti muntu ooyu teendi a Jesu, tacaambi kuti ngusikukazya naa kuti usumpula bukombi bwakubeja. Cakutadooneka, muntu ooyu ulaalusyomo muzina lya Jesu alimwi ncaamba Jesu citondezya kuti muntu ooyu takasweekelwi bulumbu bwakwe.

Kulubazu lumbi, inga waba mulandu mupati kuti muntu ooyu walebwa akaambo kazintu nzyobaamba akucita baapostolo. Jesu wati: “Kufwumbwa uulebya umwi wabasyoonto aaba ibasyoma, inga cainda kubota ikuti munsingo waangililwa ziyo lizingulusyigwa ambongolo akuwaalwa mulwizi.” (Marko 9:42) Mpoonya Jesu waamba kuti basikumutobela beelede kukosola naa kusowa nociba cintu ciyandika kapati mbuli janza, kuulu naa liso ikuti naa cibapa kulebwa. Cilainda kubota kusweekelwa cintu cili boobu iciyandika kapati akunjila mu Bwami bwa Leza kwiinda kuzumanana kuba aancico akuwaalwa mu Gehena (Kkuti lya Hinomu). Kweelede kuti baapostolo bakalibona kale kkuti eeli ilili munsi-munsi aa Jerusalemu ooko nkobaumpila tombe, aboobo balakonzya kumvwisya kuti eeci caamba kunyonyoonwa mane kukabe kutamani.

imwi Jesu wacenjezya kuti: “Amubone kuti tamusampauli umwi wabasyoonto aaba, nkaambo ndimwaambila kuti bangelo babo kujulu lyoonse balanga busyu bwa Taata.” Ino aaba “basyoonto” bayandika buti kuli Bausyi? Jesu waamba  zyamuntu uujisi mbelele zili 100, pele wasweekelwa yomwe. Muntu ooyu ulazisiya eezyo zili 99 akuunka kuyakuyandaula yeeyo yasweeka, mpoonya aijana ulakkomana kapati kwiinda mbwakkomana akaambo kazyeezyo zili 99. Jesu wayungizya kuti: “Mbubonya buyo, awalo Taata uuli kujulu tayandi kuti umwi wabasyoonto aaba alobe.”—Matayo 18:10, 14.

Ambweni kayeeyede mbobali kukazyanya baapostolo kujatikizya mupati kwiinda boonse, Jesu wabakulwaizya kuti: “Amube amunyo mubuumi bwanu akuba aluumuno akati kanu.” (Marko 9:50) Munyo unozya zyakulya. Munyo wacikozyanyo upa kuti nzyaamba muntu zitambulwe alimwi ugwasya kuti bantu bazumanane kukkala muluumuno, calo icitacitiki ikuti kakuli kukazyanya.—Bakolose 4:6.

Zimwi ziindi kulakonzya kubuka twaambo tupati, alimwi Jesu waamba mbotweelede kubambwa. Jesu wati: “Ikuti munyoko wakubisizya, koya ukamwaambile ncaalubizya kamuli nyobilo. Ikuti wakuswiilila, nkokuti wamupilusya munyoko.” Pele ino mbuti kuti tanaakuswiilila? Jesu waamba kuti: “Utolelezye muntu omwe naa bobilo, kutegwa kubumboni bwabakamboni bobilo naa botatwe makani oonse akasinizyigwe.” Ikuti naa eeci caala kukabamba kaambo, beelede kwaambila “mbungano,” nkokuti baalu, aabo ibajisi mukuli wakukosola makani. Ino mbuti kuti sizibi ucikaka kuswiilila? “Aabe kulinduwe mbubonya mbuli muntu wamasi alimwi ambuli simutelo,” nkokuti ibantu aabo iba Juda mbobatayanzani aambabo.—Matayo 18:15-17.

Nobakosola makani, balangizi bambungano beelede kulomya kutobela Jwi lya Leza. Ikuti bajana kuti sizibi ulaamulandu alimwi uyandika kusubulwa, mbobaakosola makani ‘anooli akaangwa kale kujulu.’ Pele ikuti bajana kuti tajisi mulandu, makani aayo ‘anooli akaangununwa kale kujulu.’ Malailile aaya ayakugwasya kapati yaakubambwa mbungano ya Bunakristo. Ciindi nobalanga-langa makani aaya mapati, Jesu waamba kuti: “Ooko nkobabungene antoomwe bantu bobilo naa botatwe muzina lyangu, nkondili andime akati kabo.”—Matayo 18:18-20.