Yesu aahilavula mukhalelo atthareli awe yaatthuneya aya okhalana. Awo yaahaana wiithokorerya ntoko anamwane, ooyeva ni oohiixinnuwiha. Nave awiixutti yaahaana ‘omwakhela mwanamwane ntoko sule mwa nsina nawe wira amwakhele yowo [Yesu]’.—Matheyo 18:5.

Arummwa yiira avaanyihanne ene niinaano voohimya sa ole aari muulupale, nto awo yoona wira Yesu aamwaapwapwela. Vano murummwa Yohani aahihimya etthu ekina yiiraneyale niinaano-ru, oriki: “Mwixuttihi, nomona mutthu òmolaka malaikha a Satana ni nsina nanyu. Nomukhottiherya, mana khanetta ni hiyo”.—Luka 9:49.

Niireke wira Yohani uupuwela wira arummwa paahi ti yeemereriwe waapenuxa atthu ni woomola malaikha ootakhala? Akhala wira ti siiso, xeeni muYuda ole aawerya awe woomola malaikha ootakhala? Yohani oona wira mulopwana ole khaatthuneya opaka miiriirya, okhala wira kheetta ni Yesu ni arummwa.

Yohani aahitikinihiwa vaavo Yesu aahimmye awe wira: “Muhimuhihé. Khavo onira sotikiniha ni nsina naka, numalá khíyakiveha. Vekekhai, ole ohinnivirikanya, t’awihu. Kinolèlani ekhweli wira: ole onovahani ekahi emosá ya màsi òwùrya, vokhala atthu a Kristu, khanojela otthuveliwa”.​—Marko 9:39-41.

Okathi ole, owo khaatthuneya weetta ni arummwa wira ooniherye wira aari mpantta wa Yesu. Maana muloko wa eKristau wira nlelo ohinatthi okhala. Nto mwaha wa oheetta ni Kristu khiwaataphulela wira mulopwana ole aaninvirikanya Yesu aahiiso aatumererya etiini yoowootha. Tthiri mulopwana ole aanaamini nsina na Yesu, nto ele Yesu aahimmye awe yaahooniherya wira mulopwana ole aamutthuveliwa.

Nave, vaarowa okhala vootakhala moolumo ni miteko sa arummwa a Yesu omwiiriha mutthu ole okhumuwa. Nto Yesu aahimmye so: “Vano, akhalá mutthu onimutthekiha mmosá àxikhani ala ankamini miyo, fatari atthukeleliwe nxilo nulupale muxikoni, ariheliwe mphareya eriyari”. (Marko 9:42) Nuumala-vo, Yesu aahaaleela atthareli awe wira, fataari wiikittha moono, nnawu aahiiso niitho akhala wira naanaatthekiha. Ti vooloka ohikhalana mipantta iyo sa erutthu khukela Momweneni mwa Muluku, ohiya oriheliwa oGehena (Nlitti na Hinomi). Arummwa ale yaanisuwela nlitti nne naari ota wa Yerusalemu nenlo naariheliwa ikokhola. Tivonto, awo yaahiiwexexa wira aahimya opwetexiwa woomalela.

Nave Yesu aahaalopola wira: “Mwipasope: muhimuthanyé nnákhala mmosá àxikhani ala. Tthiri miyo kinohimeryani wira: malaikh’aya, wirimu, annona vohihiyererya ekhove y’Atithi aka ari wirimu”. Tthiri “àxikhani ala” aakhalana efaita yuulupale vamaithoni va Tiithi awe. Yesu aahaaleela nlikanyiho na mulopwana aarina ipwittipwitthi 100, masi khurimeeliwa emosa.  Mulopwana ole, aahihiya ipwittipwitthi 99, khurowa waavya ele emosa yaarimenle. Vaavo aaphwannya awe, owo aahihakalala vanceene ovikana iye 99. Nave Yesu aahincererya wira: “Atith’inyu ari wirimu khantthuna wira arimele nnákhala mmosá àxikhani ala”.​—Matheyo 18:10, 14.

Woonasa wene, owuupuwelaka arummwa awe yaavaanyihana voohimya sa ole aari muulupale, Yesu aahimmye wira: “Mphaveleke welela ekumi anyu. Mukhalaneke murettele mukina ni mukhw’awe”. (Marko 9:50) Maakha annisiviha yoolya. Mwa nthoonyeryo, maakha annikhaliherya weemererya etthu enihimmwa ni okhaliha murettele, etthu yeeyo ovaanyihana ehiniwerya aya opaka.​—aKolosi 4:6.

Okhala wira okathi mukina pooti okhumelela mixankiho, Yesu aahiwooniherya moota woophuka oriki: “Mukhw’inyu attheká, mwakumane mekhinyu ni yowo pahi, mwamulake [ovaanelana]. Awiwani, momutthikiherya munn’inyu ephiro yorera”. Ankhi aahiphavele wiiwa? Yesu aahimmye so: “Mmuroihele mutthu mukina walá atthu anli, wira ‘mulattu anyu ophukiwe oholo w’anamona anli walá araru’”. Akhala wira atthu awo khaniwerya omaliha mwaha owo, ahaana waaleela “aKristu”, eyo piiyo, axitokweene a mmulokoni. Awo anoowerya okhaliherya. Ankhi akhala wira khonaawiriyana axitokweene? Yesu aahimmye wira: “Mmwettiheke ntoko mutthu òhamini walá ntoko mulipa-òttheka”, atthu yaawo aYuda yaahaaphavela aya wataana.—Matheyo 18:15-17.

Axitokweene awo ahaana ovarihela muteko Nuulumo na Muluku. Nto akhala wira mulipa-oottheka owo ookhalana nthowa, axitokweene ahaana ompwapwela. Nto ompwapwela waya ‘onnitthukiwa wirimu’. Masi yoona wira khotthenke, owo ‘onotaphuliwa wirimu’. Malakiheryo ala yaahikhaliherya vanceene nuumala muloko wa eKristau opakiwa. Akhala wira mwaha owo muulupale, Yesu aahimmye wira: “Nipuro ninthukumanaya atthu anli walá araru ni nsina naka, miyo kiri vavo, vamosá n’awo”.​—Matheyo 18:18-20.