Inyu ngim ngéda, Yésu a bi tégbaha libim li nson wé i Galiléa i het bôt ba bé nleege likalô jé iloo i Yudéa. I ngéda a bé i Yérusalem, a bi mbuubaha mut i kel Sabat, inyu hala nyen “Lôk Yuda i bé nayak le i nol ndik nye.”​—Yôhanes 5:18; 7:1.

Di yé nano i sôñ hikañ hi nwii 32 N.Y., ngand i Bilap (tole Mabadô) i yé bebee. I mboñ dilo disaambok, i mbus, ba ntégbaha likoda likeñi hilo hi nyônôs juem. I ngand i yon i ñéba le ngéda minson ni i mabumbul i mal, hilo hi hi yé hilo hi maséé ni hilo hi ba nti Djob mayéga.

Bilôk binyañ bi Yésu le Yakôbô, Simôn, Yôsep ni Yuda ba nkal nye le: “Nyodi hana, kenek i Yudéa.” Yérusalem a yé tison het base i nhoñ. I ngand nwii aa i ntagbe, bôt ba bé ngandak i Yérusalem. Bilôk binyañ bi Yésu bi nkal nye le: “Mut to wada a mboñ bé jam jo ki jo bisôsôli ngéda a nyéñ yiba i mbamba. Ibale u mboñ i mam mana, boñ le nkoñ isi u yi we.”​—Yôhanes 7:3, 4.

I nene le lôknyañ yé yo-ina “i nhémle bé” le a yé Mésia. Ndi ba gwé ngôñ le i bet ba nlo i ngand ba tehe nye a ngwel minson mi hélha. Yésu a nyi ndutu i nlo mu, jon a nkal bo le: “Nkoñ isi u gwé bé njom yo ki yo i oo bé, ndi u ñoo me inyule me mbok mbôgi le minson mi nkoñ isi mi yé mimbe. Bé kena i ngand; nano bé nyen me mbet inyu ke i ngand inyule ngéda yem i yé ngi tibil kola.”​—Yôhanes 7:5-8.

I mbus ndék dilo, lôkyañ i Yésu i nke ni bôt bape. Yésu ni banigil bé ba nke bisôsôli inyu boñ le bôt ba tehe bañ bo. Iloole ba yoñ njel i ntagbe bebee ni Lom Yordan, ba nyoñ njel i nlôô i Samaria. Yésu ni banigil bé ba ga bana ngôñ ni homa liyééne i Samaria jon a ñom banigil bé i kôôba. Bôt ba mbai yada ba ntjél leege bo kiki lem inyule Yésu a yé ke lôôs ngand Lôk Yuda i Yérusalem. Yôhanes bo Yakôbô ba ñunup, ba kal Yésu le: “A Nwet, baa u nsômbôl le di sébél hié hi nlôl i ngii inyu tjé bo?” (Lukas 9:54) Yésu a nkodol bo mu kiki ba mbat nye jam li, i mbus ba nke.

Mu njel, nyimbén wada a nkal Yésu le: “A Lét, m’a noñ we to hee homa u nke.” Yésu a ntimbhe nye le: “Ndon i gwé bihôk, yak dinuni di gwé mumbul, ndi Man mut a gwé bé homa a nkéhne ño.” (Matéô 8:19, 20) A ñunda le ibale nyimbén a nyila nnigil Yésu, a ga boma  mandutu. I nene le nyimbén a yé ngôk ngandak inyu neebe i ntén niñ u. Jon hiki wada wés a nla badba le, ‘Ipam hee me yé bebee i unda le me noñ Yésu?’

Yésu a nkal mut numpe le: “Noñ me.” Mut a ntimbhe le: “A Nwet, bôk ndugi ti me kunde le me ke me jô pua yem.” Ndi Yésu a nkal nye le: “Nwas mim mi jô mim nwap, ndi we ke añal Ane Nyambe homa nyensôna.” (Lukas 9:59, 60) Isañ a yé ngi wo, ibale isañ a bé nwok ki man a ta bé ha i kwel ni Yésu. Man a bé bé nkôôbaga i bii Ane Djob kiki jam li bisu mu niñ yé.

Kiki ba yé sôs hikôa inyu ke i Yérusalem, mut numpe a nkal Yésu le: “M’a noñ we, a Nwet; ndi bôk ndugi ti me kunde le me tjôla bôt ba ndap yem lihaa.” Yésu a ntimbhe le: “I mut a nha woo wé i kei i ntém hisi, ndi a béñgege i mam ma yé i mbus, a kôli bé jôp i Ane Nyambe.”​—Lukas 9:61, 62.

I bet ba gwé ngôñ i ba bañga banigil i Yésu ba nlama bok mis map i nson Ane. Ibale nsalwom a ntéñbe bé i nun bisu, hikuu a yé boñ hi ga sedep. Ndi ibale a ntéé nson inyu béñge yom i ntagbe i mbus, bôlô i ga telep. Nlélém nu ni nu a nhielba inyu béñge mam ma hiai hini a nla baage mu njel i nkena niñ boga.