Sedekah enda, rusuren Jesus ngajar i Galilea, i je sikap pengalo-ngalo kalak. Tapi kalak si lit i Judea nulak Jesus. Si parahna ka, sanga ipepalem Jesus sekalak dilaki i bas wari Sabat, kalak Jahudi i bas Jerusalem ‘ergegehna ndarami cara guna munuh Jesus.’​—Johanes 5:18; 7:1.

Gundari tahun 32 M, janah kentisik nari seh me waktuna Wari Raya Sapo-Sapo. Wari raya e ilakoken pitu wari dekahna. I bas wari si pewaluhken lit acara pulung si istimewa si jadi tanda akhir tahun peranin, i je me waktuna ermeriah ukur ras dem pengatan bujur.

Agi Jesus eme Jakup, Simon, Jusup, ras Judas terus ngasak Jesus, nina, “Tadingkenlah ingan enda janah laweslah ku Judea.” Jerusalem eme pusat ingan nembah Dibata. Sedekah telu perayan, nterem kel kalak arah ingan si ndauh nari reh ku kota e. Nina agi-agi Jesus, “Labo lit kalak erbuni-buni erdahin adi atena jadi kalak terkenal. Perban dahin si bage nge si ilakokenndu, cidahkenlah dirindu man doni.”​—Johanes 7:​3, 4.

Situhuna, empatna agi Jesus e “la erkiniteken” maka Jesus kap Mesias. Tapi merhat kalak e gelah jelma nterem si lit bas perayan e banci ngidah Jesus ngelakoken dahin si luar biasa. Tapi, iteh Jesus maka e bahaya, emaka nina Jesus, “La lit alasen doni enda rate segat man kena, tapi doni rate segat man bangku perban kupebetehken perbahanen doni si jahat. To lawes saja kena ku perayan e. Aku lenga ku jah perban lenga seh waktuku.”​—Johanes 7:5-8.

Lawes agi-agi Jesus e ras kalak si debanna ku Jerusalem. Piga-piga wari kenca si e, lawes ka Jesus ras murid-muridna alu erbuni-buni. La ilewati kalak e dalan si lit i deher Lau Jordan si biasa ilewati kalak, tapi arah Samaria me kalak e lewat. Erkiteken perlu kalak e ingan erberngi i Samaria, isuruh Jesus piga-piga kalak gelah leben lawes janah nikapken kerinana. Tapi lit penduduk i bas salah sada kuta si la nggit ngaloken Jesus, perban ngerayaken perayan Jahudi ate Jesus. Merawa Jakup ras Johanes, jenari nina man Jesus, “O Tuan, setuju nge kam adi isuruh kami api nusur arah langit nari guna ngkernepken kalak enda?” (Lukas 9:​54) Ikataken Jesus maka la banci bage perukuren kalak e. Jenari, iterusken kalak e me perdalanenna.

Sanga i bas perdalanen, reh me sekalak ahli Undang-Undang Musa ndahi Jesus, nina, “O Guru, ikut ateku ras kam ku japa pe kam lawes.” Tapi ijawap Jesus, “Biang kerangen lit liang inganna, perik-perik lit asarna, tapi Anak manusia la lit inganna ngamparken takalna.” (Matius 8:​19, 20) Ipebetehken Jesus man dilaki e maka inanamina pagi melala kesusahen adi jadi pengikutna. Banci saja la nggit dilaki e nggeluh bage. Kita pe perlu siukuri, ‘Nggit nge aku erkorban guna ngikutken Jesus?’

Nina Jesus man dilaki si deban, “Jadilah pengikutku.” Ngaloi dilaki e, “O Tuan, pediat min aku lebe ngkuburken bapakku.” Tapi nina Jesus bana, “Pediatlah kalak mate ngkuburken kalak mate, tapi kam laweslah janah beritakenlah Kerajan Dibata ku japa pe.” (Lukas 9:​59, 60) Iteh Jesus uga situhuna keadan dilaki e. Jelas me, lenga bo mate bapakna. Bicara mbaru denga pe bapakna mate, pasti nge dilaki e sangana ngurusi penguburenna i bas ingan si deban, janah labo mungkin ia i je ras Jesus. Teridah me, la nggit ia mpelebe Kerajan Dibata.

Sanga kalak e bas perdalanen denga ku Jerusalem, ngerana dilaki si deban man Jesus, “Kuikutken ateku kam Tuan, tapi pediatlah ngata aku lebe man keluargaku.” Ijawap Jesus, “Kalak si nggo njemak tenggala janah ngenen ku pudi, la cocok man Kerajan Dibata.”​—Lukas 9:​61, 62.

Adi lit kalak si sangana neggala, janah la inenna ku lebe, emaka la banci pinter bekasna. Adi ngadi ia guna ngenen ku pudi, emaka labo dung-dung dahinna e. Bage ka pe, kerina kalak si atena jadi murid Jesus, arus ipelebena pelayanenna. Adi sipelebe kai si lit i doni, enda seri bagi ngenen “ku pudi,” janah si e banci erban kita ndauh arah dalan ku kegeluhen si rasa lalap.