Hnei Iesu hna pane cainöj aqeany e Galilaia, ke tru catre la ka drei nyidrë hun e Iudra. Ketre, qane lo Sabath ne aloine nyidrë la trahmany e Ierusalema, “tha mano kö angetre Iudra thele troa humuthi nyidrë.”—Ioane 5:18; 7:1.

Enehila, easë hë e treu Semitrepa maine Okotropa 32 M.K., nge easenyi hë matre feetëne pi la Feet Ne Ihmelekap. Sevene lao drai la feete cili, nge ngöne la hnaaeitrene drai, kola cilëne la ketre asabele. Ej a nyipune la macatre ne eëny, nge ijine madrin me ole la ijine cili.

Itre jini Iesu, ene Iakobo, Simona, Iosefa, me Iudra a iele nyidrë me hape: “Feke pi qaa la, nge tro jë e Iudra.” Ierusalema hi la hnë hmi ne la nöj, matre ngöne la köni feet ne la macatre, ka catre la traon. Matre öni itre jini Iesu: “Pëkö atr ka kuca la itre ewekë cili ngöne la gaa co e aja i angeic troa hlemu. Haawe, maine eö a kuca la itre ewekë cili, amamai eö jë kowe la fen.”—Ioane 7:3, 4.

“Tha lapaune kö la itre jini nyidrë” laka, Iesu la Mesia. Aja i angatr tro la itre ka traqa troa sine la feet a hane öhnyi nyidrë e kuca la itre huliwa nyine hain. Ngo trotrohnine hi Iesu, matre öni nyidrë: “Pëkö kepin matre tro la fen a methinë nyipunie, ngo ej a methinë ni, ke eni a anyipicine laka, ngazo la itre huliwa ne ej. Tro jë pe nyipunie kowe la feet, ngo tha tro kö ni a tro ke tha traemenge pala kö.”—Ioane 7:5-8.

Itre hnepe drai thupene la hna tro hnei itre jini Iesu me itre sinatronge i angatr, Iesu a tro juetrë ju me itretre drei nyidrë. Angatr a kokone jë la gojenyi ka tro meköt a tro Samaria, ngo tha trongëne kö angatr lo gojenyi hna majemine xom, lo ka xötrëne la Hneopegejë Ioridrano. Ngo nyipiewekë troa hetre hnalapa e cili, matre nyidrëti a upe pi la itre xan troa hnëkë göhnë. Ngo tha ajane kö la itre atren la traon troa kepe angatr, maine hnimi trenyiwa, tune lo hna majemin. Xele kö angatr, ke Iesu a tro Ierusalema troa feetëne la feete i angetre Iudra. Matre elëhni jë hi Iakobo me Ioane, nge öni nyidro: “Joxu, aja i nyipëti kö tro nyio a hëne la eë qaa hnengödrai matre apatrenyi angatr asë la?” (Luka 9:54) Iesu a ameköti nyidroti ju pine mekune tune lai, nge angatr a tro hmaca pi.

Ngöne gojeny, hnene la ketre atre cinyihan hna qaja koi Iesu ka hape: “Atre Ini fe, tro fe ni a hane xötrethenge nyipë ngöne la nöjei jë i nyipë.” Matre sa jë hi Iesu ka hape: “Hetre hnë meköl ne la itre kuli wael, nge hetre itrengene meköl ne la itre waco e caha hnengödrai, ngo ame la Nekö i atr, tre pë fe kö ita ne he i  angeic.” (Mataio 8:19, 20) Iesu hi lai a amamane ka hape, tro la atre cinyihan a melëne la itre jol e tro angeic a xötrethenge nyidrë. Nge maine jë, ka pi mama angeic, matre thatreine kö troa kapa la mele cili. Haawe, loi e tro sa isa hnyinge ka hape, ‘Nemene la hnenge hna atreine nue matre xötrethenge Iesu?’

Kowe la ketre trahmany, öni Iesu: “Xötrethenge ni jë.” Ngo önine lai atr: “Joxu, pane nue ni pi troa keleme la kemeng.” Atre hi Iesu la mele ne lai atr, matre öni nyidrë: “Nue pi la itre ka meci troa keleme la itre ka mec, ngo ame eö, tro jë, nge cainöjëne jë la Baselaia i Akötresie.” (Luka 9:59, 60) Eje hi, tha meci pala kö la keme i angeic. Ke maine ka meci ju la kem, tha tro jë kö la nekön a ithanata me Iesu. Ngo kolo pe a amamane laka, tha ka hnëkë kö angeic troa amë panëne la Baselaia i Akötresie.

Iesu pala kö a tro Ierusalema, nge önine la ketre trahmanyi koi nyidrë ka hape: “Tro kö ni a xötrethenge nyipë, Joxu, ngo pane nue ni pi troa iahni memine la itre atrene la hnalapang.” Matre öni Iesu: “Tha ijije kö la Baselaia i Akötresie kowe la atre amë la ime i angeic hune la nyine uja dro, me goeëne la itre ewekë hutrö i angeic.”—Luka 9:61, 62.

Haawe, ame la itre ka ajane troa itretre drei Iesu, nyipiewekë tro angatr a goeëne hi la itre huliwa ne la Baselaia. Ceitune lai memine la ketre atre eëny, e tha angeic kö a goeën qëmeke i angeic, tha tro kö a meköt la itre iumany. Nge e tro angeic a pane nue la nyine uja dro me xei hutrö, tro ha cile la huliwa. Haawe, maine tro la ketre atr a goeëne la itre ewekë ne fen e hutrö, tro hë angeic a jea qa ngöne la gojenyi ne tro kowe la mele ka pë pun.