Jesus enen̄ede esịn idem anam utom ebịghi ke Galilee sia ediwak owo mi ẹkpan̄ utọn̄ ẹnọ enye ẹkan nte ẹkekpan̄de ke Judea. Ntak en̄wen edi nte ke mme Jew ẹkekam ẹyoyom usụn̄ ndiwot enye ke ini enye akanamde idem ọsọn̄ ete kiet ke usen Sabbath ke Jerusalem.—John 5:18; 7:1.

Ekem ini idọk isua 32 eyo Christ, ndien Usọrọ Mme Ataya ekpere. Ẹsida usen itiaba ẹnịm usọrọ emi, ndien ẹma ẹkụre ẹnịm edisana esop ke ọyọhọ usen itiaita. Ẹsinịm usọrọ emi ke ini emi ẹkperede ndikụre utom in̄wan̄ kpukpru isua ndien emi esidi ini akwa idara ye ini emi ẹnọde Abasi ekọm.

James, Simon, Joseph, ye Judas emi ẹdide nditọeka Jesus ẹdọhọ enye ẹte: “Daha ke ebiet emi ka Judea.” Jerusalem ke kpukpru mme Jew ke ofụri idụt oro ẹkesika ẹkekpono Abasi ikata ke isua. Mme owo ẹsiwak etieti do ke ini usọrọ ita emi. Mmọ nditọeka Jesus ẹdọhọ enye ẹte: “Baba owo kiet inamke n̄kpọ ekededi ke ndịbe ke adan̄aemi enye oyomde ẹdiọn̄ọ imọ an̄wan̄wa. Edieke afo anamde mme n̄kpọ emi, yarade idemfo wụt ererimbot.”—John 7:3, 4.

Ke nditịm ntịn̄, mmọ mbinan̄ ikenịmke ke enye edi Messiah. Edi mmọ ẹkeyom mbon oro ẹdide ndidụk usọrọ oro ẹkụt Jesus anamde utịben̄kpọ. Jesus ọdiọn̄ọ ke edieke imọ ikade ke iyodụk mfịna. Ntem enye ọdọhọ mmọ ete: “Ererimbot inyeneke ntak ndomokiet ndisua mbufo, edi enye asua mi, koro ntiede ntiense mban̄a enye nte ke mme utom esie ẹdiọk. Mbufo ẹdọk ẹka usọrọ; ami ndidọkke kan̄a n̄ka usọrọ emi, koro ini mi ikemke kan̄a ima.”—John 7:5-8.

Usen ifan̄ ama ekebe ke nditọeka Jesus ẹma ẹkesan̄a ye ediwak mbon eken ẹdaha Jerusalem, Jesus ye mme mbet esie ẹdisan̄a eke mmọ ẹka, iyakke mme owo ẹkụt mmọ. Mmọ ẹkesan̄a Samaria utu ke ndisan̄a ke usụn̄ emi ediwak owo ẹsimade ndisan̄a, emi ekperede Akpa Jordan. Ana Jesus ye mme mbet ẹna ke Samaria, ntem enye ọdọn̄ mme owo ẹbem enye iso ẹka ẹkeyom ebiet emi mmọ ẹdinade. Mbon obio kiet emi mmọ ẹkade ẹkedụk imaha ndinọ mmọ itie m̀mê ndikam ndadara mmọ sia Jesus akade Jerusalem ndidụk usọrọ mme Jew. Esịt ayat James ye John. Mmọ ẹbụp Jesus ẹte: “Ọbọn̄, nte afo omoyom nnyịn ikot ikan̄ oto ke enyọn̄ osụhọde edisobo mmọ?” (Luke 9:54) Jesus asua ọnọ mmọ ke ndikam n̄kekere utọ n̄kpọ oro, ndien mmọ ẹka iso ke isan̄ mmọ.

Nte mmọ ẹsụk ẹsan̄ade ke usụn̄, scribe kiet ọdọhọ Jesus ete: “Andikpep, nyetiene fi n̄ka ebiet ekededi eke afo oyomde ndika.” Jesus ọdọhọ enye ete: “Mme ebuaikọt ẹnyene ndudu, mme inuen enyọn̄ ẹnyụn̄ ẹnyene efọk, edi Eyen owo inyeneke ebiet eke enịmde ibuot esie.” (Matthew 8: 19, 20) Ikọ Jesus ọwọrọ ke n̄kpọ idimemke ye ete oro edieke enye edide mbet imọ. Etie nte ete oro n̄ko isụhọkede idem ikem ndidu utọ uwem emi. Ntem, nnyịn owo kiet kiet imekeme ndibụp idem nnyịn ite, ‘Ndi mmenen̄ede nyom nditiene Jesus?’

Jesus ọdọhọ owo en̄wen ete: “Tiene mi.” Ete oro ọdọhọ enye ete: “Yak mi n̄ka kan̄a n̄kobụk ete mi.” Jesus enen̄ede ọdiọn̄ọ owo emi, ntre enye ọdọhọ ete: “Yak mme akpan̄kpa ẹbụk mme akpan̄kpa mmọ, edi afo ka kpukpru ebiet katan̄a obio ubọn̄ Abasi.” (Luke 9:59, 60) Etie nte ete owo oro ikpaha kan̄a. Ekpedi ama akpa, eyen esie ikpodụhe mi ye Jesus. Onyụn̄ edi ke owo oro iben̄eke idem ndinam Obio Ubọn̄ Abasi edi ebeiso n̄kpọ ke uwem esie.

Nte mmọ ẹkperede Jerusalem owo en̄wen ọdọhọ Jesus ete: “Nyetiene fi, Ọbọn̄; edi yak mbem iso kan̄a n̄kọkọm mbonufọk mi unyọn̄.” Jesus ọdọhọ enye ete: “Baba owo kiet emi akabarede ese mme n̄kpọ oro ẹdude ke edem ke enye ama ekesịn ubọk ke ufụn̄isọn̄ idotke ndidụk obio ubọn̄ Abasi.”—Luke 9:61, 62.

Mbon oro ẹnen̄erede ẹyom ndidi mbet Jesus ẹnyene ndiwụk enyịn ye ekikere mmọ ke n̄kpọ Abasi. Edieke owo emi ofụn̄de isọn̄ mîwụkke enyịn ise iso esie, udịm ebono emi enye anamde idinenke. Edieke enye onyụn̄ ayakde n̄kpọ ufụn̄isọn̄ esie enịm man ọwọn̄ọde ese nte edem etiede, enye idikụreke utom esie ke ini. Kpasụk ntre, owo ndifiak mbịne se enye ama ọkọkpọn̄ ke akani ererimbot emi ekeme ndinam enye idụkke Obio Ubọn̄ Abasi.