Jesús opyta opredika Galiléare peteĩ tiémpore, ha upépe ojuhu hetave persóna ohendu porãva chupe. Judéape katu ndaupéichai vaʼekue. Oĩro guare Jerusalénpe ha omonguera peteĩ kuimbaʼépe peteĩ sábadope “umi hudío ojukase [kuri] chupe” (Juan 5:18; 7:1).

Koʼág̃a áño 32 ha og̃uahẽma pe otóño. Avei hiʼag̃uimbaitéma pe arete hérava Enrramáda Guýpe Jeiko, ojejapóva oñemohuʼãvo pe kosécha tiémpo. Umi hénte ningo ovyʼapa ha oagradesejoa Ñandejárape. Ko arete odura siete día, ha pe ocho diahápe ojejapo peteĩ aty guasu iñimportánteva.

Jesús ermanokuéra hérava Santiago, Simón, José ha Judas heʼi chupe: “Esẽ tereho Judéape”. Jerusalén ningo pe siuda iñimportantevéva Judéape ha upépe ohopa umi hénte oadora hag̃ua Ñandejárape. Ha ojejapo jave umi mbohapy fiésta káda áño, pe siuda henyhẽte héntegui. Upévare Jesús ermanokuéra heʼi chupe: “Avave ningo ndojapói mbaʼeve ñemiháme ojekuaaukaséramo. Rejapóramo koʼã mbaʼe, rejapo vaʼerã opavave nderecha hag̃uáicha” (Juan 7:3, 4).

Añetehápe ningo “iñermanokuéra ndojeroviái hese”, ndokreéi gueteri Jesús haʼeha pe Mesías. Péro haʼekuéra oipota umi hénte oúva pe areterã ohecha Jesús ojapoha heta milágro tuicháva. Jesús katu ohechakuaa upéva ipeligrosoha, ha heʼi chupekuéra: “Peẽ ndapejapói mbaʼeve pe múndo ndaijaʼéi hag̃ua penderehe, péro cherehe ndaijaʼéi aikuaauka rupi ivaiha umi mbaʼe ojapóva hikuái. Tapeho katu peẽ pe aretehápe, che ndahamoʼãi koʼag̃aite, che óra neʼĩra og̃uahẽ” (Juan 7:5-8).

Jesús ermanokuéra oho Jerusalénpe umi ótra hénte ndive. Jesús katu ohaʼarõ unos kuánto día ha upéi osẽ oho avei idisipulokuérandi ñemiháme. Oho rangue hikuái pe tape ojepuruvehárupi, oĩva rrío Jordán kóstare, haʼekuéra ojagarra pe tape ohóva direktove Jerusalénpe, péro ohasáva Samáriarupi. Jesús ha idisipulokuéra oikotevẽ peteĩ lugár opyta hag̃ua Samáriape, upémarõ haʼe omondo henonderã mensahéro ikatu hag̃uáicha ojeprepara oñekotevẽva. Péro umi hénte oikuaávo ohoha hikuái Jerusalén gotyo pe areterã, ndojaposéi mbaʼeve hesehapekuéra. Upéva omorrenegaiterei Santiago ha Juánpe ha oporandu hikuái Jesúspe: “Ore Ruvicha, ¿reipotápa rojerure yvágagui hoʼa hag̃ua tata ha tohundi koʼãvape?” (Lucas 9:54). Péro haʼe omongavaju chupekuéra heʼi haguére upéva ha osegínte hikuái iviáhe.

Pe tapére, peteĩ mboʼehára leipegua heʼi Jesúspe: “Mboʼehára, romoirũta mamo rehohápe”. Jesús ombohovái chupe: “Umi aguara oreko haity  ha guyrakuéra yvagapegua oreko hupa. Pe Yvypóra Raʼy katu ndorekói ni moõpa oñenóta oke” (Mateo 8:19, 20). Péicha Jesús ohechauka pe kuimbaʼépe ohasa vaʼerãha heta mbaʼe ijetuʼúva omoirũséramo chupe. Amalisia pe mboʼehára oñemombaʼeguasu ha noĩri dispuésto ojapóvo peichagua sakrifísio. Upéicharõ, iporã ñañeporandu: “¿Añanimápa ajapo oimeraẽ sakrifísio asegi hag̃ua Jesúspe?”.

Ótro kuimbaʼépe katu Jesús heʼi: “Eju chemoirũ”. Ha pe kuimbaʼe heʼi: “Cherejána taha raẽ tañotỹmi che túvape”. Jesús oikuaa mbaʼe situasiónpepa oĩ pe kuimbaʼe, ha ombohovái chupe: “Eheja umi omanóva toñotỹ omanóvape, ha nde tereho emombeʼu opárupi Ñandejára Rréino” (Lucas 9:59, 60). Oiméne pe kuimbaʼe túva nomanói gueteri ajeve haʼe oĩ hína upépe oñemongeta Jesús ndive. Péicha ojekuaa hese noĩriha preparádo omotenonde hag̃ua Ñandejára Rréino.

Osegi aja hikuái iviáhe Jerusalén gotyo, ótro kuimbaʼe heʼi Jesúspe: “Romoirũta che Ruvicha; péro cherejána taha raẽ tajedespedi che rogayguakuéragui”. Jesús ombohovái chupe: “Pe arádo ojagarráva ha upéi omañáva umi mbaʼe ohejávare hapykue gotyo, ndaikatumoʼãi oike Ñandejára Rréinope” (Lucas 9:61, 62).

Umi osegiséva Jesúspe, ojesareko meme vaʼerã pe Rréinore. Peteĩ oaráva nomañáiramo henonde gotyo, isúrko ikarẽmbáta. Térã pe chokokue omboguejýramo ijarádo ha opyta omaña hapykue gotyo, operdéta tiémpo ha noterminamoʼãi itraváho. Péicha avei, peteĩ ojeréva omaña jey umi mbaʼe ohejávare ko múndope, ikatu hína osẽ pe tape ñandeguerahávagui jeikove opaveʼỹvape.