Anwọ oke jọ ze na, Galili Jesu ọ be mae jọ ru iruo odibọgba riẹ, keme etẹe a be mae jọ gaviezọ kẹe vi Judia. U te no ere no, okenọ ọ jọ obọ Jerusalẹm siwi ọzae jọ evaọ Ẹdijala, “ahwo Ju a jẹ gwọlọ iẹe kpe.”—Jọn 5:18; 7:1.

Obọnana o rrọ amara Azie hayo Akpe ọrọ ukpe 32 C.E., yọ Ehaa Iwou-Udhu (hayo Iwou-Owhre) na ọ kẹle no. Edẹ ihrẹ a re ru ehaa na, kẹsena a ve ru okokohọ urirẹ evaọ ẹdẹ avọ eree. A re ru ehaa nana ro ku ezi ivuẹvu na họ, yọ o rẹ jọ etoke oghọghọ gbe uyere-okẹ.

Inievo Jesu nọ a re se Jemis, Saemọn, Josẹf gbe Judas a tẹ be kpakpa Jesu oma nọ: “No etenẹ re who kpobọ Judia.” Jerusalẹm họ oria nọ ahwo a re kpohọ kẹ egagọ evaọ orẹwho na. Ahwo a rẹ vọ Jerusalẹm evaọ etoke ehaa esa nọ a re ru ẹgbukpe na. Inievo Jesu a tẹ ta kẹe nọ: “Ohwo ọ tẹ be gwọlọ nọ ahwo kpobi a riẹe o re ru oware ovo evaọ idhere he. Nọ who bi ru eware nana, dhesẹ omara kẹ akpọ na.”—Jọn 7:3, 4.

Uzẹme na họ, inievo ene Jesu nana a “fi ẹrọwọ họ iẹe he” inọ ọye họ Mesaya na. Ghele na, a gwọlọ nọ o ru iruo igbunu jọ kẹ ogbotu ahwo nọ a te ziọ ehaa na. Rekọ Jesu ọ riẹ oware nọ o rẹ sai noi ze, ọ tẹ ta kẹ ae nọ: “Akpọ na o wo uvumọ ẹjiroro nọ o re ro mukpahe owhai hi rekọ o mukpahe omẹ, keme me bi se isẹri kpahe iẹe inọ iruo riẹ e rrọ muomu. Wha kpobọ ehaa na; me bi kpobọ ehaa nana tao ho keme oke mẹ u ri te ziezi hi.”—Jọn 7:5-8.

Nọ inievo Jesu gbe amọfa a kpobọ ehaa na te unu edẹ jọ no, Jesu avọ ilele riẹ a tẹ lẹlẹ nya, a gwọlọ nọ ahwo a ruẹ e rai hi. A tẹ nya orọ Sameria, ukpenọ a rẹ nya orọ Ethẹ Jọdan nọ ahwo a rẹ mae nya kpohọ Jerusalẹm. Jesu avọ ilele riẹ a gwọlọ oria nọ a rẹ wezẹ evaọ Sameria, fikiere Jesu o te vi ilele riẹ jọ nyae ruẹrẹ oria kpahe. Ahwo ẹwho na a dede i rai rehọ họ fikinọ Jesu o bi kpobọ Jerusalẹm kẹ ehaa ahwo Ju. Eva e tẹ dha Jemis avọ Jọn a tẹ nọ Jesu nọ: “Olori, kọ whọ gwọlọ nọ ma se erae no obọ odhiwu ze te mahe ae no?” (Luk 9:54) Jesu ọ tẹ whọku ae fiki iroro yena nọ e jọ udu rai na, kẹsena a tẹ ruabọhọ erẹ rai na.

Nọ a jọ edhere, okere-obe jọ ọ tẹ ta kẹ Jesu nọ: “Owuhrẹ, me ti lele owhẹ kpohọ oria kpobi nọ whọ be nya.” Jesu ọ tẹ ta kẹe nọ: “Iruakọ i wo ighogho, evra obọ ehru i wo iwou, rekọ Ọmọ ohwo o wo oria nọ ọ rẹ rehọ uzou riẹ kpahe he.” (Matiu 8:19, 20) Ẹme nọ ọ be ta na họ, okere-obe yena ọ te ruẹ uye otẹrọnọ o zihe ruọ olele riẹ. Yọ o wọhọ nọ omorro o be te jọ okere-obe  nana yeri oghẹrẹ uzuazọ utioye na ha. U fo nọ mai omomọvo ọ rẹ nọ omariẹ nọ: ‘Kọ u gine no omẹ eva ze nọ mẹ rẹ jọ olele Jesu?’

Jesu ọ ta kẹ ọzae ọfa jọ nọ: “Jọ olele mẹ.” Ọzae na ọ tẹ ta nọ: “Olori, kẹ omẹ uvẹ tao re mẹ nyai ki ọsẹ mẹ.” Fikinọ Jesu ọ riẹ uyero ọzae na, ọ tẹ ta kẹe nọ: “Jọ enọ i whu no i ki enọ i whu no, rekọ nya re whọ jọ oria kpobi whowho Uvie Ọghẹnẹ.” (Luk 9:59, 60) U muẹro nọ ọsẹ ọzae nana o ri whu hu, keme o hae jọnọ o whu no, ọzae na ọ hẹ sai dikihẹ etẹe bi lele Jesu ta ẹme he. Ọzae na ọ gwọlọ rọ Uvie Ọghẹnẹ karo evaọ uzuazọ riẹ hẹ.

Nọ a nya kẹle Jerusalẹm no, ọzae ọfa jọ ọ tẹ ta kẹ Jesu nọ: “Me ti lele owhẹ, Olori, rekọ kẹ omẹ uvẹ tao re mẹ nyai yere ahwo uviuwou mẹ inọ a jọ tou.” Jesu ọ tẹ ta kẹe nọ: “Ohwo kpobi nọ o kru ẹwhẹ no nọ o re rri eware obemu o te kẹ Uvie Ọghẹnẹ hẹ.”—Luk 9:61, 62.

Ohwo kpobi nọ ọ ginẹ gwọlọ jọ olele Jesu ọ rẹ tẹrovi iruo Uvie na. Nọ ohwo nọ o bi kporo udhu o gbe bi rri obaro ho, oware nọ o bi kporo na o rẹ liọ họ. O te fi ẹwhẹ na họ otọ je rri emu, iruo na e rẹ nyaharo ho. Epọvo na re, ohwo kpobi nọ o rri emu evaọ uyero-akpọ omuomu nana o re kie no edhere nọ o bi su kpohọ uzuazọ ebẹdẹ bẹdẹ na no.