Kwa ĩvinda yĩana ũndũ mũna, Yesũ nĩwatwie kwĩkalanga Kalilii aitavany’a nũndũ andũ ma kĩsio kĩu nĩmendeeaw’a mũno nĩ ũvoo mũseo kwĩ andũ ma Yutia. O na ũndũ ũngĩ watumie ekalanga Kalilii nĩ kana yĩla waĩ Yelusaleme na avosya mũndũ mũthenya wa Savato, ‘Ayuti nĩmambĩĩie kũmantha vyũ ũndũ meũmũaa.’—Yoana 5:18; 7:1.

Ĩvindanĩ yĩu, mboka ya Ivanda (kana, Tũsũmba) nĩyathengeee, na twaĩ mwei wa 9 kana wa 10, mwaka wa 32. Mboka ĩsu yalilikanawa mĩthenya mũonza, na mũthenya wa nyanya kweethĩawa na ũmbano wa mwanya. Yaĩ ĩvinda ya kũtanĩa ngetha mũthyanĩ wa mwaka wa ũĩmi na andũ nĩmatanaa na kũtũnga mũvea.

Ana-a-inyia ma Yesũ, ala nĩ Yakovo, Simoni, Yosevu, na Yutasi, mamwĩie Yesũ atĩĩ: “Uma vaa ũthi Yutia.” Yelusaleme nĩvo vaĩ ĩkalũ na Ayuti moombanĩaa vau kwondũ wa mboka itatũ nene ila syeekawa kĩla mwaka. Ĩvindanĩ yĩu, Yelusaleme yeethĩawa yusĩe andũ. Ana-a-inyia ma Yesũ mamwĩie atĩĩ: “Vaiĩ mũndũ wĩkaa ũndũ kĩmbithĩnĩ na nũkwenda kũmanyĩka nĩ andũ. Ethĩwa nũkwĩka maũndũ aa, ĩyonany’e kwa andũ onthe.”—Yoana 7:3, 4.

Kwa w’o, ana-a-inyia asu ana ma Yesũ ‘mayaĩkĩĩaa’ kana nĩwe Masia. Ĩndĩ o na ũu wĩ o vo, nĩmendaa andũ ala moombanĩte mbokanĩ ĩsu mone Yesũ ayĩka syama. Ĩndĩ nũndũ Yesũ nĩweesĩ mũisyo ũla ũtonya kũmila ameie atĩĩ: “Nthĩ ndĩ na kĩtumi kya kũmũmena, ĩndĩ nĩmenete nũndũ nĩnumasya ũkũsĩ ĩũlũ wayo kana mawĩa mayo nĩ mathũku. Inyw’ĩ ambatai mũthi mbokanĩ, nyie ndiambata kũthi mbokanĩ oyu, nũndũ ĩvinda yakwa yĩinamba kũvika vyũ.”—Yoana 7:5-8.

Mĩthenya yĩana ũndũ mũna kuma ana-a-inyia ma Yesũ mathi vamwe na andũ ala angĩ maendete mbokanĩ ĩsu, Yesũ na amanyĩw’a make nĩmaendie mbokanĩ ĩsu mevithĩte nũndũ mayendaa mayoneka. Mesĩile nzĩanĩ ĩla yĩsĩle Samalia, vandũ va ĩla yesĩlawa mũno yaĩ vakuvĩ na Ũsĩ wa Yolotani. Nũndũ Yesũ na amanyĩw’a make nĩmendaa vandũ va kũthyũmũĩla ndũanĩ ya Samalia, nĩwatũmie amanyĩw’a amwe makavamanthe. Andũ ũtũinĩ ũmwe nĩmaleile kũmathokya yĩla mamanyie kana Yesũ aendete Yelusaleme kwondũ wa mboka ya Kĩyuti. Yakovo na Yoana nĩmathatie mũno na mamũkũlya Yesũ: “Mwĩaĩi, nũkwenda twĩte mwaki ũtheee kuma ĩtunĩ ũmamine?” (Luka 9:54) Yesũ nĩwamakanisye nũndũ wa kwasya ũu, na maendeea na savalĩ.

Me nzĩanĩ, ve mũandĩki ũmwe wamwĩie Yesũ atĩĩ: “Mũmanyĩsya, nĩngũkũatĩĩa kw’onthe kũla wĩthi.” Ĩndĩ Yesũ amwĩie atĩĩ: “Mbĩwa syĩ na maima  na nyũnyi sya yayaya syĩ na ndala, ĩndĩ Mwana wa mũndũ nde na vandũ va ũkomya mũtwe wake.” (Mathayo 8:19, 20) Yesũ oonanasya kana mũandĩki ũsu akakwatwa nĩ mawetu atw’ĩka mũatĩĩi wake. Na veonekana mũandĩki ũsu eew’aa e wa kĩlasi kya ĩũlũ na kwoou ndaĩ esa kũmĩĩsya mawetu asu. Ũu no ũtume kĩla ũmwe witũ ekũlya-ĩ, ‘Nyie nĩyumĩtye mũno wĩana ata kũmũatĩĩa Yesũ?’

O maendete, Yesũ eeie mũndũ ũngĩ atĩĩ: “Ĩthĩwa mũatĩĩi wakwa.” Nake mũndũ ũsu amwĩa: “Mwĩaĩi, nenga mwanya nambe kũthi kũthika ĩthe wakwa.” Nũndũ Yesũ nĩweesĩ mũndũ ũsu nesa, amwĩie: “Eka akw’ũ mathike akw’ũ moo, ĩndĩ we enda ũkatavany’e kw’onthe Ũsumbĩ wa Ngai.” (Luka 9:59, 60) Veonekana ĩthe wa mwanake ũsu ndaĩ mũkw’ũ, nũndũ keka aĩ mũkw’ũ ti laisi mwanake ũsu akethĩwa aĩ vau aineena na Yesũ. Ũu wĩonany’a kana mwanake ũsu ndeeyũmbanĩtye kũvĩtya Ũsumbĩ wa Ngai mbee thayũnĩ wake.

Matheete melekele Yelusaleme, mũndũ ũngĩ amwĩie Yesũ atĩĩ: “Nĩngũkũatĩĩa Mwĩaĩi, ĩndĩ nenga mwanya nambe kũthi ngatianĩe ũvoo na andũ ma mũsyĩ wakwa.” Nake Yesũ amwĩa: “Vaiĩ mũndũ ũkwataa mũlaũ na aisisya maũndũ ala me ĩtina waĩlĩte kwondũ wa Ũsumbĩ wa Ngai.”—Luka 9:61, 62.

Ala mendaa kũtw’ĩka amanyĩw’a ma Yesũ ma w’o no nginya mavĩtye maũndũ ma Ũsumbĩ mbee. Ethĩwa ũla ũkũĩma na mũlau ndaendeeaa kũsisya mbee, nĩ laisi akathyoekya mĩkao. Na aia mũlaũ nthĩ nĩ kana asisye kĩla kĩ ĩtina, wĩa no ũũngame. O ta mũndũ ũsu, ũla ũsiasya ĩtina maũndũnĩ ma nthĩ ĩno nĩ laisi akalulutĩka na aitia nzĩa ĩla ĩelete thayũnĩ wa tene na tene.