Kwa ihinda, Jesu akoretwo agĩtungata mũno thĩinĩ wa Galili, kũrĩa andũ maramũthikĩrĩria wega gũkĩra Judea. Ningĩ, rĩrĩa aarĩ Jerusalemu na akĩhonia mũndũ mũthenya wa Thabatũ, ‘Ayahudi nĩ maambĩrĩirie gũcaria makĩria ũrĩa mangĩmũũraga.’​—Johana 5:18; 7:1.

Rĩu nĩ mweri wa Septemba kana Oktomba mwaka wa 32, na Gĩathĩ gĩa Ithũnũ nĩ gĩkuhĩrĩirie. Gĩkũngũyagĩrũo thikũ mũgwanja, gĩkarũmĩrĩrũo nĩ kĩgomano kĩamũre mũthenya wa kanana. Gĩkũngũĩro kĩu kĩonanagia gũthira kwa ihinda rĩa kũgetha na nĩ mahinda ma gĩkeno kĩnene na gũcokia ngatho.

Ariũ a nyina na Jesu, nĩo Jakubu, Simoni, Jusufu, na Judasi makamwĩra ũũ: “Uma gũkũ ũthiĩ Judea.” Jerusalemu nĩkuo andũ macemanagia nĩ ũndũ wa ũthathaiya. Taũni ĩyo ĩkoragwo ĩiyũire andũ hĩndĩ ya ikũngũĩro ithatũ cia o mwaka. Kwoguo ariũ acio a nyina na Jesu makamwĩra: “Gũtirĩ mũndũ wĩkaga ũndũ o na ũmwe hitho-inĩ akĩenda kũmenyeka nĩ andũ. Angĩkorũo nĩ ũreka maũndũ macio-rĩ, wĩyonanie kũrĩ andũ.”​—Johana 7:​3, 4.

Ũrĩa kũrĩ nĩ atĩ, ariũ acio a nyina na Jesu ‘matironania wĩtĩkio harĩ we’ arĩ we Mesia. No nĩ marenda arĩa megũkorũo gĩkũngũĩro-inĩ mamuone agĩka maũndũ manene. Jesu akĩmenya ũgwati ũrĩa ũrĩ ho, akameera: “Thĩ ndĩrĩ na gĩtũmi gĩa kũmũthũũra, ĩndĩ niĩ nĩ ĩthũũrĩte, tondũ nĩ ndutaga ũira ũmĩgiĩ atĩ ciĩko ciayo nĩ njũru. Inyuĩ ambatai mũthiĩ gĩathĩ-inĩ kĩu; niĩ ndikinyĩte gũthiĩ, tondũ ihinda rĩakwa rĩtirĩ rĩrakinya.”​—Johana 7:​5-8.

Thikũ cigana ũna thutha wa ariũ a nyina na Jesu gũtwarana na gĩkundi kĩa andũ angĩ arĩa marathiĩ kuo, Jesu na arutwo ake magathiĩ matekuonwo nĩ andũ aingĩ. Makagera njĩra ĩrĩa ĩhĩtũkĩire Samaria, handũ ha gũthiĩra ĩrĩa ĩgeragwo kaingĩ hakuhĩ na Rũĩ rwa Jorodani. Makinya Samaria, Jesu na arutwo ake nĩ mekũbatara kũndũ gwa gũikara, kwoguo agatũma andũ mbere nĩguo makahaarĩrie. Andũ gĩcigo-inĩ kĩmwe makaaga kũmanyita ũgeni kana kũmatuga tondũ Jesu erekeire gĩkũngũĩro-inĩ kĩa Ayahudi Jerusalemu. Jakubu na Johana makoria ũũ marakarĩte: “Mwathani, nĩ ũkwenda twĩtie mwaki kuuma igũrũ ũmaniine?” (Luka 9:54) Jesu akamarũnga nĩ ũndũ wa kuuga ũguo, na magathiĩ na mbere na rũgendo.

Marĩ njĩra-inĩ, mwandĩki-Watho ũmwe akeera Jesu: “Mũrutani, nĩ ndĩkũrũmagĩrĩra kũrĩa guothe ũrĩthiaga.” Jesu akamũcokeria atĩrĩ: “Mbwe nĩ irĩ imamo, nacio nyoni cia rĩera-inĩ nĩ irĩ itara, no Mũrũ wa mũndũ ndarĩ handũ ha kũigĩrĩra kĩongo gĩake.” (Mathayo 8:​19, 20) Jesu arenda  kũmuonia atĩ nĩ egũcemania na moritũ atuĩka mũrũmĩrĩri wake. Na kũroneka ti ũndũ mũhũthũ harĩ mwandĩki-Watho ũyũ ũtarĩ mwĩnyihia gwĩtĩkĩra njĩra ĩyo ya ũtũũro. Kwoguo, o ũmwe witũ no eyũrie ũũ: ‘Hihi nĩ ngoragwo ndĩhaarĩirie kũrũmĩrĩra Jesu biũ?’

Jesu akeera mũndũ ũngĩ ũũ: “Tuĩka mũrũmĩrĩri wakwa.” Mũndũ ũcio akoiga: “Mwathani, njĩtĩkĩria nyambe thiĩ ngathike baba.” No Jesu akamenya ũhoro wĩgiĩ mũndũ ũcio, akamwĩra: “Reke akuũ mathike akuũ ao, ĩndĩ wee thiĩ ũkahunjie kũndũ guothe ũhoro wa Ũthamaki wa Ngai.” (Luka 9:​59, 60) No kũhoteke ithe ndakuĩte arĩ o muoyo. Korũo nĩ akuĩte, mũriũ ndangĩrĩ haha akĩaria na Jesu. Mũndũ ũcio ndehaarĩirie kũiga Ũthamaki wa Ngai mbere ũtũũro-inĩ wake.

O maikũrũkĩte njĩra-inĩ merekeire Jerusalemu, mũndũ ũngĩ akeera Jesu: “Mwathani, nĩ ngũkũrũmĩrĩra, no amba ũnjĩtĩkĩrie ngoigĩre andũ a nyũmba yakwa ũhoro.” Jesu akamwĩra atĩrĩ: “Gũtirĩ mũndũ ũnyitĩte mũraũ na akarora indo iria irĩ thutha wagĩrĩire thĩinĩ wa Ũthamaki wa Ngai.”​—Luka 9:​61, 62.

Arĩa marenda gũtuĩka arũmĩrĩri a ma a Jesu no mũhaka maige meciria mao harĩ ũtungata wa Ũthamaki. Mũndũ ũraruta wĩra na mũraũ angĩaga gũikara arorete mbere, mĩtaro ĩrĩa aratema no ĩgonyoke. Angĩamba kũiga mũraũ thĩ nĩguo arore na thutha, wĩra wake nĩ ũgũtigwo na thutha. Ũndũ ũmwe na ũcio, mũndũ wothe ũngĩrora na thutha mũtabarĩre-inĩ ũyũ wa maũndũ, no oime njĩra-inĩ ĩrĩa ĩtongoragia muoyo-inĩ wa tene na tene.