O Yesu se kolo kiayingi kesilanga umbangi muna Ngalili, i mwau o wantu betoma tambulwilanga e nsangu zandi, ke muna Yuda ko. Vava kakala kuna Yerusaleme, Yesu wawuka yakala dimosi muna lumbu kia Vundu. Dianu vo, “Ayuda bayantikidi vanga mawonso kimana bamvonda.”—Yoane 5:18; 7:1.

Eyayi i nsungi a masanza ma mvu wa 32 wa tandu kieto, Nkinzi a Saba (yovo Sudi) ufinamene. O nkinzi wau lumbu nsambwadi uvanganga. I bosi muna lumbu kianana vekalanga yo lukutakanu lwampwena. Nkinzi wau ukembelwanga mu songa vo e salu kia mpat’a nsengo kifokokele muna mvu, i ntangw’a kiese yo vutula matondo kwa Nzambi.

Aleke a Yesu, i sia vo, Yakobo, Simone, Yosefe ye Yuda, banlukisi vo: “Katuka vava, wenda kuna Yuda.” Yerusaleme i mbanza ina Ayuda awonso bekwiza sambidilanga. Muna nsungi a nkinzi mintatu muna konso mvu, Yerusaleme izalanga yo wantu ayingi. Aleke a Yesu bamvovese vo: “Ke vena muntu ko ovangilanga mambu kuna sweki, kele vo ozolele zayakana kwa wantu. Avo mambu mama ovanganga, wiyisonga kwa nza.”—Yoane 7:3, 4.

Aleke a Yesu yau yá “ke bekwikilanga ko” vo yandi i Masia. Kansi owau, bazolele vo Yesu kavanga masivi kimana o wantu bezidi kuna nkinzi bamona mavangu mandi. Yesu wau kabakwidi e vonza kina vo, ubavovese vo: “E nza ke ina ye kuma kia kunumenga ko, mono imengene, kadi isilanga yo umbangi vo mavangu mandi mambi. Oyeno nwenda tomboka kuna lambu; omono ke wau ko itomboka kuna lambu diadi, kadi e ntangw’ame ke yafwene ko.”—Yoane 7:5-8.

Lumbu yakete kaka yavioka, mpangi za Yesu bele kumosi yo nkangu kuna Yerusaleme. Kuna kwalanda, Yesu ye alongoki andi bele kuna sweki, ke bamonekene kwa wantu ko. Bendele mu nzila ya Samaria, vana fulu kia kwendela mu nzila ina wantu awonso bekwendelanga, ina yaviokela vana ndambu a Nkoko a Yodani. Yesu ye alongoki andi fulu kia leka bevava muna Samaria. Dianu vo, otumini wantu benda viti yo kubika e fulu. Muna vata dimosi, o nkangu ke uzolele kubatambula ko, kadi Yesu ku Yerusaleme kekwendanga kuna nkinzi wa Ayuda. Yakobo yo Yoane bafungidi makasi, bayuvuidi Yesu vo: “E Mfumu, nga ozolele vo twalomba o tiya twakulumuka kuna zulu, twabafukis’e?” (Luka 9:54) Yesu ubatumbidi mu kuma kia ngindu zazi, baviokele kwau.

Wau bekwendanga, nsoneki mosi ovovese Yesu vo: “E Nlongi, ikulanda konso kuna okwenda.” Yesu umvutwidi vo: “E mbulu bena ye nduka, e nuni za zulu zina ye nzialwa, kansi o Mwan’a muntu kena ye fulu kasia ntu ko.” (Matai 8:19, 20) Muna mvovo miami, Yesu osongele vo nsoneki ndioyo mpasi kemona avo okitukidi se nlandi a Yesu. Mu kuma kia lulendo, nsoneki ndioyo katondele zingu kia mpila yayi ko. Konso muntu omu yeto olenda kukiyuvula, ‘Nga ndenda vevola zingu kiame muna landa Yesu?’

Yesu ovovese muntu ankaka vo: “Undanda.” Oyandi umvutwidi vo: “E Mfumu, ungiambula ngienda teka zika o se diame.” O Yesu wau kazeye e ntokani za muntu ndioyo, umvutwidi vo: “Yambula mafwa mazika mafwa mau, vo i ngeye, wenda mwanganis’e nsangu za Kintinu kia Nzambi.” (Luka 9:59, 60) O se dia muntu ndioyo wakinu o moyo. Kele vo kayifwila, o mwan’andi kadi zayisa diambu diadi kwa Yesu ko. O mwana ndioyo kena wakubama ko mu sia e Kintinu kia Nzambi va fulu kiantete muna zingu kiandi.

Wau se befinama Yerusaleme, muntu ankaka diaka ovovese Yesu vo: “Ikulanda, e Mfumu, kansi ungiambula ngienda teka kanina awana bena muna nzo ame.” O Yesu umvovese vo: “Ke vena muntu ko osimbidi e nsengo yo tala oku nima, kafwana muna Kintinu kia Nzambi.”—Luka 9:61, 62.

Awana bazolele kala alongoki akieleka a Yesu bafwete sianga e sungididi kiau muna salu kia Kintinu. Avo muntu nkala kewumbanga lembi sia e sungididi muna salu kiandi, e nkala miandi tekama mitekama. Avo oyambwidi e nsengo yo tala kunima, ke wumba nkala miayingi ko. Diau adimosi mpe, konso muntu otalanga kunima omu nza yayi ifwaswa, olenda vengomoka muna nzila ifilanga ku moyo a mvu ya mvu.