Jesu o tšere nako e itšego a dira modiro wa gagwe kudukudu kua Galilea, moo a hweditšego batho ba arabela gakaone go feta kua Judea. Ntle le moo, ge a be a le Jerusalema gomme a fodiša monna ka Sabatha, “Bajuda ba [ile ba] thoma go fagahlela go mmolaya.”—Johane 5:18; 7:1.

Bjale ke lehlabula la ngwaga wa 32 C.E., gomme Monyanya wa Ditaberenakele (goba, Mešaša) o kgauswi. Monyanya wo o ketekwa matšatši a šupago, ke moka wa latelwa ke seboka se sekgethwa letšatšing la seswai. Monyanya wo o swaya go fela ga ngwaga wa temo le gona ke nako ya lethabo le legolo le go leboga.

Bana babo Jesu ka motswadi o tee—Jakobo, Simone, Josefa le Judase—ba a mo kgopela ba re: “Tloga mo o ye Judea.” Jerusalema ke lefelo le legolo la borapedi la nageng yeo. Menyanyeng e meraro ya ngwaga le ngwaga, motse o tlala kudu ka batho. Bana babo Jesu ba a hlalosa ba re: “Ga go motho yo a dirago selo ka sephiring ge a nyaka go tsebja phatlalatša. Ka ge o dira dilo tše, iponagatše go lefase.”—Johane 7:3, 4.

Ge e le gabotse, bana ba babo ba bane ‘ga ba dumele go yena’ e le Mesia. Lega go le bjalo, ba nyaka bao ba bokanego monyanyeng gore ba bone ge a dira mediro e matla. Ge Jesu a lemogile kotsi ye, o ba botša gore: “Lefase ga le na lebaka la go le hloya, eupša le hloile nna, gobane ke le hlatsela gore mediro ya lona ke e kgopo. Lena rotogelang monyanyeng; nna ga ke ešo ka rotogela monyanyeng, gobane nako ya ka e swanetšego ga e ešo ya fihla.”—Johane 7:5-8.

Matšatši a sego kae ka morago ga ge bana babo Jesu ba sepetše le sehlopha sa basepedi, Jesu le barutiwa ba gagwe ba sepela ka sephiring ba sa bonwe ke ba bantši. Ba sepela ka tsela yeo e phatšago Samaria go e na le yeo e tlwaelegilego yeo e lego kgauswi le Noka ya Jorodane. Jesu le barutiwa ba gagwe ba tla nyaka lefelo leo ba ka robalago go lona kua Samaria, ka baka leo o roma baromiwa gore ba yo dira ditokišetšo. Batho ba lefelong le lengwe ba gana go ba amogela goba go amogela baeng ka tsela e tlwaelegilego ka gobane Jesu o lebile Jerusalema bakeng sa monyanya wa Bajuda. Jakobo le Johane ba botšiša ba befetšwe ba re: “Morena, na o nyaka gore re botše mollo gore o fologe go tšwa legodimong o ba fediše?” (Luka 9:54) Jesu o ba kgalemelela go ba le kgopolo e bjalo, ke moka ba tšwela pele ka leeto.

Ge ba le tseleng, yo mongwe wa bamangwalo o re go Jesu: “Morutiši, ke tla go latela kae le kae mo o tlago go ya gona.” Jesu o a araba o re: “Diphukubje di na le melete le dinonyana tša legodimo di na le dihlaga, eupša Morwa wa motho ga a na mo a ka latšago hlogo ya gagwe gona.” (Mateo 8:19, 20) O bontšha gore yo mongwe yo wa bamangwalo o tla lebeletšana le mathata ge a ka ba molatedi wa Jesu. Le gona go bonagala yo mongwe yo wa bamangwalo a ikgogomoša kudu gore a ka amogela tsela ye ya bophelo. Ka gona, yo mongwe le yo mongwe wa rena a ka ipotšiša gore: ‘Na ke ikemišeditše gakaaka’ng go latela Jesu?’

Jesu o botša monna yo mongwe o re: “Eba molatedi wa ka.” Monna yo o a araba o re: “Ntumelele pele ke tloge ke yo boloka tate.” Ka ge Jesu a tseba maemo a monna yo, o re: “Lesa bahu ba boloke bahu ba bona, eupša wena sepela o bolele ka Mmušo wa Modimo gohle.” (Luka 9:59, 60) Go molaleng gore tatagwe ga se a tšwa a hlokofala. Ge nkabe a hlokofetše, morwa wa gagwe nkabe a se mo a bolela le Jesu. Morwa yo ga se a ikemišetša go etiša Mmušo wa Modimo pele bophelong bja gagwe.

Ge ba dutše ba le tseleng e lebilego Jerusalema, monna yo mongwe o botša Jesu o re: “Morena, ke tla go latela, eupša ntumelele pele gore ke ye go šadiša ba ntlo ya ka gabotse.” Jesu o a araba o re: “Ga go motho yo a beilego seatla sa gagwe mogomeng gomme a lebelela dilo tše di lego ka morago, yo a swanelegelago Mmušo wa Modimo gabotse.”—Luka 9:61, 62.

Bao ba nyakago go ba barutiwa ba Jesu ba therešo ba swanetše go tsepamiša mahlo a bona tirelong ya Mmušo. Ge molemi a sa tsepamiše mahlo a gagwe kua pele, go molaleng gore foro e tla kgopama. Ge a ka bea mogoma fase e le gore a lebelele dilo tše di lego ka morago, mošomo wa tšhemong o tla šalela morago. Ka mo go swanago, mang le mang yo a gadimago morago tshepedišong ye ya kgale ya dilo a ka kgopša tseleng e lebišago bophelong bjo bo sa felego.