Jesusqa Galilea provinciapin mastaqa predicasharan. Chaypin runakuna astawan uyarikuqku Judeapi kaqkunamantaqa. Chaymantapas Judeapi runakunaqa ‘payta wañuchiytapuni munasharanku’, juj runata sábado p’unchaypi qhaliyachisqanmantapacha (Juan 5:18; 7:1).

32 watapi ch’ujlla ruway fiestan chayamusharanña. Chay fiestataqa qanchis p’unchaytan ruwaqku, pusaq p’unchaypitaq juj jatun asambleata ruwaqku. Chay fiestawanmi tukuq chajrata watantin llank’ay, chaymi kusikunapaq agradecekunapaq ima chay fiestaqa karan.

Chay fiestaman rinanpaqmi Jesuspa wayqenkuna, Santiago, Simón, José, Judas ima payta niranku: “Judeaman riy, chaypi discipuloykikunapas imakunachus ruwasqaykita rikunankupaq. Pipas llapa runakunaq reqsisqan kayta munaqqa manan imatapas pakallapiqa ruwanchu. Kaykunatataq ruwashanki chayqa, llapa runakunamanyá rikuchikuy”, nispa (Juan 7:3, 4).

Chay wayqenkunaqa ‘manaña paypi iñirankuchu’ chaypas, munasharankun chay fiestaman riqkuna milagrokuna ruwasqanta rikunankuta. Jesusmi ichaqa niran: ‘Runakunaqa manan imamantapas qankunataqa cheqnisunkichismanchu, noqatan ichaqa cheqnikuwanku, sinchi mana allin ruwasqankuta sut’iman orqosqayrayku. Qankunalla riychis; noqaqa manaraqmi riymanchu manaraq tiempoy chayamusqanrayku’, nispa (Juan 7:5-8).

Jinan wayqenkuna ripuqtinku Jesuspas iskay kinsa p’unchaymanta jina discipulonkunawan kuska riran, ichaqa pakallapin riran. Ratolla chayanankupaqmi Samaria ladollantaña rinanku karan, ichaqa necesitanankun karan maypi alojakunankupaq, chaymi Jesusqa wakin discipulonkunata juj aylluman ñaupachiran. Runakunan ichaqa mana chaskiyta munarankuchu, judiokunaq fiestanman rishasqankuta yachasqankurayku. Chaymi Santiagowan Juanwanqa phiñakuypi Jesusta niranku: “Señor, munanki chayqa, niwayku cielomanta ninata uraykachimunaykupaq, chhaynapi kay runakunata rupharunanpaq”, nispa (Lucas 9:54). Jesusmi ichaqa paykunata anyaran.

Purishaqtinkun kamachikuy simita yachachiq runa Jesusta niran: “Yachachikuq, maytaña riqtiykipas qatikusaykin”, nispa. Jesustaq niran: “Atoqkunapas t’oqoyoqmi, alton phawaq animalkunapas q’esayoqmi, runaq Churinpan ichaqa mana kanchu umanta maypi samaykachinallanpas”, nispa (Mateo 8:19, 20). Chaywanmi entiendechisharan paypa qatikuqnin kaspaqa  imaymana sasachakuykuna pasananta. Manachus jina chay runaqa k’umuykukuqchu kanman karan Jesusrayku chaykunata pasananpaqqa. Noqanchisri, ¿imatapas ruwallasunmanchu Jesusta qatikunanchispaq?

Juj runatan Jesusqa niran: “Qatikamuway”, nispa. Chay runataq niran: “Señor, taytaytaraq ñaupaqta p’amparamusaq”, nispa. Chay runaq taytanqa manan wañusqachu kashanman karan, mana chayqa manachá Jesusta chaypi uyarishanmanchu karan. Chay runaqa manan listochu kasharan Diospa munayninta ñaupaqta ruwananpaq. Chaymi Jesusqa niran: “Wañusqakunaña wañupuqninkutaqa p’ampashachunku, qan ichaqa rispa tukuyneqpi willamuy Diospa gobiernonmanta”, nispa (Lucas 9:59, 60).

Chaymantan juj runapas Jesusta nillarantaq: “Señor, qatikusaykin; ichaqa ñaupaqta wasiypi kaqkunataraq ‘ripushanin’ niramusaq”, nispa. Jinan Jesusqa niran: “Pipas aradoman makinta churaspa qhepaman qhawariqqa, manan Diospa gobiernonpaq jinachu”, nispa (Lucas 9:61, 62).

Chhaynaqa, pipas Jesuspa discipulon kayta munaqqa Diospa gobiernonpin tukuy yuyayninta churanan. Imaynan aradowan llank’aqpas qhepata mana qhawaspa llank’anan, chhaynatan Jesuspa discipulonkunapas kay pachapi imaymanakunata mana qhawaspalla Diosta servinanku, mana chayqa, kausayman apaq ñanmantachá pantapunkuman.