Ua umi se taimi o talaʻi Iesu i Kalilaia, lea e sili atu ona talileleia ai o ia e tagata nai lo o Iutaia. A o iai foʻi o ia i Ierusalema ma faamālōlōina se tamāloa i le Sapati, na ʻatili ai ona saʻilia o ia e tagata Iutaia ina ia fasiotia.’—Ioane 5:18; 7:1.

Ua oo nei i se vaitaimi o Setema po o Oketopa i le 32 T.A., ma ua lata i le Tausamiga o Faleapitaga (po o Fale Lauvao). E fitu aso e faamanatuina ai lenei tausamiga. Pe a māeʻa lenā, ona sosoo ai lea ma se isi faatasiga tāua i le aso lona valu. O lenei tausamiga e faailoga ai le seleselega faaiʻu o fua o faatoʻaga, ma o se vaitaimi e matuā olioli ma faafetai ai.

Ua ʻaiʻoi atu ʻafa uso o Iesu o Iakopo, Simona, Iosefa ma Iuta iā te ia: “Ia e tuua lenei mea ae alu atu i Iutaia.” O Ierusalema o le nofoaga autū lea o le tapuaʻiga i le atunuu atoa. Ua matuā faatumulia le aai a o faagasolo tausamiga faaletausaga e tolu. Ua faapea atu ʻafa uso o Iesu: “E leai se tasi na te faia faalilolilo se mea, pe a fia lauiloa o ia. Afai e te faia nei mea, ia faailoa atu oe i le lalolagi.”—Ioane 7:3, 4.

O le mea moni, ʻe lē o faatuatuaina’ e uso e toʻafā o Iesu, o ia o le Mesia. E latou te mananaʻo e vāai tagata o loo iai i le tausamiga, o faia e Iesu ni vavega ofoofogia. Ua silafia e Iesu o se lamatiaga lenei mea, ma ua ia fetalai atu iā i latou: “E leai se mea e ʻinoʻino ai fua le lalolagi iā te outou, a ua ʻinoʻino mai iā te aʻu, auā ua ou molimau i ana galuega leaga. Ia outou ō i le tausamiga; ou te lē alu i le tausamiga auā e leʻi oo i oʻu aso.”—Ioane 7:5-8.

Ua mavae ni nai aso talu ona ō ese atu uso o Iesu ma le ʻaumalaga, ae ō atu faalilolilo loa Iesu ma ona soo. Ua latou ui atu i Samaria, nai lo o le auala e masani ona uia e le toʻatele lea e lata i le vaitafe o Ioritana. A o alu la latou malaga, ua muamua ona aauina atu e Iesu ni avefeʻau e sauniunia ni mea e latou te api ai i Samaria. I se tasi o nuu o Samaria, e leʻi talileleia pe faaali atu iā i latou le agaga talimālō, talu ai o loo agaʻi atu Iesu i Ierusalema mo le tausamiga faa-Iutaia. Ua feita Iakopo ma Ioane ma fesili atu: “Le Alii e, e te finagalo ea ma te fai atu ina ia alu ifo le afi mai i le lagi e faaumatia ai i latou?” (Luka 9:54) Peitaʻi, ua matuā aʻoaʻia i laʻua e Iesu ona o le faia o lenā fesili, ma ua faaauau pea la latou malaga.

A o latou savavali pea i le ala, ua alu atu se tusiupu ma faapea atu iā Iesu: “Le Aʻoaʻo e, ou te mulimuli atu iā te oe i mea uma e te maliu atu i ai.” Ua tali mai Iesu: “E fai lua o alope, e iai foʻi mea e momoe ai manufelelei o le lagi, a o le Atalii o le tagata e leai se mea e moe ai o ia.” (Mataio 8:19, 20) O loo uiga atu lana fetalaiga i faigatā o le a fesagaʻia e le tusiupu, pe a avea o ia ma ona soo. E foliga mai e faamaualuga lenei tusiupu, ma e lē manaʻo e talia lea ituaiga o olaga. O lea, e ao iā i tatou taʻitoʻatasi ona fesili ifo, ʻPo o oʻu lotomalie moni e mulimuli iā Iesu?’

Ua fetalai atu Iesu i le isi tamāloa: “Inā mulimuli mai iā te aʻu.” Ua tali mai o ia: “Tuu mai aʻu seʻi oʻu alu muamua e tanu loʻu tamā.” Ua silafia e Iesu le tulaga o le tamāloa, ma ua ia fetalai atu: “Tuu ai pea ē ua oti e tanu lava e o latou tagata oti, ae ia e alu ma folafola atu le malo o le Atua.” (Luka 9:59, 60) E foliga mai o loo soifua pea le tamā o lenei tamāloa. Pe ana faapea ua maliu lona tamā, semanū e lē o talanoa i lea taimi le tamāloa ma Iesu. Ua faaalia ai i inei, e lē o nofosauni lenei tamāloa e faamuamua le Malo o le Atua i lona olaga.

A o latou latalata atu i Ierusalema, ua faapea atu se isi tamāloa iā Iesu: “Le Alii e, ou te mulimuli atu iā te oe, ae tuu mai aʻu seʻi oʻu alu muamua e faatofā i loʻu aiga.” Ua tali mai Iesu: “O le tagata e tago i le suōtosina ma tepa i tua, e lē tatau o ia mo le malo o le Atua.”—Luka 9:61, 62.

E tatau iā i latou o loo mananaʻo e avea ma soo moni o Iesu, ona taulaʻi atu i le faamuamuaina o le Malo. Pe afai e lē taulaʻi pea i luma se faifaatoʻaga i laina palapala o loo ia eliina, o le a oo ina piʻopiʻo nei laina. Pe afai foʻi e na te tuu i lalo le suōtosina ma tepa i tua, o le a tuai ona māeʻa lana galuega o loo fai. E faapena foʻi se tagata e toe tepa i tua i lenei faiga tuai o mea. O le a oo ina tautevateva o ia, ma lē tumau ai i le ala e taʻitaʻiina atu ai i le ola e faavavau.