Kwaciindi cili mbocibede, bunji bwaziindi Jesu wali kubelekela mu Galilaya, oomo mwaajana bantu banji ibautambula mulumbe kwiinda mu Judaya. Kunze lyaboobo, naakali mu Jerusalemu anaakaponya mwaalumi umwi mubuzuba bwa Sabata, “iba Juda bakatalika kusolekesya kumujaya.”—Johane 5:18; 7:1.

Lino nkuumamanino aacilimo mu 32 C.E., alimwi Pobwe lya Zivwuka lilaafwaafwi. Pobwe eeli litola mazuba aali ciloba, mpoonya litobelwa amuswaangano uusetekene mubuzuba bwalusele. Pobwe eeli ngamamanino aamwaka wabulimi alimwi nciindi cakukondwa kapati akulumba Leza.

Banabokwabo Jesu, nkokuti Jakobo, Simoni, Josefa, alimwi a Juda bamwaambila kuti: “Kozwa kuno uunke ku Judaya.” Munzi wa Jerusalemu ncecisiko cabukombi bwacisi. Ciindi camapobwe otatwe aacitwa mwaka amwaka, munzi ooyu inga ulizwide bantu. Banabokwabo Jesu baamba kuti: “Kunyina muntu uucita zintu cakusisikizya kuti kayanda kuti azyibwe caantangalala. Mbwaanga ucita zintu eezyi, koliyubununa kunyika.”—Johane 7:3, 4.

Mubwini, banabokwabo aaba bone ‘tabamusyomi’ kuti ngo Mesiya. Nokuba boobo bayanda kuti aabo babungene kupobwe bakamubone kacita milimo mipati iigambya. Pele walo Jesu, mbwaanga uliibwene ntenda iiliko, wabaambila kuti: “Inyika inyina kaambo kakumusulaikila, pele mebo ilindisulide nkaambo ndipa bumboni kujatikizya njiyo kuti milimo yanjiyo mibi. Nywebo kamuya kupobwe; mebo tanduunki lino kupobwe eeli, nkaambo ciindi cangu tacinasika cakumaninina.”—Johane 7:5-8.

Nokwainda mazuba aali mbwaabede kuzwa ciindi nobaunka banabokwabo abasilweendo bambi, Jesu abasikwiiya bakwe baunka cakaumuumu, cakutabonwa abantu banji. Batola nzila iidabula kwiinda mu Samariya, muciindi cakubelesya nzila iibelesyegwa abantu banji iili munsi-munsi aa Mulonga wa Jordano. Jesu abasikwiiya bakwe bayandika kwakoona mu Samariya, aboobo watuma batumwa kumbele kuti bakababambile kwakoona. Bantu bamubusena bumwi bakaka kubatambula naa kubasamausya kweelana acilengwa nkaambo Jesu uunka ku Jerusalemu kupobwe lyaba Juda. Kabanyemede, Jakobo a Johane babuzya kuti: “Mwami, sena ulayanda kuti twaambile mulilo uboole kuzwa kujulu kutegwa ubanyonyoone?” (Luka 9:54) Jesu wabakalalila akaambo kakuyeeya kucita cintu cili boobu, kumane bazumanana alweendo lwabo.

Kabeenda munzila, imulembi umwi waambila Jesu kuti: “O Mwiiyi, ndilakutobela kufwumbwa nkoya.” Jesu wamwaambila kuti: “Bamwaaba balijisi malyango abayuni bamujulu balijisi ziteente, pele Mwanaamuntu tajisi aakubikka mutwe wakwe.” (Matayo 8:19, 20) Jesu upandulula kuti imulembi ooyu uyoojana buyumuyumu ikuti naa  waba sikumutobela. Alimwi kulibonya kuti imulembi ooyu ulalisumpula kapati cakuti takonzyi kuyanda buumi bwamusyobo ooyu. Aboobo, umwi aumwi wesu uyandika kulibuzya kuti, ‘Ino ndilisungwide kusika aali kutobela Jesu?’

Kumuntu umbi Jesu waamba kuti: “Koba sikunditobela.” Muntu ooyu waamba kuti: “O Mwami, koleka saansi nduunke ndikaakuzikke bataata.” Mbwaanga ulibuzyi kabotu bukkale bwamuntu ooyu, Jesu wamwaambila kuti: “Kobaleka bafwu bazikke bafwu babo, pele yebo koya ukaambilizye Bwami bwa Leza koonse-koonse.” (Luka 9:59, 60) Kulibonya kuti bausyi muntu ooyu tabafwide pe. Ikuti nobalifwide, takulangilwi kuti mwaanaabo naaliko aano kaambaula a Jesu. Ooyu mwana talibambilide pe kubikka Bwami bwa Leza kumbele mubuumi bwakwe.

Mbobayaabuya munzila kugama ku Jerusalemu, aumbi muntu waambila Jesu kuti: “Ndilakutobela Mwami, pele saansi kondizumizya ndikalaye bamuŋanda yangu.” Jesu wamwaambila kuti: “Kunyina muntu uujatide pulawu pele uulanga zintu zili musyule iweelela kuba mu Bwami bwa Leza.”—Luka 9:61, 62.

Aabo bayanda kuba basikwiiya ba Jesu beni-beni beelede kugamika meso aabo kumulimo wa Bwami. Ikuti muntu uujisi pulawu katagamikide meso aakwe kumbele, muntu ooyo ulakonzya kulima mabbanga naa kupilinganya mufwolo. Ikuti walilekezya pulawu kutegwa alange zintu zili musyule lyakwe, mulimo mumuunda ulakonzya koona. Mbubonya buyo, kufwumbwa muntu uucebukila munsi kulanga zintu zyamubweende bwazintu oobu bwakaindi ulakonzya kulebwa akuzwa munzila iitola kubuumi butamani.