Vokuenda kuotembo yimue, Yesu o talavaya calua vo Galilea, kuna a siata oku kuata onima yiwa okuti vo Yudea ci sule. Momo eci a sakula ulume umue keteke liesambata vo Yerusalãi, “va Yudea va kala oku u sandiliya oco vo ponde.”—Yoano 5:18; 7:1.

Yilo osãi Yenyenye Linene ale Mbalavipembe yunyamo 32 K.K. okuti, Ocipito Colosinge (ale Colombalaka) ca kala ocipepi. Ocipito caco ci tumãla oloneke epanduvali kuenda keteke liecelãla ku lingiwa ohongele yinene. Ocipito caco ci lomboloka esulilo liunyamo woku ungula kuenda epuluvi limue liesanju lialua hailio liolopandu.

Vamanji a Yesu okuti, Tiago, Simono, Yosefe kuenda Yuda, vo lungula hati: “Tunda kulo, kuende vo Yudea.” Omo okuti o Yerusalãi oyo ombala yefendelo vofeka, volupale mu kala omanu valua vokuenda kuovipito vitatu vi lingiwa vunyamo. Vamanji a Yesu va popia vati: “Lomue okuti o yongola oku kũlĩhĩwa lomanu, pole, o linga ovina vuyombeki. Nda ove o linga ovina evi, lilekisa koluali.”—Yoano 7:3, 4.

Ocili okuti vamanji yaco vakuãla va Yesu, ka va ‘lekisile ekolelo kokuaye’ okuti eye Mesiya. Pole, va yongola okuti omanu vana va liongolola kocipito, va mola Yesu oku linga ovikomo vimue. Yesu poku limbuka ohele yaco o va sapuila hati: “Oluali ka lu kuete esunga lioku vu suvuki, pole oluo lua ndi suvuka, momo njimba uvangi wokuti ovilinga vialuo via vĩha. Kuendi kocipito; ame [handi] si endi kocipito caco, momo owola yange handi ka ya pitĩlile.”—Yoano 7:5-8.

Noke yoloneke vimue, eci vamanji a Yesu kumue lomanu vakuavo va tunda volupale, Yesu kumue lolondonge viaye va tunda vuyombeki okuti, ka va muiwa lomanu. Ovo ka va piti ocipepi Lolui Yordão okuti onjila omanu valua va siata oku pita, pole, va endela vonjila yi pita ko Samaria. Yesu kumue lolondonge viaye va ka sukila ocitumãlo cimue coku sikĩla ko Samaria, omo liaco, o tuma olomunga vimue oco vi ka linge esokiyo liaco. Omanu vo vimbo limue, va likala oku va tambula ale oku va yekisa, momo Yesu o kasi oku enda ko Yerusalãi kocipito ca va Yudea. Tiago la Yoano va kuata onyeño yalua, kuenje va pula Yesu vati: “A Ñala, o yongola okuti tu pinga oco kilu ku tunde ondalu okuti yi va nyõla?” (Luka 9:54) Yesu o va pisa kuenje vamamako lungende.

Vonjila, umue ukuavisonehua o sapuila Yesu hati: “Olongisi, ame hu kuama kuosi wenda.” Yesu o tambulula hati: “Olombulu vi kuete alungi kuenda olonjila vi kuete ovianju, pole Mõlomunu ka kuete apa a kapa utue waye.” (Mateo 8:19, 20) Olondaka via Yesu vi lomboloka okuti, ukuavisonehua  o ka liyaka lovitangi nda wa linga ondonge ya Yesu. Citava okuti, ukuavisonehua ka tava kekalo liomuenyo waco omo liepela. Omo liaco, omunu lomunu pokati ketu o pondola oku lipula ndoco: “Ndi kasi hẽ oku likolisilako oku kala ondonge ya Yesu?”

Yesu o sapuila ulume ukuavo hati: “Linga ondonge yange.” Ulume o tambulula hati: “A Ñala, tete ngecelele oco ngende oku ka kenda isiange.” Yesu omo lioku kũlĩha ekalo liulume waco, o popia hati: “Ecelela okuti ovivimbi vi likenda ovio muẽle, pole, kuende ka kunde Usoma wa Suku.” (Luka 9:59, 60) Ocili okuti isiaye handi ka file, momo nda wa file vepuluvi liaco, omõlaco nda ka kaile oku sapela la Yesu. Omõlaco, ka lipongiyile oco a pitise kovaso Usoma wa Suku komuenyo waye.

Osimbu va kala oku loka etapalo oku loña ko Yerusalãi, ulume ukuavo o sapuila Yesu hati: “A Ñala, hu kuama, pole ngecelele tete oku usika epata liange.” Yesu o tambulula hati: “Lomue okuti noke yoku kapa eka liaye kosaluwa o vanja kovina via siala konyima okuti o sesamẽla oku kala Vusoma wa Suku.”—Luka 9:61, 62.

Omanu va yongola oku kala olondonge viocili via Yesu, va sukila oku tiamisila utima kupange Wusoma. Nda ukuakulima ka vanji kovaso, upanga u pondola oku penga. Handi vali, nda o kapa osaluwa posi kuenje o vanja konyima, upange kepia u cilua. Cimuamue haico okuti, omunu wosi o vanja konyima poku tiamisila utima kovina violuali, o pondola oku yapuka vonjila yi tuala komuenyo ko pui.