I fer detrwa lannen depi ki Zezi in batize e en kantite dimoun in tann koz lo li. Plizyer milye Zwif in vwar son bann mirak e zot in koz lo la partou dan pei. Aprezan pandan Lafet bann Latant (oubyen Payot) Zerizalenm, en kantite dimoun pe rod Zezi.

Zot annan diferan lopinyon lo Zezi. Serten i dir: “I en bon dimoun.” Lezot i dir: “Non, i anbet dimoun.” (Zan 7:12) Bokou dimoun i koz lo la o konmansman sa lafet. Par kont, napa personn ki annan kouraz pour koz an byen lo Zezi akoz tou dimoun i per sa ki bann sef Zwif pou fer.

Ler i’n ariv lanmwatye lafet, Zezi i al dan tanp. En kantite dimoun i etonnen avek son fason ansennyen. I pa’n zanmen asiste bann lekol relizye, alor bann Zwif i demande: “Ki mannyer sa zonm i kapab annan en tel konnesans lo Lekritir vi ki i pa’n al etidye dan bann lekol?”​—Zan 7:15.

Zezi i eksplike: “Sa ki mon ansennyen pa sorti kot mwan me kot sa enn ki’n anvoy mwan. Sa ki anvi fer Son lavolonte, pou konnen si sa lansennyman i sorti kot Bondye ouswa si mon pe koz lo mon prop nide.” (Zan 7:16, 17) Lansennyman Zezi i an armoni avek Lalwa Bondye, alor i devret evidan ki i anvi anmenn laglwar lo Bondye me pa lo li menm.

Apre Zezi i dir: “Pa Moiz in donn zot Lalwa? Me personn parmi zot pa obei Lalwa. Akoz zot anvi touy mwan?” Serten dan lafoul, petet bann ki pe vizite sorti an deor lavil, pa konnen ki tousala pe arive. Zot pa kapab konpran akoz en dimoun ti pou anvi touy en ansenyan parey li. Alor, zot mazinen ki i bezwen annan en keksoz mal avek Zezi pour li dir sa. Zot dir: “Ou posede par en demon. Lekel ki oule touy ou?”​—Zan 7:19, 20.

Anfet, enn an edmi pase bann sef Zwif ti anvi touy Zezi apre ki i ti’n geri en zonm zour Saba. Aprezan Zezi i servi en rezonnman pour fer zot reflesir e montre ki sa ki zot pe dir pa rezonnab. I dir ki dapre Lalwa, en pti garson i devret ganny sirkonsi wityenm zour apre son nesans, menm si sa i tonm en zour Saba. Apre i demande: “Si en garson i kapab ganny sirkonsi zour saba pour ki Lalwa Moiz pa ganny kase, akoz zot sitan ankoler avek mwan parski mon’n geri en zonm zour saba? Aret ziz par laparans, me ziz avek lazistis.”​—Zan 7:23, 24.

Bann dimoun ki reste Zerizalenm e ki konnen ki pe arive, i dir: “Li menm li sa zonm ki zot pe rod touye, non? Me gete! la i la pe koz an piblik e zot pa dir li nanryen. Eski vreman bann sef in rekonnet ki li menm li Kris?” Alor akoz bann dimoun pa krwar ki Zezi i Kris? Zot dir: “Nou konnen kot sa zonm i sorti, pourtan ler Kris i vini, personn pa pou konnen kot i sorti.”​—Zan 7:25-27.

Lanmenm la dan tanp, Zezi i reponn: “Zot konn mwan e zot konnen kot mon sorti. Mon pa’n vin lo mwan menm me sa Enn ki’n anvoy mwan i reel e zot zot pa konn li. Mon konn li akoz mon son reprezantan e Li ki’n anvoy mwan.” (Zan 7:28, 29) Ler bann dimoun i tann sa, zot esey tyonbo Zezi, swa pour met li dan prizon oubyen pour touy li. Par kont, zot pa reisi tyonbo li parski i pa ankor ariv ler pour Zezi mor.

Kantmenm sa, i toutafe normal ki en kantite dimoun i annan lafwa dan Zezi. I’n mars lo  delo, kalmi divan, fer mirak pour donn plizyer milye dimoun manze avek zis detrwa dipen ek pwason, geri bann malad, fer bann bwate marse, fer bann aveg vwar kler, geri bann ki annan lalep e menm resisit bann dimoun ki’n mor. Zot annan rezon demande: “Ler Kris i vini, i pa pou fer plis mirak ki sa zonm in fer, non?”​—Zan 7:31.

Ler bann Farizyen i tann lafoul pe dir sa bann keksoz, bann Farizyen ek sef pret i anvoy bann zofisye pour aret Zezi.