Sa kilai levu sara o Jisu me tekivu mai na siga e papitaiso kina. Vica vata na udolu na Jiu era raica na nona cakamana qai teteva na vanua taucoko na itukutuku ni nona cakacaka. Levu gona era mai vaqarai koya ena Soqo ni Valevakacevaceva (se Valetabanikau) e Jerusalemi.

E duidui nodra rai me baleti Jisu na lewenivanua. Eso era kaya: “E tamata vinaka.” Eso tale era kaya: “Sega, e vakacalai ira voli ga na lewenivanua.” (Joni 7:12) Levu na veivosaki va qori e caka ni se qai tekivu na soqo. Ia e sega ni dua e doudou me vosa e matanalevu ena vuku i Jisu, nira rerevaki ira na nodra iliuliu na Jiu.

Ni sa vakacagau tiko na soqo, e gole yani o Jisu ena valenisoro. Era kurabui e levu ena totoka ni nona veivakavulici. Ni sega mada ga ni vuli ena nodra koronivuli na rapai, era veinanuyaka gona na Jiu: “E kila mai vei na tamata qo na iVolatabu, ni sega mada ga ni vuli ena kena koronivuli!”—Joni 7:15.

E tukuna o Jisu: “E sega ni noqu na ka au vakavulica, e nei koya ga e talai au mai. Ke dua e via cakava na loma ni Kalou, ena kila se vu vakalou na noqu ivakavuvuli seu tukuna tiko ga na ka au nanuma.” (Joni 7:16, 17) Ni salavata kei na Lawa ni Kalou na ivakavuvuli i Jisu, e sega kina ni vaqara rogo, e vakalagilagia ga na Kalou.

Sa qai tukuna o Jisu: “E solia vei kemuni o Mosese na Lawa, se cava? Ia e sega ni dua vei kemuni e muria na Lawa. Na cava oni via vakamatei au kina?” Era lecava eso na vulagi era maliwai ira tiko na ilala levu na nodra sasaga na meca i Jisu. Era sega ni vakabauta ni dua ena via vakamatea na qasenivuli va ya. Nira rogoca gona na ka e tukuna o Jisu, era nanuma ni dua na ka e leqa vua. Era kaya: “E curumi iko tiko na timoni. O cei e via vakamatei iko?”—Joni 7:19, 20.

Ena dua veimama na yabaki yani e liu, era via vakamatei Jisu na nodra iliuliu na Jiu ni vakabula e dua na tagane ena Siga ni Vakacecegu. E cavuta sara e dua na ivakaraitaki e vakavure vakasama qai vakavotui kina nodra yalodredre. A vakamacalataka ni vakaroti ena Lawa mera cilivi na gonetagane lalai ena ikawalu ni siga ni nodra sucu, ke donuya mada ga na Siga ni Vakacecegu. Sa qai tarogi ira: “Ke cilivi e dua na tagane ena siga ni vakacecegu me muri kina na Lawa e vola o Mosese, na cava oni qai cudruvi au kina niu vakabula e dua na tagane ena siga ni vakacecegu? Ni kua ni vakalewa na ka ena kena irairai ga e sau, ia moni lewa ga vakadodonu.”—Joni 7:23, 24.

Era kaya na lewe i Jerusalemi era kila vinaka na ituvaki: “E sega ni tagane qo era vaqara tiko [na iliuliu] mera vakamatea? Ia raica! E vosa tiko e matanalevu, era sega ni tukuna vua e dua na ka. Vakacava, era se sega ni vakadeitaka na iliuliu ni o koya ga qo na Karisito?” Era rairai sega ni vakabauta na lewenivanua ni o Jisu na Karisito, era kaya: “Eda kila na vanua e lako mai kina na tagane qo, ia ni lako mai na Karisito, e sega ni dua ena kila na vanua e lako mai kina.”—Joni 7:25-27.

Sa qai sauma o Jisu ena valenisoro: “Oni kilai au kei na vanua au lako mai kina. Au sega ni lako mai ena noqu lewa ga, ia e bula dina o koya e talai au mai, oni sega ni kilai koya. Au kilai koya niu matataki koya, ni o koya ga e talai au mai.” (Joni 7:28, 29) Era mani via vesuki koya me bala i valeniveivesu se me vakamatei. Ia e sega ni yaco na lomadra ni se bera na gauna me mate kina.

Ia e levu era vakabauti Jisu. E dodonu ga mera cakava qori ni sa taubale e delaniwai, vakaruruya na cagi, vakani ira vakacakamana  na vica vata na udolu ena vica ga na madrai kei na ika, vakabulai ira na tauvimate, era lako rawa na lokiloki, era rai na mataboko, vakabulai na vukavuka, e vakaturi ira mada ga na mate. Io, sa rauta mera taroga: “Ni yaco mai na Karisito, vakacava ena levu na nona cakamana ni vakatauvatani kei na tagane qo?”—Joni 7:31.

Nira rogoca na Farisi na ka era tukuna qori na ilala levu, era duavata sara kei ira na iliuliu ni bete mera talai ira na ovisa mera vesuki Jisu.