Iesu ia bapatiso negana amo, taunimanima momo be ia idia diba. Iuda taudia tausen momo ese iena hoa karadia idia itaia, bona ena gaukara ena sivarai be gabu ibounai dekenai idia kamonai. Ierusalema ai Ruma Maragidia o Au Raurau Rumadia Ena Aria ai, momo be Iesu idia tahua.

Momo be Iesu dekenai lalohadai idauidau idia abia. Haida idia gwau: “Ia be tau namona.” Ma haida idia gwau: “Lasi, ia ese taunimanima ia hakaua kerere.” (Ioane 7:12) Aria ia matamaia neganai, momo be unai idia herevalaia. To Iuda gunalaia taudia idia gari henia dainai, taunimanima vairanai Iesu totona idia hereva lasi.

Aria ia matamaia murinai, Iesu be dubu helaga dekenai ia ginidae. Taunimanima momo be ena hahediba dalana dekenai idia hoa. Ia be rabi taudia edia sikuli ta dekenai ia lao lasi, unai dainai Iuda taudia idia henanadai: “Inai tauna be sikuli ta dekenai ia lao lasi, to edena bamona iena diba Toretore Helagadia dekenai be bada?”​—Ioane 7:15.

Iesu ia gwau: “Lau hadibaia gaudia be lau amo lasi, to lau ia siaia tauna amo. Bema ta ia ura Dirava ena ura ia karaia, ia be do ia diba bema lau hadibaia herevadia be Dirava amo eiava lau sibona egu lalohadai lau gwauraia.” (Ioane 7:16, 17) Iesu ena hahediba herevadia be Dirava ena Taravatu hegeregerena, unai ese ia hahedinaraia ia ura taunimanima ese Dirava ena ladana idia hanamoa, to ena ladana lasi.

Iesu ma ia gwau: “Mose ese umui dekenai Taravatu ia henia, ani? To umui ese unai Taravatu umui badinaia lasi. Dahaka dainai dala umui tahua noho lau umui hamasea totona?” Hutuma huanai haida be reana Ierusalema siti murimuri amo idia mai, bona unai idia diba lasi. Idia laloa ta be unai lalohadai do ia abia lasi, badina Iesu be hadibaia tauna namona. Unai dainai idia laloa reana Iesu be ia laloa namonamo lasi bona unai ia gwauraia. Idia gwau: “Demoni be oi lalonai ia noho. Daika ia ura oi ia hamasea?”​—Ioane 7:19, 20.

To momokani, lagani ta mai kahana gunanai, Sabati dinana ai Iesu be tau ta ia hanamoa neganai, Iuda gunalaia taudia idia ura ia idia hamasea. Edia lalohadai kererena hahedinaraia totona Iesu ese lalona veria herevana ta ia gwauraia. Ia gwau, Taravatu henunai, beibi merona be dina namba 8 ai ena kopina idia utua, herevana ia be Sabati dinana. Bena ia henanadai: “Bema sabati ai tau ta ena kopina umui utua, badina umui ura Mose ena Taravatu umui badinaia, vadaeni dahaka dainai lau dekenai umui badu dikadika badina sabati ai gorere tauna ta lau hanamoa? Namo lasi ta ena toana amo ia umui hahemaoro henia, to mai maoromaoro ida ia umui hahemaoro henia.”​—Ioane 7:23, 24.

Unai hekwakwanai idia diba Ierusalema taudia haida idia gwau: “Idia ura hamasea tauna be inai, ani? To itaia, ia be taunimanima vairanai ia hereva noho ma ia dekenai gau ta idia gwauraia lasi. Lohia taudia idia diba momokani inai tauna be Keriso, a?” Dahaka dainai taunimanima idia abia dae lasi Iesu be Keriso? Idia gwau: “Inai tauna ia mai gabuna ita diba. To Keriso ia mai neganai, tau ta be do ia diba lasi ia be edena gabu amo.”​—Ioane 7:25-27.

Dubu Helaga ai, Iesu ese ia haere henidia: “Umui be lau umui diba bona lau mai gabuna danu umui diba. Bona lau be sibona egu ura dainai lau mai lasi, to lau ia siaia Tauna be ia noho momokani, bona umui be ia umui diba lasi. Lau be ia lau diba, badina lau be ena gwaukau tauna bona Ia ese lau ia siaia.” (Ioane 7:28, 29) Unai hereva idia kamonai neganai, idia ura  ia idia dogoatao, unai amo dibura ruma ai do idia atoa eiava do idia hamasea. To, unai ia vara lasi badina Iesu ena mase negana be do lasi.

To momo be Iesu idia abidadama henia, bona unai idia karaia be maoro. Ia be ranu latanai ia raka, lai gubana ia hadokoa, hoa dalanai paraoa bona gwarume haida amo hutuma ia ubua, gorere, aena dika, bona lepera taudia ia hanamoa, matakepulu taudia edia matana ia kehoa, bona mase taudia ia hatorea isi lou. Oibe, badina maorona dainai idia gwau: “Keriso ia ginidae neganai, ia be toa karadia momo do ia karaia. Inai tauna be unai bamona ia karaia noho, ani?”​—Ioane 7:31.

Farisea taudia idia kamonai hutuma be unai idia hereva neganai, idia bona hahelaga taudia ese ofesa taudia idia siaia Iesu idia dogoatao totona.