Jesus udah nyadi tebilang beberapa taun pengudah iya dibaptisa. Beribu iku orang Judah udah meda Jesus ngereja pengawa ti luar biasa, lalu riput pasal pengawa iya udah ngelekai ngagai serata endur. Nyadi, mayuh orang ngiga Jesus maya Pengerami Belangkau ba Jerusalem.

Orang mayuh bisi runding ti enda sama pasal Jesus. Bisi sekeda orang madahka: “Iya orang ti manah.” Tang sida ke bukai madahka: “Ukai. Iya nesatka orang mayuh.” (John 7:12) Sida betelai enggau pangan diri bejakuka Jesus maya pengerami nya. Tang nadai orang berani bejaku pasal Jesus enggau nyawa ti inggar laban sida takutka bala tuai pengarap orang Judah.

Kira-kira ba hari keempat pengerami nya, Jesus datai ba Rumah Sembiang. Mayuh orang alit ati pasal chara Jesus ngajar. Ketegal Jesus ukai orang ke bepelajar, orang Judah madahka: “Iya nadai kala ngagai sekula jalai pengarap. Nyadi baka ni ku iya tau bisi mayuh penemu pasal Bup Kudus?”—John 7:15.

Ku Jesus madah ke sida: “Utai ke diajar aku ukai datai ari aku, tang ari Iya ke ngirumka aku. Barang sapa ke ingin deka ngereja peneka Petara, tentu deka nemu sekalika utai ke diajar aku nya datai ari Petara tauka ari aku empu.” (John 7:16, 17) Ajar Jesus sejalai enggau Adat Petara. Nya alai, tu nunjukka iya deka meri mulia ngagai Petara, ukai ngagai diri empu.

Udah nya Jesus madahka: “Endaka Moses udah meri kita Adat? Tang nadai siku pan ari kita ke nitihka Adat nya. Nya alai, nama kebuah kita deka munuh aku?” Sekeda orang ba dia datai ari endur bukai. Nyadi, sida enda nemu bisi orang deka munuh Jesus. Ketegal Jesus pengajar ti manah, sida tusah deka pechaya bisi orang deka munuh iya. Nya alai, sida ngumbai bisi utai ti enda betul pasal Jesus. Nyadi, sida madahka: “Nuan dirasuk melikat ti jai. Sapa ke deka munuh nuan?”—John 7:19, 20.

Kebendar iya kira-kira setaun setengah sebedau nya, tuai pengarap orang Judah deka munuh Jesus laban iya ngeraika siku lelaki maya Hari Sabat. Nyadi, Jesus nyebut utai ke ngasuh sida berunding, sereta nunjukka runding sida enda masuk akal. Jesus madahka Adat Petara ngasuh anak mit lelaki disunat ba hari ti kelapan. Lalu pengawa nya enda tau enda dikereja taja pan hari nya Hari Sabat. Udah nya Jesus nanya: “Enti orang disunat maya Hari Sabat ngambika enda ngelanggar Adat Moses, nama kebuah kita balat ringat ngagai aku laban aku ngasuh orang nyadi amat-amat gerai maya Hari Sabat? Badu agi ngakim beduduk ba utai ke dipeda, tang akim meh orang enggau lurus.”—John 7:23, 24.

Orang ke diau ba Jerusalem ke nemu pasal situasi nya madahka: “Endaka iya tu orang ke deka dibunuh sida [bala ketuai]? Peda! Iya benung bejaku ba mua orang mayuh, tang sida nadai nyebut nama-nama ngagai iya. Kada enda bala ketuai kitai udah nemu iya endang Kristus?” Nama kebuah orang mayuh enda pechaya Jesus nya Kristus? Sida madahka: “Kitai nemu ari ni penatai orang tu. Tang lebuh Kristus datai, nadai orang nemu ari ni penatai iya.”—John 7:25-27.

Ku Jesus nyaut sida: “Kita ngelala aku, lalu nemu ari ni penatai aku. Aku enda datai nitihka peneka aku empu. Iya ke ngirumka aku amat bisi, tang kita enda ngelala Iya. Aku ngelala Iya,  laban aku pengari Iya, lalu Iya meh ke ngirumka aku.” (John 7:28, 29) Ketegal utai ke disebut Jesus, orang ngiga peluang deka nangkap iya. Sida engka deka ngejil tauka munuh iya. Taja pia, sida enda mujur laban maya Jesus mati bedau datai.

Tang ba maya ti sama, mayuh orang arapka Jesus ketegal iya ngereja mayuh pengawa ti luar biasa. Iya kala bejalai ba atas ai, neduhka ribut, meri makai beribu iku orang ngena beberapa iti tuku roti enggau beberapa iku ikan, ngeraika orang ke sakit, ngasuh orang ke pinchat bejalai, ngeraika orang ke buta enggau orang ke sakit lan, sereta ngidupka baru orang ke udah mati. Nya kebuah sida nanya: “Lebuh Kristus datai, ulih iya ngaga mayuh agi kereja ajih ari orang tu?”—John 7:31.

Lebuh orang Parisi ninga orang mayuh nyebut munyi nya, sida enggau bala ketuai imam ngasuh bala jejaga nangkap Jesus.