Yesu wayile bingi nkuwa mu myaka yalondejilepo kufuma kimye kyo abatizhiwe. Bayudea bavula bamwene bya kukumya byo aubile ne nkuwa ya mingilo yanji yakumbene kyalo kyonse. Bantu bakonkene ku Kijiilo kya Matente (nangwa’mba kya Mimba) mu Yelusalema, bakebelenga kumumona.

Bantu baambilenga bintu byapusana pusana pe Yesu. Bamo baambilenga’mba: “Ke muntu wawama bingi.” Bakwabo nabo amba: “Kechi wawama ne. Utwala bantu mungi.” (Yoano 7:12) Bantu baambilengapo bingi pe aye pa oa moba atanshi a kijiilo. Pano bino, kafwako waambilengapo pe Yesu pa mvula bantu ne. Mambo bantu bachiinenga bantangi ba Bayudea.

Kijiilo byo kyajinga pepi na kupwa, Yesu watwelele mu nzubo ya Lesa. Bantu bavula bakuminye bingi pa kumvwa byo afunjishishenga. Yesu kechi watainwepo ku masukulu a balabi ne. Onkao mambo, Bayudea bakuminye bingi ne kwamba’mba: “Nanchi uno muntu wayuka byepi Binembelo saka abujile kuyapo ku masukulu?”—Yoano 7:15.

Yesu walumbulwile’mba: “Byo mfunjisha kechi byami ne, bino bya yewa wantumine. Umvwe muntu ukeba kuba kyaswa muchima wa Lesa, ukayuka umvwe byo mfunjisha bifuma kwi Lesa nangwa ñambatu milanguluko yami.” (Yoano 7:16, 17) Yesu walondelanga mizhilo ya Lesa pa kufunjisha, onkao mambo, wakebelenga lukumo lwa Lesa kechi kwitumbijika aye mwine ne.

Yesu wibashikishe’mba: “Nanchi Mosesa kechi wimupele Mizhilo nenyi? Bino kafwako nangwa umo mwi anweba ukookela Mizhilo ne. Mambo ka o mubena kukebela kungipaya?” Bantu bajinga mu jibumba, kampe bajinga benyi baishile ku kijiilo kechi bayukile’mba bakeba kumwipaya ne. Balangulukilenga’mba kechi kyakonsheka kwipaya mufunjishi wawama ne. Onkao mambo, balangulukile’mba Yesu kechi ujitu bulongo pa kuba’mba alangulukenga kintu kya uno mutundu ne. Jibumba jamukumbwile’mba: “Obewa uji na ndemona. Ñanyi ubena kukeba kukwipaya?”—Yoano 7:19, 20.

Bantangi ba Bayudea bakebelenga kwipaya Yesu panyuma ya kubuka muntu pa juba ja Sabado saka papita kala ne mwaka umo ne kichika. Onkao mambo, Yesu wasolwele byajinga mu michima yabo yatama kupichila mu kwambapo bintu bimo. Waambile kuba’mba, kwesekana na Mizhilo ya Mosesa, mwana wa mulume bamutwalanga ku mukanda pa juba ja butanu na busatu nangwa ajo juba jajinga ja Sabado. Kepo aipwizhe’mba: “Umvwe muntu bamutwala ku mukanda pa juba ja sabado kuba’mba Mizhilo ya Mosesa ibule kuzhilululwa, nanchi mwanzhingijila amiwa na mambo a kuba nabukile muntu pa juba ja sabado nyi? Kilekai kutalanga ku bilungi pa kuchiba mambo, pakuba chibilainga mambo monka mo aolokela.”—Yoano 7:23, 24.

Bangikazhi ba mu Yelusalema bayukile kino, bamushikishe’mba: “Nanchi uno kechi ye muntu ye babena kukeba kwipaya [bantangi] nenyi? Pano talai! ubena kwamba pa mvula bantu, kabiji kafwako kyo bamubapo ne. Nanchi bantangi bashiinwa’mba uno ye Kilishitu nyi?” Pano mambo ka bantu o babujile kwitabila kuba’mba Yesu ye Kilishitu? Kabiji baambile’mba: “Pakuba atweba twayuka kwafuma uno muntu; bino Kilishitu byo akeya, kafwako ukayuka ko akafuma ne.”—Yoano 7:25-27.

Byo afunjishenga mu nzubo ya Lesa, Yesu wakumbwile’mba: “Anweba mwangyuka, kabiji mwayuka ne ko nafuma. Kechi neishijile ami mwine ne, bino awa wantumine wa kine, kabiji anweba kechi mwamuyuka ne. Amiwa namuyuka mambo yami namwimenako, ne aye ye wantuma.” (Yoano 7:28, 29) Byo baumvwine kino bakebele kumukwata kampe ne kumutaya mu kaleya nangwatu kumwipaya. Bino bakankelwe mambo kechi kyafikile kimye kya kuba’mba Yesu afwe ne.

Nangwa byonkabyo, bavula bamwitabijile Yesu. Waendele pa mema, wakainye luvula, wajishishe  bantu mu jishinda ja kukumya na bashikwa bacheche ne masabi, wabukile bakolwa, walengejile bilema kwenda, walabishe meso a bampofu, wabukile bambumba ne kusangulatu bafu. Onkao mambo kyokyo baipwizhe’mba: “Umvwe Kilishitu waiya, nanchi ukoba biyukilo byakila byaubapo uno muntu nyi?”—Yoano 7:31.

Bafaliseo byo baumvwine jibumba na kwamba bino bintu, abo ne bañanga bakatampe batumineko bakapaso amba bakakwate Yesu.