Anthu azinji adziwa pya Yezu kutomera pa ndzidzi udabatizwa iye. Ayuda azinji aona Yezu mbakacita pirengo, pontho anthu azinji a mizinda yakutali abva pinthu pidacita Yezu. Natenepa, pa Phwando ya Misasa ku Yerusalemu anthu azinji akhafuna kakamwe kumuona.

Anthu anewa akhali na maonero akusiyana thangwi ya Yezu. Anango akhalonga: ‘Iye ndi munthu wadidi.’ Anangombo akhalonga: ‘Iye asanyengeza anthu.’ (Juwau 7:12) Mafala anewa alongwa makamaka pa ntsiku zakutoma za phwando. Mbwenye pa ndzidzi unoyu nee munthu m’bodzi akhali na cipapo toera kutsidzikiza Yezu thangwi anthu akhagopa atsogoleri Aciyuda.

Mu ndzidzi wa phwando, Yezu aenda mu Templo. Anthu azinji adzuma thangwi Yezu akhapfundzisa mwadidi kakamwe, pontho mwaluso. Nakuti iye nee apfundza maxikola Acirabhi, Ayuda abvundzika: ‘Munthu uyu nee aenda kapfundza kuxikola. Mphapo asakwanisa tani kudziwa mwadidi pya Malemba?’—Juwau 7:15.

Natenepa, Yezu aapanga: ‘Pinapfundzisa ine si pyanga tayu, mbwenye ndi pya ule adandituma. Khala munthu asafuna kucita pinafuna Mulungu, munthu unoyu anadziwa khala pinapfundzisa ine pisabuluka kuna Mulungu, peno ndisalonga pinanyerezera ine.’ (Juwau 7:16, 17) Pinthu pikhapfundzisa Yezu pikhabverana na pikhali mu Mwambo wa Mulungu. Na thangwi ineyi pikhaonekeratu pakweca kuti Yezu akhafuna kuti anthu alemedze Mulungu tayu iye.

Buluka penepo, Yezu alonga: ‘Kodi Mose nee akupasani Mwambo? Mbwenye nee m’bodzi wa imwe asabvera Mwambo. Mphapo thangwi yanji musafuna kundipha?’ Anthu anango pakati pa mwinji, panango alendo adabuluka madziko anango nee akhadziwa kuti alipo akhafuna kupha Yezu. Iwo nee akhapibvesesa thangwi yanji Ayuda akhafuna kupha mpfundzisi wadidi kakamwe. Natenepa, anthu anewa akhanyerezera kuti Yezu nee ali mwadidi. Na thangwi ineyi iwo alonga: ‘Iwe uli na dimonyo. Mbani anasaka kukupha?’—Juwau 7:19, 20.

Caka cibodzi na hafu nduli, atsogoleri Aciyuda akhafuna kupha Yezu pidawangisa iye munthu m’bodzi pa ntsiku ya Sabudu. Pidakumbuka iye pyenepi, Yezu alonga nkhani inango toera kupangiza kuti atsogoleri auphemberi akhali na manyerezero akuphonyeka. Iye alonga pidalembwa mu Mwambo kuti mwana wamamuna angabalwa akhafunika kusidzwa pa ntsiku yacisere ngakhale ntsiku ineyi ingakhala Sabudu. Buluka penepo, iye aabvundza: ‘Khala imwe musasidza munthu pa ntsiku ya Sabudu toera mukhonde kuswa Mwambo wa Mose, thangwi yanji mwaipirwa kakamwe na ine pidawangisa ine munthu pa ntsiku ya Sabudu? Lekani kutonga mwakubverana na maonekero akunja, mbwenye tongani mwaulungami.’—Juwau 7:23, 24.

Anthu a mu Yerusalemu akuti akhadziwa kuti Ayuda asafuna kupha Yezu, alonga: ‘Kodi munthu uyu nee ndiye anasaka iwo toera kumupha? Mbwenye onani, iye akulonga pakweca, nkhabe cinthu cinalonga iwo kuna iye. Kodi atsogoleri athu asanyerezerambo kuti mwandimomwene iye ndi Kristu?’ Mphapo, thangwi yanji anthu anewa nee akhakhulupira kuti Yezu ndi Kristu? Thangwi iwo akhalonga: ‘Ife tisadziwa kudabuluka munthu uyu; mbwenye Kristu angabwera, nkhabe munthu anafuna kudziwa kudabuluka iye.’—Juwau 7:25-27.

Mu ndzidzi ukakhala iye mu Templo, Yezu atawira: ‘Imwe musandidziwa, pontho musadziwa kudabuluka ine. Ine nee ndabwera ninga munafunira ine, mbwenye Ule adandituma ndi wandimomwene, imwembo nkhabe kundziwa. Ine ndisandziwa, thangwi ndine muimiriri wace, Iye ndiye adandituma.’ (Juwau 7:28, 29) Thangwi ya mafala ace akubveka mwadidi, anthu anyerezera pya kuphata Yezu toera kumuikha n’kaidi peno toera kumupha. Mbwenye pikhanyerezera iwo pyacimwanika thangwi ndzidzi toera Yezu aphiwe nee ukhadafika.

 Anthu azinji akakhulupira Yezu. Iwo akankhulupira thangwi iye afamba padzulu pa madzi, amatamisa condzi, mwacirengo adyesa anthu azinji na mikate yakucepa pabodzi na ntsomba, awangisa atenda, awangisa anyakulamala, afungula maso a maboliboli, awangisa anyamatanya, pontho alamusa anthu akufa. Natenepa anthu anewa akhali na mathangwi adidi toera kubvundza: ‘Kodi Kristu angabwera anadzacita pirengo pizinji kupiringana pinacita munthu uyu?’—Juwau 7:31.

Pidabva Afarisi kuti anthu akulonga pya Yezu, iwo na akulu a anyantsembe atuma anyakuonera toera akaphate Yezu.