Benɛ Gbasisihimi Nyami ɔ ngɛ nɔ yae ɔ, Yesu ya nɔ nɛ e hi Yerusalem. E bua jɔ kaa ‘nihi babauu he lɛ ye.’ Se jami hɛ mi nyɛɛli ɔmɛ lɛɛ a bua jɔɛ. A tsɔ nihi nɛ a tsuɔ ní kaa Yuda bi a jami ɔ mi polisihi konɛ a ya nu lɛ. (Yohane 7:31, 32) Se Yesu yi mɛ gbeye, nɛ e laa we e he. Mohu ɔ, e ya nɔ nɛ e tsɔɔ ní ngɛ magbɛ nɔ.

Benɛ Yesu ngɛ ní tsɔɔe ɔ, e de ke: “E piɛ be bɔɔ pɛ nɛ i kɛ nyɛ maa hi si, kɛkɛ ma kpale kɛ ho nɔ nɛ tsɔ mi ɔ ngɔ ya. Nyɛ ma hla mi, se nyɛ be mi nae; ejakaa he nɛ i yaa a, nyɛ be nyɛe maa ba lejɛ ɔ.” (Yohane 7:33, 34) Yuda bi ɔmɛ nui nɔ́ nɛ e de ɔ sisi, lɔ ɔ he ɔ, a bi a sibi ke: “‘Jije po e yaa nɛ wa be lɛ nae hu ɔ?’ Anɛ e maa ho Hela ma nguaa amɛ a mi ya ngɛ wa nyɛmimɛ ɔmɛ a ngɔ, nɛ e ya tsɔɔ Hela bi ɔmɛ ní lo? E de ke, wa ma hla lɛ, se wa be lɛ nae; nɛ he nɛ e yaa hu, wa be nyɛe maa ya. Kɛ e ngɛ tsɔɔe kɛɛ?” (Yohane 7:35, 36) Mɛɛ lɛɛ a li kaa nɔ́ nɛ Yesu ngɛ tsɔɔe ji kaa ke e gbo nɛ e te si, nɛ e ho hiɔwe ya a, e he nyɛli be nyɛe maa nyɛɛ e se kɛ ya lejɛ ɔ.

Bɔɔbɔɔbɔɔ ɔ, ligbi kpaagone ɔ nɛ ji gbijlɔ yemi ɔ we nyagbe ligbi ɔ ba su. Kɛ je benɛ a je gbijlɔ ɔ yemi sisi ɔ, daa mɔtu ɔ, osɔfo ɔ ya yɛɔ nyu ngɛ Siloam Taku ɔ mi nɛ e kpaa kɛ pueɔ dɔ ko nɛ a gba nɛ nyu guɔ mi kɛ yaa bɔ sami la tɛ ɔ sisi ɔ mi. Enɛ ɔ he ɔ, Yesu da kusumi nɛ ɔ nɔ kɛ kai ni ɔmɛ nɔ́ ko nɛ he hia. E de mɛ ke: “Nɔ tsuaa nɔ nɛ kuma ngɛ lɛ yee ɔ, e ba ye ngɔ nɛ e ba nu nyu. A ngma ke, ‘Nɔ tsuaa nɔ nɛ heɔ mi yeɔ ɔ, pa nɛ baa nyu babaaba nɛ wami ngɛ mi maa fo dɔ kɛ je e tsui mi.’”​​—Yohane 7:37, 38.

Yesu ngɛ tsɔɔe kaa ke be su nɛ a kɛ mumi klɔuklɔu ɔ pɔ e kaseli ɔmɛ nu, nɛ a tsɛ mɛ kɛ ha hiɔwe Matsɛ Yemi ɔ, nɔ́ ko kaa jã maa ya nɔ. Yesu gbenɔ se loko a kɛ mumi klɔuklɔu ɔ pɔ kaseli ɔmɛ nu. Kɛ je benɛ a pɔ kaseli ɔmɛ nu ngɛ  Pentekoste ligbi ɔ nɔ nɛ́ a bɔni fiɛɛmi ɔ nɛ pa nɛ baa nyu nɛ haa nɔ wami ɔ bɔni bemi.

Yesu munyu ɔ ta nihi a tsui he nɛ a kpɛti ni komɛ de ke: “Niinɛ, nɔmlɔ nɛ ɔ ji gbalɔ ɔ nɛ.” Blɔɔ a ngɛ tsɔɔe kaa Yesu ji gbalɔ nɛ kle pe Mose nɛ a wo e he si ɔ nɛ. Ni komɛ hu de ke: “Lɛ ji Mesia a nɛ.” Se ni komɛ hu kplɛɛ we nɔ, mohu ɔ, a bi ke: ‘Mesia a, Galilea nɛ e maa je lo? Anɛ ngmami ɔ de we ke Mesia a maa pee Matsɛ David nina; nɛ jehanɛ hu, Betlehem, he nɛ Matsɛ David hi ɔ, lejɛ ɔ a ma fɔ lɛ ngɛ lo?’​—Yohane 7:40-42.

Munyu nɛ ɔ ha nɛ ni ɔmɛ a mi gba. E ngɛ mi kaa a ti ni komɛ ngɛ hlae nɛ a nu Yesu mohu lɛɛ, se nɔ ko nɔ ko nyɛ we nɛ e ta e he. Benɛ tsɔli ɔmɛ kpale kɛ ya jami hɛ mi nyɛɛli ɔmɛ a ngɔ kɛ a dɛ gu ɔ, osɔfo nikɔtɔma amɛ kɛ Farisi bi ɔmɛ bi mɛ ke: “Mɛni he je nyɛɛ kɛ lɛ bɛ ɔ?” Tsɔli ɔmɛ ha heto ke: “Bɔ nɛ nɔmlɔ nɛ ɔ tuɔ munyu ɔ, nɔ ko tu we munyu jã gblee.” Jami hɛ mi nyɛɛli ɔmɛ a mi mi fu nɛ a bɔni mɛ ní tsuami ke: “Anɛ e pee nyɛ hu kuasia lo? Anɛ nyɛ nu hyɛ kaa ma nimeli ɔmɛ, aloo Farisi bi ɔmɛ a ti nɔ kake ngmelu po he lɛ ye lo? Ma kpekpemi nɛ ɔ, a gbiɛ mɛ pɛ, ejakaa a li Mose mlaa a.”​—Yohane 7:45-49.

Kɛkɛ nɛ Nikodemo nɛ e ji Farisi no kɛ Sanhedrin ɔ mi no ɔ ná kã nɛ e tu munyu ha Yesu. Be ko nɛ be ɔ, Nikodemo ya Yesu ngɔ nyɔ mi, nɛ e he Yesu ye. Lɔ ɔ he ɔ, Nikodemo de mɛ ke: ‘Ngɛ wa Mlaa a nya a, e sɛ kaa wa buɔ nɔ ko fɔ be mi nɛ wa bi we e nya mi kaa mɛni e pee lo?’ Mɛni nɛ a de kɛ je a nya? A bi Nikodemo ke: ‘Mɛni, Galilea no ji mo lo? Yaa kpa ngmami ɔmɛ a mi kaa o maa na gbalɔ ko nɛ je Galilea lo.’​—Yohane 7:51, 52.

Ngmami ɔ de we pɔtɛɛ kaa gbalɔ ko maa je Galilea. Se Mawu Munyu ɔ tsɔɔ kaa Kristo ɔ maa je lejɛ ɔ; a gba kɛ fɔ si kaa a maa na “la kpetekpleenyɛ ko” ngɛ ‘Galilea he nɛ nibwɔhi hii ɔ.’ (Yesaya 9:1, 2; Mateo 4:13-17) Jehanɛ se hu ɔ, a gba kɛ fɔ si kaa, a ma fɔ Yesu ngɛ Betlehem, nɛ e maa je David weku ɔ mi. E ngɛ mi kaa Farisi bi ɔmɛ le ní nɛ ɔmɛ tsuo mohu lɛɛ, se mɛ nɔuu kɛ̃ nɛ a gbɛ Yesu he lakpa munyuhi kɛ fĩa.