Jesusajj Jerusalenan apaskäna uka Tabernáculo Fiestankaskänwa. ‘Walja jaqenakan jupar confiyapjjatapatjja’ Jesusajj kusisïnwa. Ukampis religión pʼeqtʼirinakajj janiw kusisipkänti, ukatwa Jesusar katuntapjjañapatakejj guardianakar khitapjjäna (Juan 7:31, 32). Jesusasti janiw imantaskänti.

Jerusalenan Jesusajj yatichaskakïnwa, akham sasa: “Khititejj khitankitu ukar sarañajkamajja, mä qhawqha tiempompiw nayajj jumanakampïskäjja. Jumanakajj thaqapjjetätawa, ukampis janiw jikjjatapkitätati, kawkirutï sarkä ukarojj janiw jutapkasmati” sasa (Juan 7:33, 34). Judionakajj janiw uk amuyapkänti, ukatwa jupanakkam akham parlasipjjäna: “Jupar jan jikjjatañasatakejja, ¿kawkir sarañsa aka jaqejj amtpacha? ¿Griegonak taypin jakapki uka judionakan ukarut sarañ amtpacha, ukhamat griegonakar yatichañataki? ‘Jumanakajj thaqapjjetätawa, ukampis janiw jikjjatapkitätati, kawkirutï sarkä ukarojj janirakiw jutapkasmati’ sasinjja, ¿kamsañarak munpachasti?” sasa (Juan 7:35, 36). Jesusajj jiwañapata ukhamarak alajjpachan jakañataki jaktañapatwa parlaskäna, enemigonakapajj janiw ukar sarapkaspänti.

Fiestajj paqallqo urunkjjänwa. Uka fiestanjja sapa alwaw sacerdotejj Siloam estanquet um waysurïna, uka umjja templon altaraparuw warjjatirïna. Jesusajj inas uka toqet jaqenakar amtayasajj akham sischïna: “Khititejj umat pharjatäki ukajj nayan ukar jutpan, ukatsti umtʼarakpan. Kunjamtï qellqatan siskejja, khititejj nayar confiykitu ukan ‘chuymapatjja jakañ churir umaw wal jalsunirakini’” sasa (Juan 7:37, 38).

Kunapachatï discipulonakapajj espíritu santompi ajllitäpjjani, alajjpachar sarañataki jawsatäpjjani ukhajj kunas pasani uka toqetwa Jesusajj parlaskäna. Jesusajj jiwjjäna uka qhepatwa ukajj phoqasïna. Qhepa mara, Pentecostés  urutwa ukajj phoqasiñ qalltäna. Espíritu santompi ajllit discipulonakajj cheqa yatichäwinakwa yatichapjjäna, ukhaw umas mä jawirar uñtat jaqenakar purkaspa ukhamänjja.

Jesusan yatichäwip istʼasajj yaqhepajj akham sapjjänwa: “Cheqpachansa aka jaqejj Profetäskapuniwa” sasa. Jupanakajj ‘Moisesat sipansa jukʼampi jachʼa profetaw jutani’ siskäna uk yatisaw ukham sapjjäna. Yaqhepajj akham sapjjarakïnwa: “Jupajj Cristowa” sasa. Yaqhepasti sapjjarakïnwa: “¿Cristojj Galileatti jutañapäna? ¿Janit Cristojj Davidan wawanakapata ukhamaraki kawkintï Davidajj jakkäna uka Belén jiskʼa markat jutañapawa sasin qellqatan siski?” sasa (Juan 7:40-42).

Jaqenakajj may may parlapjjäna. Yaqhepasti katuntayañwa munapjjäna, ukampis janiw khitis katuntkänti. Guardianakajj jan katuntasakiw religión pʼeqtʼirinakan ukar kuttʼjjapjjäna. Jilïr sacerdotenakampi fariseonakampejj akham sapjjänwa: “¿Kunatsa uka jaqer jan apanipkta?” sasa. Guardianakasti sapjjänwa: “Janipuniw khitis ukham parlirïkiti” sasa. Uk istʼasajja, religión pʼeqtʼirinakajj jupanakar jiskʼachasaw akham sapjjäna: “¿Jumanakamppachat uka jaqemp engañjayasipjjta? Jilïrinakatsa fariseonakatsa janiw maynis jupar confiyapkiti, ¿janicha? Ley jan uñtʼir aka jaqenakajj maldisitawa” sasa (Juan 7:45-49).

Ukhamaruw Nicodemojj jan ajjsartʼasisa Jesusar arjjatäna. Nicodemojj fariseönwa, Sanedrinankir mä jilïrirakïnwa. Niya pä mara chikatani nayrajja, jupaw Jesusan ukarojj mä aruman saräna, creyitapsa uñachtʼayarakïna. Jichhajj Nicodemojj akham sänwa: “Maynirutï Leyisarjam juzgañ munstan ukhajja, ¿janit nayraqatajj jupar istʼañasäki, ukhamat kunsa jupajj luri uk yatiñataki?” sasa. Religión pʼeqtʼirinakajj ¿kamsapjjänsa? “¿Janejjay jumajj Galileankirïktatejja? Juma pachpa yatjjatasin uñjam, janiw kuna profetas Galileat jutkaniti” sasaw Nicodemor sapjjäna (Juan 7:51, 52).

Qellqatanakanjja, janis Galileatwa mä profetajj jutani sasajj qhan siskchïnjja. Cristojj uka markat jutani sasajj Diosan Arupanjja parlänwa. Mä profecianjja akham sänwa: ‘Yaqha markankir jaqenakan Galileapa, jumanakanjja mä qhanaw qhantʼarakini’ sasa (Isaías 9:1, 2; Mateo 4:13-17). Ukhamarusa, kunjamtï profecian siskänjja, Jesusajj Belenanwa nasïna, Davidat jutirirakïnwa. Fariseonakajj uk yatisipkchïnsa, kunayman kʼarinak parlasaw Jesús toqet jaqenakar pächasiyapjjpachäna.