PES 67
“Mut a mpodok bé hala kekikel”
-
BA ÑOM BISÔNDA I GWEL YÉSU
-
NIKÔDÉMÔ A NYOÑ HOP INYU SÔÑ YÉSU
Yésu a ngi yii i Yérusalem inyu ngand Bilap (tole bipele). A yé maséé le “ngandak bôt ikété limut i bi hémle nye.” Ndi a ta bé maséé ni baéga bibase. Ba ñom bisônda bi bi nsal kiki bisônda bi base i gwel nye. (Yôhanes 7:31, 32) Ndi Yésu a nyéñ bé solop.
Yésu a nke ni bisu i niiga i mbamba i Yérusalem a kalak le: “M’a ba ki lôñni bé inyu ndék ngéda ilole me nke yak Nu a bi ep me. N’a yéñ me, ndi n’a tehe bé me; to i homa me yé, ni nla bé lo.” (Yôhanes 7:33, 34) Lôk Yuda i nok bé, jon i mbadna bo ni bo le: “Hee mut nunu a nsômbôl ke, kayéle di tehe ha bé nye? Baa a nsômbôl ke yak Lôk Yuda i i niñ ipôla bôt ba Grikia inyu boñ le a niiga yak bôt ba Grikia? Kii a nyéñ kal i ngéda a mpot le: ‘N’a yéñ me, ndi n’a tehe bé me; to i homa me yé, ni nla bé lo’?” (Yôhanes 7:35, 36) Ndi Yésu a yé pôdôl nyemb ni bitugne gwé inyu témb i ngii, het baoo bé ba nla bé noñ nye.
Hilo hi nyônôs hisaambok i nkola. Hiki kegla i ngand, prisi yada i bé i yoñ malép ma titimba i Silôam, i kôp mo i témpel, kayéle malép ma kuli ipam isi juu li bisesema. Bebek inyu bigda jam li nyen Yésu a nkal ni kiñ keñi le: “Ibale nyus i gwé mut, a lo i meeni, a nyo. Kiki tilna i nkal inyu nu ni nu a nhémle me le: ‘Malép ma niñ m’a pémél ikété kété yé, ma kulak.’”—Yôhanes 7:37, 38.
Yésu a yé pôdôl mam ma ga bôña i ngéda banigil bé ba ga ba nhook ni mbuu mpubi, ba séblana ki inyu niñ i ngii. Hala a ga bôña i mbus nyemb Yésu. Ibôdôl i ngwa Pentékôt i nwii u noñ, balom ba malép ba
ba nti niñ ba ga bôdôl kuli ngéda banigil ba ba yé minhook ba ga bôdôl tjam maliga.I mbus le bahogi ba ñemble biniigana bi Yésu, ba nkal le: “Nunu toi nyen a yé Mpôdôl nu a nlama lo,” ba nhoñol mbañ i bé pôdôl mpôdôl nu a nloo Môsi. Bape ba nkal le: “Kristô nunu.” Ndi bape ki, ba nkal le: “To! Kristô a nlôl bé i Galiléa, hala bé? Baa tilna i nkal bé le Kristô a nlôl i mbôda i David ni i Bétléhém, i mbai David a bé?”—Yôhanes 7:40-42.
Limut li yé mbaglak, to hala kiki bahogi ba nsômbôl gwel Yésu, mut to wada a ntihba bé nye. Kiki bisônda bi ntémb i tehe baéga bibase ngi Yésu, baéga biprisi ni Farisai, bi mbat bo le: “Inyuki ni nlona bé nye?” Bisônda bi ntimbhe le: “Mut to wada a ma pot bé nya ini.” Baéga bibase ba ñunup, ba kahal podba, ba solok ba kalak le: “Baa ba nyumus yak bé? Mut to wada ikété baéga to ikété Farisai a nhémle bé nye, hala nga? Ndi limut lini li li nyi bé Mbén li yé ntiihege.”—Yôhanes 7:45-49.
Ha nyen Nikôdémô, Farisai yada ni nti pék i ndap bikééhene a nyoñ hop inyu sôñ Yésu. Nwii ima ni pes bisu bi ngéda, Nikôdémô a bi lo tehe Yésu juu, a unda ki le a nhémle nye. Nikôdémô a nkal nye le: “Inoñnaga ni mbén Môsi, ba mbagal bé nkaa u mut bo ngi emble nye ni yi i yom a yé i boñ, hala bé?” Ba timbhe nye le: “Baa yak we u yé mut Galiléa? Yéñ, ndi w’a tehe le Mpôdôl to wada a’ pémél bé i Galiléa.”—Yôhanes 7:51, 52.
Bitilna bi ñunda bé ntiik le mpôdôl a pémél i Galiléa. Ndi Bitilna bi unda Kristô kiki nu a nlôl i Galiléa; i bi leglana le “mapubi makeñi” ma ga nene mu nkoñ u, “Galiléa nu biloñ.” (Yésaya 9:1, 2; Matéô 4:13-17) Kiki i bi leglana, Yésu a bi gwéé i Bétléhém, a yé ki i ndaye David. To hala kiki Farisai i neebe bé hala, bon ba ntjam bipôdôl bibe bôt ba mpot inyu Yésu.