Zezi te o kpata bo tranlɛ cɛn’n i dilɛ bo Zerizalɛmun lɔ. Kɛ ɔ wunnin kɛ sran nga be o lɛ’n, ‘be nun sunman be lafi i su’n,’ ɔ yoli i fɛ dan. Zuifu’m be kpɛn’m be liɛ’n, i sɔ’n w’a yoman be fɛ. I sɔ’n ti’n, be sunmannin gladi difuɛ mun kɛ be ko trɛ i. (Zan 7:31, 32) Sanngɛ Zezi w’a wanndiman.

I kpa bɔbɔ’n, ɔ kleli sran’m be like titi nzra nun Zerizalɛmun lɛ. Ɔ seli be kɛ: “Ka naan m’an ɔ sran ng’ɔ sunmannin min’n i sin’n, e nin amun é trán kan. Amún wá kúnndɛ min. Sanngɛ amun su wunman min. Yɛ lika nga ń kɔ́’n, amun su kwlá kɔman lɔ.” (Zan 7:33, 34) Zuifu’m b’a wunman ndɛ sɔ’n i wlɛ mlɔnmlɔn. I sɔ’n ti’n, be kɛnnin i be afiɛn lɔ kɛ: “?Nin yɛ bian nga su wa kɔ mɔ i ti yɛ e su wunmɛn i-ɔ? ?Ɔ su kɔ Zuifu nga b’a ko tran Glɛki’m be afiɛn’n be sin naan ɔ́ klé Glɛki’m be like ti-ɔ? ?Kɛ ɔ se kɛ, ‘Amún kúnndɛ min, sanngɛ amun su wunman min, yɛ lika nga ń kɔ́’n, amun su kwlá kɔman lɔ’n,’ i bo’n yɛle onin?” (Zan 7:35, 36) Sanngɛ Zezi su kɛn i wie nin i cɛnlɛ’n be ndɛ. Kɛ ɔ́ wá kɔ́ ɲanmiɛn su’n, i kpɔfuɛ’m be su kwlá sumɛn i su lɔ.

Kpata bo tranlɛ’n i dilɛ cɛn’n i dilɛ’n, i cɛn nso su’n w’a ju siɛn’n. Cɛn dilɛ sɔ’n nun’n, Ɲanmiɛn ɲrun jranfuɛ kun sa nzue Siloamun nzue gble’n nun. Kpɛkun ɔ fa guɛ i tɛ yiwlɛ’n su nglɛmun kwlaa. Nzue’n sonji naan w’a di tɛ yiwlɛ’n i bo ngba. Atrɛkpa Zezi i wla kpɛnnin i sɔ’n su. I ti’n, ɔ mɛnnin i nɛn’n su seli kɛ: “Sran kwlaa nga nzuewe kun i’n, maan ɔ bla min sin naan ɔ wa nɔn nzue. Sran ng’ɔ lafi min su’n, ‘nzue ba mɔ be man nguan’n, bé fín i nun bé sónji,’ kɛ nga Ɲanmiɛn ndɛ’n fa kannin’n sa.”​—Zan 7:37, 38.

Zezi su kan blɛ mɔ Ɲanmiɛn wawɛ’n jrɛ́ i sɔnnzɔnfuɛ mɔ bé wá kɔ́ ɲanmiɛn su’n be su’n, i ndɛ. Kɛ Zezi ko wu’n, i sin Pantekɔtu liɛ’n nun yɛ sa sɔ’n jú-ɔ. Kɛ Zezi i sɔnnzɔnfuɛ mɔ Ɲanmiɛn wawɛ’n trán be su’n, bé kán Ɲanmiɛn ndɛ’n klé sran  mun’n, ɔ́ yó kɛ nzue ba mɔ be sonji kpuu’n, mɔ be man nguan’n sa.

Kɛ sran nga be o lɛ’n, be nun wie’m be tili ndɛ ng’ɔ kannin’n, be seli kɛ: “Nanwlɛ, Ɲanmiɛn nuan ijɔfuɛ’n yɛ.” Wie’m be waan: “Klisi’n yɛ.” Sanngɛ wie’m be seli kɛ: “?Wan yɛ ɔ seli amun kɛ Galile yɛ Klisi’n fín-ɔn? ?Ɲanmiɛn ndɛ’n w’a seman kɛ Klisi’n fín Davidi i osu’n nun naan ɔ́ fín Bɛtleɛmun m’ɔ ti Davidi i klɔ’n su?”​—Zan 7:40-42.

Ndɛ sɔ’n ti’n, sran’m be bubuli be wun nun. Kannzɛ bɔbɔ wie’m be kunndɛ kɛ be tra Zezi’n, sran fi i sa w’a kɛnmɛn i. Kɛ Ɲanmiɛn i sua’n nun gladi difuɛ’m be sali be sin’n, mɔ Ɲanmiɛn ɲrun jranfuɛ’m be su kpɛn mun nin Farizifuɛ’m be wunnin kɛ b’a traman Zezi’n, be usali be kɛ: “?Ngue ti yɛ amun a trɛmɛn i b’a baman-ɔn?” Gladi difuɛ’m be tɛli su kɛ: “Sran fi nin-a ijɔman kɛ ngalɛ’n sa le.” I sɔ’n ti’n, Zuifu’m be Ɲanmiɛn sulɛ wafa’m be su kpɛn sɔ’m be fali ya dan kpa, yɛ be kannin be ndɛ tɛtɛ. Be seli be kɛ: “?W’a laka amun wie ti-ɔ? Zuifu’m be kpɛnngbɛn mun nin Farizifuɛ’m be nun kun sa lafimɛn i su. ?Nɛ́n i-ɔ? Sanngɛ sran nga be o yɛ’n, mɔ be siman Mmla’n, Ɲanmiɛn boli be sannzan.”​—Zan 7:45-49.

Nikodɛmun m’ɔ ti Zuifu’m be Jɔlɛ difuɛ dandan’m be nun kun’n, wo lɛ wie. I yɛ le kun’n, ɔ ko wunnin Zezi i wun kɔnguɛ’n niɔn. Ɔ yoli sɔ i afuɛ nɲɔn nin sin yɛ. Kɔnguɛ sɔ’n nun’n, ɔ kleli Zezi kɛ ɔ lafi i su. Nikodɛmun sɔ’n jrannin Zezi sin yakpa su. Ɔ seli Jɔlɛ difuɛ dandan’m be kɛ: “E Mmla’n nun’n, sɛ e nin-a timan sran kun i nuan ndɛ naan y’a si like ng’ɔ yoli’n, e bumɛn i fɔ. ?Nɛ́n i-ɔ?” Zezi i kpɔfuɛ’m be tɛli Nikodɛmun su kɛ: “?Ɔ kpa’n, a ti Galilefuɛ ti-ɔ? Kunndɛ nian, á wún kɛ Ɲanmiɛn nuan ijɔfuɛ fi su finman Galile.”​—Zan 7:51, 52.

B’a klɛmɛn i Ɲanmiɛn Ndɛ’n nun trele kɛ Ɲanmiɛn nuan ijɔfuɛ kun fín Galile. Sanngɛ Ɲanmiɛn Ndɛ’n kleli kɛ lɔ yɛ Klisi’n fín-ɔn. Afin Ɲanmiɛn Ndɛ’n seli kɛ, ɔ seli kɛ sran’m bé wún kɛ ‘lika’n kpaja dan kpa’ “Galile mɔ be nga be timan Zuifu’n be sɔnnin lɔ’n” nun. (Ezai 9:1, 2; Matie 4:13-17) Asa ekun’n, be wuli Zezi Bɛtleɛmun. Kpɛkun ɔ fin Davidi i osu’n nun kɛ nga Ɲanmiɛn Ndɛ’n fa kannin’n sa. Atrɛkpa’n, Farizifuɛ’m be si i kwlaa sɔ’n nun. Sanngɛ be buali Zezi i su ato be truli.