Si Jesus yaon pa sa Jerusalem para sa Kapiyestahan nin mga Tabernakulo (o, Payag-payag). Naugma siya huli ta “dakul sa mga tawo an nagturubod sa saiya.” Pero, dai iyan nakapaugma sa mga lider nin relihiyon. Nagsugo sinda nin mga guwardiya, na nagseserbi bilang mga pulis kan relihiyon, para dakupon siya. (Juan 7:31, 32) Pero, dai siya nagpurbar na magtago.

Imbes, padagos siyang nagtukdo nin hayagan sa Jerusalem, na nagsasabi: “Makakaibanan pa nindo ako nin dikit na panahon bago ako magduman sa Saiya na nagsugo sa sako. Hahanapon nindo ako, alagad dai nindo ako manunumpungan, asin kun hain ako dai kamo makakaduman.” (Juan 7:33, 34) Dai nakasabot an mga Judio, kaya nag-urulay-ulay sinda: “Sain plano kan tawong ini na magduman na dai niyato siya manunumpungan? Dai man niya gayod planong magduman sa mga Judiong nag-iirok sa kaibanan kan mga Griego asin tukduan an mga Griego, bako? Anong buot sabihon niya sa sinabi niyang ‘Hahanapon nindo ako, alagad dai nindo ako manunumpungan, asin kun hain ako dai kamo makakaduman’?” (Juan 7:35, 36) Pero, an sinasabi ni Jesus iyo an kagadanan niya saka pagkabuhay liwat pasiring sa langit, asin an saiyang mga kaiwal dai makakasunod duman.

Nag-abot na an ikapitong aldaw kan kapiyestahan. Kada aga durante kan kapiyestahan, sarong saserdote an nagbububo nin tubig na kinua sa Karigusan nin Siloam, tanganing magbulos iyan sa baba kan altar kan templo. Posibleng para ipagirumdom sa mga tawo an pagbubong ini nin tubig, nagtaram si Jesus nin makusog: “Kun an siisay man napapaha, magdigdi siya sa sako asin mag-inom. An siisay man na magtubod sa sako, siring kan sinambit sa Kasuratan: ‘Hali sa kauruirarumi niya mabulos an mga salog nin tubig na buhay.’”—Juan 7:37, 38.

An sinasabi ni Jesus iyo an mangyayari pag an mga disipulo lahidan na nin banal na espiritu asin apudon para sa langitnon na buhay. Mangyayari an paglahid na ini pagkagadan ni Jesus, sa aldaw  nin Pentecostes sa masunod na taon. Sa aldaw na iyan, an linahidan nin espiritu na mga disipulo mapuon na maghiras kan katotoohan sa mga tawo, asin sa panahon na iyan mapuon nang magbulos an arog sa mga salog nin tubig na nagtatao nin buhay.

Bilang simbag sa itinutukdo ni Jesus, may mga nagsabi: “Iyo na talaga ini an Propeta,” na malinaw na an pinapanungdan iyo an ihinulang propeta na mas urog pa kisa ki Moises. An iba nagsabi: “Iyo na ini an Cristo.” Alagad may mga nagrason man: “Bakong dai man magikan sa Galilea an Cristo? Bakong sinasabi sa Kasuratan na an Cristo magikan sa lahi ni David asin an paghahalian niya iyo an Betlehem, an banwa na inirukan ni David?”—Juan 7:40-42.

Kaya dai nagkauruyon an mga tawo. Dawa ngani gusto kan nagkapira na dakupon siya, dai nin nakagibo kaiyan. Kan nagbaralik an mga guwardiya sa mga lider nin relihiyon na dai dara si Jesus, an panginot na mga saserdote asin mga Fariseo naghapot: “Taano ta dai nindo siya dinara?” Nagsimbag an mga guwardiya: “Dai pa nin siisay man na tawong nagtaram nin arog kaini.” An angguton na mga lider nin relihiyon nanuya asin namansag: “Pati kamo, naloko na man? Mayo ni saro sa mga tagapamahala o sa mga Fariseo an nagtubod sa saiya, bako? Alagad an mga tawong ini na ignorante sa Katugunan mga tawong isinumpa.”—Juan 7:45-49.

Sa pagkakataon na ini, si Nicodemo, na sarong Fariseo asin miyembro kan Sanhedrin, kusog-buot na nagtaram para ki Jesus. Mga duwa may kabangang taon bago kaini, si Nicodemo nagduman ki Jesus sa banggi asin ipinahayag an pagtubod niya ki Jesus. Ngunyan nagsabi si Nicodemo: “Dai hinuhusgaran kan satong Katugunan an sarong tawo sagkod na dai pa siya nadadangog asin dai pa naaaraman an saiyang ginigibo, bako?” Ano an simbag ninda bilang depensa? “Ano taga Galilea ka man? Magsiyasat ka asin mahihiling mo na daing propetang isusugo na hali sa Galilea.”—Juan 7:51, 52.

Dai direktang sinasabi kan Kasuratan na may propetang magikan sa Galilea. Pero talagang sinabi kan Tataramon nin Diyos na an Cristo magikan diyan; ihinula kaiyan na may sarong “dakulang liwanag” na mahihiling sa “Galilea kan mga nasyon.” (Isaias 9:1, 2; Mateo 4:13-17) Dugang pa, arog kan ihinula, namundag si Jesus sa Betlehem, asin naggikan sa lahi ni David. Dawa ngani tibaad aram ini kan mga Fariseo, posibleng marhay na sinda an responsable sa pagpalakop kan dakul sa mga salang paghuna kan mga tawo manungod ki Jesus.