Yésus a nga’ane Jérusalem asu Abô’ô ya Tabernacle (nge na, abô’ô ba tabe Bibem). A wô’ô mvaé na “e nkunda bôt été va, abui e nga buni nye.” Ve da, betebe ôsu ya miñyebe ba wô’ô jam ete abé. Ba lôme bezimbi, e ba ba saé ane bezimbi e nda Zambe, na be ke bi nye. (Jean 7:31, 32, Mfefé Nkôñelan) To’o nalé, Yésus a nji ve’ele sobô.

Nya ajôô a ne na, Yésus a ke ôsu a ye’ele mengana bôt été e Jérusalem, a jô’ô na: “Bia be mia bi ngenan bi to ôbe nté, wôna me aye ke be môt a nga lôme ma. Mi aye jeñe ma, te yene ma: vôm me aye tabe, mi se ngule ya zu wôé.” (Jean 7:33, 34) Bejuif be nji wôk, nde ba kobô e zañe jap a jô na: “Môte nyô a ye ke vé, bi aye bo te yene nye? Ye a ye ke Bejuif be nga ke tabe si ya Begrec, a ye’ele Begrec? Za aka’ ajô a jô dina na, Mi aye jeñe ma, te yene ma; a vôm me to, mi se ngule ya zu?” (Jean 7:35, 36) Yésus nye a kobô ajô awu dé a ñwômane wé asu ényiñe ya yôp, a besiñe bé be vo’o tôñe nye wôé.

Melu zangbwale ya abô’ô me kpwaaneya. Tyé ése ya môs abôk, prêtre wua a mbe a sô’é mendime ma so étame ya Siloé e si, avale ya na ma lôtane si ya temple. A kobô bôt ajô ya mboan ôte, Yésus a yôtane na: “Nge môt a wô’ évé, a za’a nyu be ma. Môt a buni ma, asôé e ne ényiñ de aye so nye abum été, ane e ne ntilane kalate Zambe.”​—Jean 7:37, 38.

Yésus a kobô jame da ye boban éyoñe beyé’é bé ba ye bo ñwo’on a mbamba nsisim, a nloon asu ya ke nyiñe yôp. Jam ete da ye boban mvus awu Yésus. Ataté môse Pentecôte ya mbu ô nga tôé valé, atôñe mendim ya ényiñ e nga taté na da lôt, ane beyé’é be  nto miñwo’one ba ke ba kañete bôte benya mejôô.

Éyoñe ba wô’ô ñye’elan Yésus, bôte béziñe ba jô na: “Nyina a ne fo’o nkulu mejô,” ba yiane simesane nkulu mejô be nga jô na a ye dañe Moïse. Ba bevo’o ba jô na: “Nyina a ne Krist.” Ve ba bevo’o na: “Aya, ye Krist a ye so Galilée? Ke e ne ntilane kalate Zambe na, Krist a ye so mvoñe bôte David?”​—Jean 7:40-42.

Nde ñhe ékôane bôte ja kabane zañ. Akusa bo bôte béziñ ba kômbô bi Yésus, teke môt éziñ a kui na a bete nye mo nyul. Éyoñe bezimbi ba bulane be betebe ôsu ya ñyebe, teke’e Yésus, bemie beprêtre a Bepharisien ba sili na: “Amu jé mi nji soo nye?” Bezimbi be’e na: “Môt éziñ a ngenane te yeme nkobô avale ane môt ate.” Ane betebe ôsu be nga ta be, a kpwe’ele be be jô’ô na: “Ye mia fe mi maneya du’uban? Za éziñ ya betebe ôsu nge Bepharisien a buniya nye? Ke fo’o ve zezé babôtô a ne te yeme metiñe nyô, mbe be ne biyo’é.”​—Jean 7:45-49, Mfefé Nkôñelan.

Ane Nicodème, mone Pharisien a ébu’a ya Sanhédrin, a nyoñe nkobô a ayo’o ése na a kamane Yésus. Mimbu mibaé a étun mvuse ya valé, Nicodème a nga zu be Yésus alu a liti mbunane be nye. Éyoñe ji, Nicodème a jô na: “Ye metiñe mangan me aliti bia na bi ve môte mekua, te tame wô’ ane a kat, nge yene mam a bo?” Ba yalan aya? Ba jô na: “Wo fe, ye ô ne môte ya Galilée? Tuka’a fombô, ô yeme na nkulu mejô a nji so Galilée.”​—Jean 7:51, 52.

Mintilan mi nji jô ne sañesañe na, nkulu mejô a ye so Galilée. Ve Mejô me Zambe me nga liti na nne Krist a ye yené wôé; me nga jô na “beta éfufup” a ye yené e “Galilée ya meyoñ.” (Ésaïe 9:1, 2; Matthieu 4:13-17) Nde fe, aval ane é nga jôban, Yésus a nga bialé e Bethléhem, a nnye ane mvoñe bôte David. Akusa bo Bepharisien ba yeme de, mbe be nga mane miase mbia b’asimesane bôte be bili a lat a Yésus.