Yezu bele be Zeruzalɛmu, Sumanladon ɲanagwɛ la, o min be weele fana ko Gwatakɔrɔsigi seli. A ninsɔndiyanin lo k’a ye ko “jama cɛma, caaman lar’a la.” O ma diya diinan kuntigiw ye. U ye garadiw ci ko u ka taga Yezu minɛ (Zan 7:31, 32). O bɛɛ n’a ta, Yezu m’a ɲini k’a yɛrɛ dogo.

Nka a tora ka jama kalan ko: “Waati dɔɔni le tora ne bena min kɛ n’aw ye, o kɔ, ne be segi n cibaga fɛ. Aw bena ne yɔrɔ ɲini ka dɛsɛ, aw tena ne ye. Bari ne bena to yɔrɔ min na, aw tena se ka na yen.” (Zan 7:33, 34). Yahutuw m’o kuma kɔrɔ faamu. U tora k’a fɔ ɲɔgɔn ye ko: “Nin bena se ka taga yɔrɔ jumɛn n’anw ben’a yɔrɔ ɲini ka dɛsɛ? An ka siya minw jɛnsɛnnin be siya wɛrɛw cɛma, a bena taga olu le fɛ ka siya wɛrɛw kalan wa? A y’a fɔ ko an bena ale yɔrɔ ɲini ka dɛsɛ, ko an tena ale ye. Ani ko ale bena to yɔrɔ min na, ko an tena se ka taga yen. O kɔrɔ ye mun ye?” (Zan 7:35, 36). Yezu be kumana min koo la, o ye ko a bena sa ani ka kunu ka taga sankolo la, yɔrɔ min na a juguw tɛ se ka tugu a kɔ.

Selilon tile wolonfilanan sera. Loon bɛɛ sɔgɔma, selilonw tuma na, sarakalasebaga dɔ be jii bɔ Silowe dingɛ kɔnɔ k’a bɔn sarakabɔlan kan Alabatoso kɔnɔ. O jii be wɔyɔ ka jigi sarakabɔlan jukɔrɔ. N’a sɔrɔ Yezu tun b’a fɛ ka mɔgɔ hakili jigi o landako lo la tuma min na a y’a fɔ ni kaanba ye ko: “Ni minnɔgɔ be mɔgɔ min na, o tigi ka na ne fɛ ka jii min. Ni mɔgɔ min lara ne la, o tigi bena kɛ jiɲuman buyiyɔrɔ ye i ko a fɔra Ala ka kuma na cogo min na.”—Zan 7:37, 38.

Yezu b’a yirala koo min bena kɛ ni hakili senu nana jigi a ka kalandenw kan ani u bena nɛɛma sɔrɔ ka taga ɲɛnamaya kɛ sankolo la. Yezu sanin kɔ, hakili senu tun bena jigi u kan. Saan  min tugura o kɔ, Pantekɔte loon na, ɲɛnamaya jii y’a daminɛ ka woyo tuma min na kalanden mɔlenw ye jama kalan tiɲɛn kumaw na.

Jama ye Yezu ka kuma ta cogo di? Dɔw y’a fɔ ko: “Tiɲɛ na, nin le ye kiraba nin ye.” Kira min koo tun fɔra ko a ka bon ni Musa ye, u kaan be ale lo ma. Dɔ wɛrɛw ko: “Ala ka Mɔgɔ wolomanin [Krista] lo.” Nka dɔw ma sɔn, u ko: “A ka kan ka bɔ Galile wa? A ma fɔ Ala ka kuma na ko Ala ka Mɔgɔ wolomanin buruju bena bɔ masacɛ Dawuda la wa? N’o ka dugu ye Bɛtilehɛmu ye.”—Zan 7:40-42.

O la, u ka miiriya ma kɛ kelen ye. Hali ni dɔw b’a fɛ u ka Yezu minɛ, mɔgɔ si tɛ sɔn ka maga a la. Garadiw kɔsegira ka taga diinan kuntigiw fɛ, u ma se ka Yezu minɛ. Sarakalasebagaw kuntigiw ni Fariziɲɛw y’u ɲininga ko: “Mun y’a to aw ma na n’a ye?” Garadiw y’u jaabi ko: “Mɔgɔ si ma kuma i ko nin cɛ abada!” Diinan kuntigiw dimina ani u y’a daminɛ ka kuma gomanw fɔ ani ka nɛnini kɛ ko: “A ye aw fana lafili wa? An ka faama kelen wala Farisiɛn kelen dara a la wa? Nka nin jama tɛ sariya dɔn, u dangalen bɛ.”—Zan 7:45-49, ABM.

U y’o fɔ minkɛ, Nikodɛmu y’a jaa gwɛlɛya ka Yezu lafasa. O Nikodɛmu tun ye Fariziɲɛ nunu dɔ ye ani kititigɛlaw jɛnkulu mɔgɔ dɔ tun lo fana. A saan fila ni kalo wɔɔrɔ ye nin ye a tun tagara Yezu fɛ loon dɔ sufɛ k’a yira ko ale limaniyanin lo Yezu la. Sisan, a ye kuma ta k’a fɔ ko: “Ka kɛɲɛ ni sariya ye, an be se ka mɔgɔ jalaki n’a tigi darakan ma mɛn wa? N’a ka kɛwali ma lɔn wa?” Tɔɔw y’a jaabi cogo di? U ko: “E fana ye Galileka ye wa? Ala ka kuma sɛgɛsɛgɛ kosɔbɛ, i ben’a ye ko kira si te bɔ Galile mara la.”—Zan 7:51, 52.

Ala ka Kuma kɔni t’a fɔ k’a gwɛ ko kira dɔ bena bɔ Galile mara la. Nka a b’a fɔ ko “yeelenba” dɔ bena bɔ “Galile mara” la. O kuma b’a yira ko Krista tun bena bɔ o mara la (Ezayi 8:23; 9:1; Matiyo 4:13-17). Ka fara o kan, Yezu wolola Bɛtilehɛmu, ani a ye Dawuda bɔnsɔn ye. N’a sɔrɔ Fariziɲɛw b’o kala ma cɔ. O n’a ta bɛɛ, u ye miiriya tilenbali dɔw don mɔgɔw kun na Yezu koo la.