Jesus agi ba Jerusalem ngintu Pengerami Belangkau. Iya tentu gaga ati laban “mayuh orang agi arapka iya.” Tang bala tuai pengarap enda gaga ati. Lalu sida ngasuh bala jejaga nangkap Jesus. (John 7:31, 32) Taja pia, Jesus enda ngelalaika diri.

Jesus terus ngajar ba Jerusalem, lalu iya madahka: “Aku deka enggau kita enda lama aja sebedau aku mupuk ngagai Iya ke ngirumka aku. Kita deka ngiga aku tang enda ulih tetemuka aku, lalu kita enda ulih datai ngagai endur ke dituju aku.” (John 7:33, 34) Orang Judah enda meretika jaku Jesus. Nya alai, sida madahka pangan diri: “Kini ke tunga orang tu deka mupuk, nyentukka kitai enda ulih tetemuka iya? Kati iya deka mupuk ngagai orang Judah ke diau begulai enggau orang Gerika, lalu ngajar mega orang Gerika? Nama reti utai ku iya lebuh iya madahka, ‘Kita deka ngiga aku tang enda ulih tetemuka aku, lalu kita enda ulih datai ngagai endur ke dituju aku’?” (John 7:35, 36) Reti ku Jesus nya, iya deka dibunuh lalu diangkatka idup baru ba serega. Nyadi, bala munsuh enda ulih nitihka iya.

Ninting pagi sepemanjai pengerami nya, siku imam deka ngambi ai ari kulam Siloam. Pengudah nya, iya deka nyiram ai nya nyentukka ai nya mengalir ngagai baruh alta. Engka Jesus pan berunding pasal pengawa tu. Lalu ba hari ti penudi maya pengerami nya, iya madahka: “Enti bisi orang ke aus, awakka iya datai ngagai aku lalu ngirup. Barang sapa arapka aku, baka ke udah dipadahka Bup Kudus, ai ti meri pengidup deka pansut enggau mayuh ari ati iya.’”—John 7:37, 38.

Jesus merujuk ngagai utai ke deka nyadi maya bala murid iya dipilih kuasa kudus, lalu dipilih idup meruan ba serega. Sida berengkah dipilih pengudah pemati Jesus. Setaun pengudah nya, maya Hari Pentikos, bala murid iya berengkah bekunsika pemendar ngagai orang mayuh. Enggau nya, ai ti meri pengidup dicurahka ngagai orang mayuh.

Pengudah ninga ajar Jesus, sekeda orang madahka: “Iya endang Nabi nya.” Sida engka berundingka nabi ti deka datai ke besai agi ari  Moses. Sekeda orang ke bukai madahka: “Iya tu meh Kristus.” Tang bisi mega ke madah: “Enda patut Kristus datai ari Galili neh? Endaka Bup Kudus madahka Kristus deka datai ari peturun David sereta datai ari Betlehem, menua asal David?”—John 7:40-42.

Nya alai, orang mayuh enda sama penemu pasal Jesus. Taja pan sekeda orang deka Jesus ditangkap, tang nadai orang ulih ngereja nya. Nyadi, lebuh bala jejaga enda nangkap Jesus, bala ketuai imam enggau orang Parisi nanya sida: “Nama kebuah kita enda nangkap lalu mai iya kitu?” Ku bala jejaga nyaut: “Nadai kala orang udah bejaku baka iya.” Bala tuai pengarap amat ringat, lalu sida nganu sereta ngeleseka bala jejaga nya: “Kati semua kita mega udah ditesatka iya? Nadai siku pan bala ketuai tauka orang Parisi ke arapka iya, enda pia? Tang Petara enda lantang ati enggau orang mayuh tu ke enda nemu pasal Adat.”—John 7:45-49.

Maya nya, Nikodimus, siku orang Parisi sereta siku ari Raban Kunsil Orang Judah, enggau berani bejaku ngarika Jesus. Kira-kira dua taun setengah sebedau nya, Nikodimus datai ngiga Jesus maya malam hari lalu madahka diri arapka Jesus. Nyadi Nikodimus madahka: “Endaka Adat ngasuh kitai mendingka jaku orang dulu sereta nemu utai ke digaga iya sebedau kitai ngakim iya?” Nama saut sida? Ku sida: “Kati nuan mega datai ari Galili? Pansik Bup Kudus, lalu nuan deka nemu, nadai nabi ke deka datai ari Galili.”—John 7:51, 52.

Bup Kudus enda madah enggau nyemetak pasal siku nabi ke deka datai ari Galili. Tang Bup Kudus bisi madahka Kristus deka datai ari Galili, laban jaku benabi bisi nyebut “penampak ti amat terang” deka dipeda ba “Galili menua alai orang bansa bukai diau.” (Isaiah 9:1, 2; Matthew 4:13-17) Kelimpah ari nya, baka ke udah disemaya, Jesus ada ba Bethlehem lalu iya siku ari peturun David. Taja pan orang Parisi engka nemu utai tu, tang sida ngerembaika berita ti enda betul pasal Jesus.