Jesu arĩ o Jerusalemu nĩ ũndũ wa Gĩathĩ gĩa Ithũnũ. Nĩ arakena kuona atĩ ‘andũ aingĩ thĩinĩ wa kĩrĩndĩ nĩ maramwĩtĩkia.’ No ũndũ ũcio ndũrakenia atongoria a ndini. Kwoguo magatũma thigari ithiĩ ikamũnyite. (Johana 7:​31, 32) Ĩndĩ Jesu akaaga kwĩhitha.

Ithenya rĩa ũguo, agathiĩ na mbere kũhunjĩria andũ Jerusalemu, akameera: “Ngũkorũo hamwe na inyuĩ kahinda kangĩ o kanini itanathiĩ kũrĩ Ũrĩa wandũmire. Nĩ mũkanjaria no mũtikanyona, na kũrĩa ngaakorũo mũtikahota gũka.” (Johana 7:​33, 34) Ayahudi makaga gũtaũkĩrũo nĩ ciugo icio, kwoguo makorania: “Mũndũ ũyũ kaĩ arabanga gũthiĩ kũ gũkũ tũtakamuona? Hihi arabanga gũthiĩ kũrĩ Ayahudi arĩa mahurunjũkĩte kwa Angiriki akarute Angiriki? Arenda kuuga atĩa rĩrĩa aroiga, ‘Nĩ mũkanjaria no mũtikanyona, na kũrĩa ngaakorũo mũtikahota gũka’?” (Johana 7:​35, 36) No Jesu araria ũhoro wa ũrĩa agaakua acoke ariũke athiĩ igũrũ, na thũ ciake itikaahota kũmũrũmĩrĩra kũu.

Mũthenya wa mũgwanja wa gĩkũngũĩro ũgakinya. O rũcinĩ hĩndĩ ya gĩkũngũĩro kĩu, mũthĩnjĩri-Ngai atahaga maĩ Karia-inĩ ga Siloamu, agacoka akamaita magatherera nginya kĩgongona-inĩ kĩa hekarũ. Hihi nĩguo aririkanie andũ ũndũ ũcio, Jesu akanĩrĩra akoiga: “Angĩkorũo nĩ harĩ mũndũ o na ũmwe mũnyotu, nĩ oke kũrĩ niĩ anyue maĩ. Mũndũ o wothe ũkũgĩa na wĩtĩkio harĩ niĩ, o ta ũrĩa rĩandĩko rĩrĩ riugĩte: ‘Tũrũũĩ twa maĩ ma muoyo tũrĩthereraga kuuma thĩinĩ wake.’”​—Johana 7:​37, 38.

Jesu araria ũhoro wĩgiĩ ũrĩa gũgekĩka rĩrĩa arutwo ake magaitĩrĩrio roho mũtheru na magĩe na kĩĩrĩgĩrĩro kĩa muoyo kũrĩa igũrũ. Ũndũ ũcio ũngĩgekĩka thutha wa Jesu gũkua, mũthenya wa Pentekoste mwaka ũrĩa ũrũmĩrĩire. Mũthenya ũcio, arutwo acio arĩa mangĩgakorũo mamũrĩtwo  na roho nĩ mangĩkambĩrĩria kwaria ũhoro wa ma na andũ, na hĩndĩ ĩyo tũrũũĩ twa maĩ ma muoyo twambĩrĩrie gũtherera.

Nĩ ũndũ wa ũrutani ũcio wa Jesu, amwe makoiga: “Ũyũ kũna nĩwe Mũnabii,” hihi makĩaria igũrũ rĩgiĩ mũnabii ũrĩa weeranĩirũo, mũnene kũrĩ Musa. Angĩ nao makoiga: “Ũyũ nĩwe Kristo.” No amwe makoiga: “Kristo ndaarĩ oke kuuma Galili. Githĩ rĩandĩko rĩtiugĩte atĩ Kristo akoima rũciaro-inĩ rwa Daudi, oime Bethilehemu, gĩcagi kĩrĩa Daudi aaikaraga?”​—Johana 7:​40-42.

Kwoguo kĩrĩndĩ kĩrĩ na mawoni matiganĩte. O na gũtuĩka amwe marenda Jesu anyitwo, gũtirĩ ũreyumĩria gwĩka ũguo. Thigari ciacoka kũrĩ atongoria a ndini itarĩ na Jesu, athĩnjĩri-Ngai anene na Afarisai makoria: “Mwaga kũmũreehe nĩkĩ?” Thigari icio igacokia: “Gũtirĩ mũndũ ũrĩ waria take.” Atongoria a ndini marakarĩte makambĩrĩria kũmanyũrũria na kũmaruma, makameera: “Kaĩ o na inyuĩ mũhĩtithirio? Gũtirĩ mũtongoria o na ũmwe kana Mũfarisai ũgĩte na wĩtĩkio harĩ we. No kĩrĩndĩ gĩkĩ gĩtoĩ Watho nĩ kĩrume.”​—Johana 7:​45-49.

Gwakinya hau, Nikodemo ũrĩa Mũfarisai wa kĩama gĩa Sanhedrini, akambĩrĩria gũtetera Jesu. Mĩaka ta ĩĩrĩ na nuthu mĩhĩtũku, Nikodemo aathire kũrĩ Jesu ũtukũ na akĩonania wĩtĩkio harĩ we. Rĩu Nikodemo akoiga: “Watho witũ ndũtuagĩra mũndũ o tiga twambire kũmũthikĩrĩria tũmenye maũndũ marĩa areka, kana tiguo?” Nao magĩĩtetera makamwĩra: “Kaĩ wee nawe uumĩte Galili? Ta tuĩria wone atĩ gũtirĩ mũnabii ũkoima Galili.”​—Johana 7:​51, 52.

Maandĩko matiugĩte ĩmwe kwa ĩmwe atĩ kũrĩ mũnabii ũkoima Galili. Ĩndĩ Kiugo kĩa Ngai nĩ kĩonanĩtie atĩ Kristo akoima kũu; kĩarathĩte atĩ “ũtheri mũnene” nĩ ũkoneka “Galili kwa andũ a ndũrĩrĩ.” (Isaia 9:​1, 2; Mathayo 4:​13-17) Makĩria ma ũguo, o ta ũrĩa kwarathĩtwo, Jesu aaciarĩirũo Bethilehemu, na nĩ wa rũciaro rwa Daudi. O na gũtuĩka Afarisai no makorũo moĩ ũguo, no kũhoteke nĩo maratheremia mawoni maingĩ marĩa andũ marĩ namo megiĩ Jesu.