67-تاراۋ
«ەشكىم ول سياقتى سويلەگەن ەمەس»
-
يسانى ۇستاۋعا ساقشىلار جىبەرىلدى
-
نىكودەم يسانى قورعاپ سويلەدى
يسا ٵلى دە يەرۋساليمدەگى كۇركەلەر مەيرامىندا. «جۇرتتىڭ كوبى وعان سەندى». بۇعان يسا قۋانعانىمەن، ٴدىنباسىلارى اشۋلاندى. سوندىقتان ولار وزدەرىنە قىزمەت ەتەتىن ساقشىلاردى ونى تۇتقىنداۋعا جىبەردى (جوحان 7:31، 32). الايدا يسا ولاردان جاسىرىنبادى.
يسا يەرۋساليمدە كوپشىلىككە ٴتالىم بەرىپ، بىلاي دەدى: «ارالارىڭدا تاعى شامالى ۋاقىت بولامىن، سوسىن ٶزىمدى جىبەرگەنگە قايتا ورالامىن. سەندەر مەنى ىزدەيسىڭدەر، ٴبىراق تاپپايسىڭدار، مەن باراتىن جەرگە بارا المايسىڭدار» (جوحان 7:33، 34). بۇل سوزدەردى ياھۋديلەر تۇسىنبەي، ٴبىر-بىرىنە: «ٴبىز ونى تابا المايتىنداي، ول قايدا بارماقشى؟ گرەكتەردىڭ اراسىنا تاراپ كەتكەن ياھۋديلەرگە بارىپ، گرەكتەرگە دە ٴتالىم بەرمەكشى مە؟ «سەندەر مەنى ىزدەيسىڭدەر، ٴبىراق تاپپايسىڭدار، مەن باراتىن جەرگە بارا المايسىڭدار» دەۋىمەن ول نە ايتپاقشى؟»— دەستى (جوحان 7:35، 36). يسا بولسا ٶزىنىڭ ولەتىنىن جانە كوككە قايتا تىرىلەتىنىن ايتىپ تۇر. ال ول جاققا جاۋلارى بارا المايتىن.
مەيرامنىڭ جەتىنشى كۇنى كەلىپ جەتتى. ٴدىني قىزمەتكەر مەيرامنىڭ ٵر كۇنى تاڭەرتەڭ سيلوعام حاۋىزىنان سۋ الىپ، قۇرباندىق وشاعىنىڭ تۇبىنە اعاتىنداي ەتىپ توگەتىن. يسا وسى ٴراسىمدى ەسكەرسە كەرەك، بىلاي دەپ داۋىستادى: «كىم شولدەسە، ماعان كەلىپ، سۋ ٸشسىن. كىم ماعان سەنسە، جازبادا ايتىلعانداي، «سونىڭ جۇرەگىنەن ٶمىر سۋى تاسقىنداپ اعادى» (جوحان 7:37، 38).
يسا مۇنىمەن شاكىرتتەرىنە كيەلى رۋح قونىپ، كوكتەگى ومىرگە شاقىرىلاتىنىنا نۇسقادى. بۇل جايت يسا ولگەننەن كەيىن ورىندالماق. كەلەسى جىلدىڭ ەلۋىنشى كۇن مەيرامىندا كيەلى رۋحپەن مايلانعان شاكىرتتەر ادامدارعا شىندىقتى ايتقان كەزدەن باستاپ ٶمىر بەرەتىن سۋ تاسقىنداپ اعاتىن بولادى.
جوحان 7:40—42).
يسانىڭ ٴتالىمىن تىڭداعانداردىڭ كەيبىرى: «مىناۋ — شىنىمەن پايعامبار ەكەن!»— دەدى. مۇنىمەن ولار مۇسادان ۇلكەن پايعامباردى ايتسا كەرەك. باسقا بىرەۋلەرى: «بۇل — ٴماسىح»،— دەپ جاتتى. الايدا كەيبىرەۋلەر كەلىسپەي: «ٴماسىح عاليلەيادان كەلۋشى مە ەدى؟ جازبالاردا ٴماسىحتىڭ ٴداۋىت اۋلەتىنەن جانە ٴداۋىت تۇرعان بەتلەحەم اۋىلىنان شىعاتىنى ايتىلعان ەمەس پە؟»— دەدى (وسىلايشا جۇرت ەكىگە ٴبولىندى. كەيبىرەۋلەر ونىڭ تۇتقىندالعانىن قالاعانىمەن، ساقشىلار ونى ۇستاپ المادى. تاپسىرماسىن ورىنداماي كەلگەن ساقشىلاردان جوعارعى ٴدىني قىزمەتكەرلەر مەن پارىزشىلدار: «ونى نەگە اكەلمەدىڭدەر؟»— دەپ سۇرادى. ولار بولسا: «ەشكىم ول سياقتى سويلەگەن ەمەس!»— دەپ جاۋاپ بەردى. بۇعان اشۋلانعان ٴدىنباسىلارى: «سەندەر دە الدانىپ قالعانسىڭدار ما؟ جوق الدە باسشىلاردىڭ نە پارىزشىلداردىڭ بىرەۋى وعان سەنىپ پە ەدى؟ ال مۇسا زاڭىن بىلمەيتىن مىنا حالىقتى قارعىس اتقان»،— دەپ ۇرىستى (جوحان 7:45—49).
ولاردىڭ اراسىندا پارىزشىل ٵرى جوعارعى كەڭەستىڭ مۇشەسى نىكودەم بار. شامامەن ەكى جارىم جىل بۇرىن ول ٴتۇن جامىلىپ يسامەن كەزدەسكەندە، وعان سەنەتىنىن كورسەتكەن. قازىر يسانى جاقتاپ سويلەپ: «زاڭىمىز بويىنشا، الدىمەن ادامدى تىڭداپ، نە ىستەپ جۇرگەنىن ٴبىلىپ الماي، ۇكىم ايتۋعا بولا ما؟»— دەدى. وزدەرىن قورعاۋ ٷشىن الگىلەر: «سەن دە عاليلەيادان شىعارسىڭ؟ جازبالاردى زەرتتە، سوندا عاليلەيادان ەشقانداي پايعامبار شىقپايتىنىن كورەسىڭ»،— دەپ جاۋاپ بەردى (جوحان 7:51، 52).
جازبالاردا عاليلەيادان پايعامبار شىعاتىنى تىكەلەي ايتىلماعان. الايدا ٴماسىحتىڭ سول جاقتان كەلەتىنىنە نۇسقايتىن سوزدەر بار. مىسالى، «باسقا ۇلتتار مەكەندەيتىن عاليلەيانىڭ» «عالامات نۇردى» كورەتىنى جايلى پايعامبارلىق (يشايا 9:1، 2؛ ماتاي 4:13—17). سونداي-اق ۋادە ەتىلگەندەي، يسا بەتلەحەمدە تۋىلعان جانە ول ٴداۋىتتىڭ ۇرپاعى بولعان. پارىزشىلدار مۇنى جاقسى بىلە تۇرا، حالىققا يسا تۋرالى جالعان مالىمەت تاراتقان بولسا كەرەك.