Yesu wakijinga ku Kijiilo kya Matente (nangwa’mba kya Mimba)mu Yelusalema. Waumvwine bingi bulongo mambo “bavula bamwitabijile.” Kino kechi kyasangajikile bantangi ba bupopweshi ne. Onkao mambo batumineko bakapaso kuya na kukwata Yesu. (Yoano 7:31, 32) Pano bino, aye kechi wafyamine ne.

Yesu watwajijile na kufunjisha mu Yelusalema pa mvula bantu amba: “Nji nenu pa kakimye kacheche saka nkyangye kubwela ku yewa wantumine. Anweba mukankeba, bino kechi mukantaana ne, kabiji akwa ko nkekala, anweba kechi mwakonsha kwiyako ne.” (Yoano 7:33, 34) Bayudea kechi bayukile mo atazhizhe ne. Onkao mambo, beshikishenga bene na bene amba: “Nanchi uno muntu kwepi ko abena kukeba kuya, kya kuba atweba tukakankalwe kumutaana? Nanchi ubena kukeba kuya na kwikala na Bayudea bapalañena mu Bangiliki ne kufunjisha Bangiliki nyi? Nanchi watazha mwepi byo aamba’mba, ‘Anweba mukankeba, bino kechi mukantaana ne, kabiji amba akwa ko nkekala anweba kechi mwakonsha kwiyako ne’?” (Yoano 7:35, 36) Yesu waambilenga pa lufu lwanji ne kusangukila ku bumi bwa mwiulu, balwanyi banji ko babujile kukonsha kulondela ne.

Juba ja butanu na bubiji ja kijiilo jafikile. Umvwe bwakya pa juba ja kijiilo jonse, ñanga waichilanga mema o atapulanga mu Kizhiba kya Shiloma kuba’mba akunkulukile ku kitako kya kya kusokelapo bitapisho kyajinga mu nzubo ya Lesa. Kampe na mambo a kuvululamo bantu pa kino kintu kyo baubanga pa juba pa juba, Yesu wabijikile’mba: “Yense wafwa kilaka eye kwi amiwa, ne amiwa nsakumupa mema a kutoma. Awa wangitabila, monka mwaambila kinembelo amba: ‘Mu muchima wanji mukafumanga tukola twa mema a bumi.’”—Yoano 7:37, 38.

Yesu waambilenga pa bintu bikamweka kimye baana banji ba bwanga kyo bakashingwa mupashi wazhila ne kwikala na luketekelo lwa kuya na kwikala mwiulu. Kuno kushingwa kwaubiwe panyuma ya lufu lwa kwa Yesu. Mwaka walondejilepo, kufuma pa juba ja Pentekosita, tukola twa mema a bumi twakunkulukilenga  kimye baana ba bwanga bashingilwe kyo batatwile kusapwila bukine ku bantu.

Pa mambo a mfunjishisho ya kwa Yesu bamo batatwile kwamba’mba: “Kine uno ye Ngauzhi.” Baambilenga pe ngauzhi wakila Mosesa walayilwe kwiya. Bakwabo baambile’mba: “Uno ye Kilishitu.” Bino bakwabo nabo bakainenga’mba: “Nanchi Kilishitu ukafuma mu Ngalilea nyi? Nanchi kinembelo kechi kyaamba’mba, Kilishitu ukafuma mu baana ba kwa Davida ne kuba’mba mu Betelema muzhi mucheche mwaikalanga Davida mo mo akafuma nenyi?” —Yoano 7:40-42.

Onkao mambo, jibumba japusenejilemo. Nangwa kya kuba bamo bakebelenga’mba Yesu bamukwate, bino kafwako wamukwachile ne. Bakapaso byo babwelele ku bantangi ba bupopweshi kwa kubula Yesu, bañanga bakatampe ne Bafaliseo bebashikishe’mba: “Mambo ka o mwabujila kumuleta?” Bakapaso bakumbwile’mba: “Kafwako muntu nangwa umo wakyambapo kala byamba uno muntu ne.” Bantangi ba bupopweshi bazhingijile batendeka ne kwibendeleka’mba: “Nanchi ne anweba bemutwala kala mungi nyi? Nanchi bantangi nangwa Bafaliseo bamo bamwitabila nyi? Pakuba jino jibumba jabula kuyuka Mizhilo ke ja bantu bafingwa.”—Yoano 7:45-49.

Ponkapo Nikodema, wajinga Mufaliseo kabiji wa mu kije kya Saniedilini waambijileko Yesu. Myaka ibiji ne kichika yapichilepo, Nikodema wayile kwi Yesu bufuku ne kumwesha’mba wamwitabila. Pa kikye kimye, Nikodema waambile’mba: “Kwesakana na Mizhilo yetu, umvwe tukeba kuzhachisha muntu, nanchi kechi tukyumvwa kwi aye patanshi pa kuba’mba tuyuke kyo abena kuba nenyi?” Nga abo bamukumbwile’mba ka? Baambile’mba: “Nanchi ne obewa wafuma ku Ngalilea nyi? Ukebekebe kabiji usakumona’mba kafwako ngauzhi ukafuma mu Ngalilea ne.”—Yoano 7:51, 52.

Binembelo kechi byaambapo mu kushinkamika’mba ngauzhi ukafuma mu Ngalilea ne. Bino, Mambo a Lesa amba’mba Kilishitu mo mo afumine. Aambijile jimo amba “kyeya kikatampe” kikamweka mu “Ngalilea mwikala bisaka bya bantu.” (Isaya 9:1, 2; Mateo 4:13-17) Kabiji byonka byo kyaambijilwe jimo, Yesu wasemekejilwe mu Betelema, kabiji wajinga wa mu kisemi kya Davida. Nangwa kya kuba Bafaliseo bayukile kino, bajinga na mambo a kubuula bantu bintu byavula bya bubela pe Yesu.