Yesu ukidi mu Yelusalema ku Masobo a Tabenakulo (a Bitanda). Wasangala mwanda ‘bavule mu kibumbo abaikala na lwitabijo mwadi.’ Inoko bendeji ba bipwilo kebasangelepo. Abatume basola, bengila bu bampulushi ba kipwilo bakamukwate. (Yoano 7:31, 32) Yesu nandi kanyemenepo.

Ino Yesu waendelela na kusapula ku meso a bantu bonso mu Yelusalema, kanena’mba: “Nkekala nenu bidi kakitatyi katyetye kumeso kwa kwenda kudi Yewa wantumine. Mukankimba, ino kemukamonepo, kadi kokwa kondi kemukokejapo kwiya’ko.” (Yoano 7:33, 34) Bayuda kebevwanijepo, o mwanda kebenena amba: “Le uno muntu usakanga kwenda kwepi, koketukamumonepo? Le usakanga kwenda ku Bayuda bapalakenine mu Bangidiki ne kufundija Bangidiki’ni? Le usaka kunena bika panena’mba, ‘Mukankimba, ino kemukamonepo, kadi kokwa kondi kemukokejapo kwiya’ko’?” (Yoano 7:35, 36) Ino Yesu wisambilanga pa lufu ne lusangukilo lwandi lwa kwenda mūlu, kadi balwana nandi kebabwanyapo kumulonda’ko.

Difuku dya busamba-bubidi dya masobo dibafika. Lubanga lonso kitobo ukusanga mema obatekele mu Kijiba kya Sailoma keapungulukila pa kyalwilo kya kisōkelo kya mu tempelo. Padi Yesu pa kuvuluja bantu kino kibidiji, wanena na diwi dikatampe amba: “Shi muntu udi na kyumwa, āye kondi atome. Yewa ense udi na lwitabijo mondi, monka munenena kisonekwa: ‘Munda mwandi mukakukanga tuminonga twa mema a būmi.’”—Yoano 7:37, 38.

Yesu wisambilanga pa byobya bikalongeka pakashingwa bandi bana ba bwanga māni a mushipiditu ne kwitwa kwikala na būmi bwa mūlu. Kuno kushingwa māni kwadi kwa kulongeka kupwa kwa Yesu kufwa. Ku ngalwilo kwa difuku dya Pentekosa dya mwaka ulonda’ko, masulo a  mema a būmi ashilula kukuka pashilula bana ba bwanga bashingwe māni a mushipiditu kusapwila bantu bubine.

Bantu bamo pa kwitabija bufundiji bwa Yesu, kebanena’mba: “Uno’u bine i Mupolofeto.” Padi besambilanga pa mupolofeto wālailwe, mupolofeto mukatampe kupita Mosesa. Bakwabo abanena’mba: “Uno’u ye Kidishitu.” Ino bangi nabo amba: “Kidishitu kakatambepo ku Ngadilea, mwene i amo? Mwene kisonekwa kyānenene amba Kidishitu ukatambanga ku lutundu lwa Davida ne ku Betelema, kibundi kyādi’mo Davida?”—Yoano 7:40-42.

Pano kibumbo kibakalañana. Nansha bamo byobasaka kukwata Yesu, ino i kutupu wasomonwa. Basola pa kujokela kudi bendeji ba bipwilo Yesu mpika, babitobo bakulu ne Bafadiseo abebepangula’mba: “Le i kika kyokemumuletelepo?” Bampulushi abalondolola’mba: “Kashā kekwaikele muntu unena nabya.” Penepo Bafadiseo abatentulula’mba: “Le nenu abemongola’ni? Le kudi muntu nansha umo mu baledi nansha mu Bafadiseo udi na lwitabijo mwadi, a? Ino kino kibumbo kya bakubulwa kuyuka Bijila i bantu bafingwe mafingo.”—Yoano 7:45-49.

Pa kino, Nikodema, Mufadiseo kadi wa mu Sanedini watompa kunenena Yesu. Myaka ibidi ne kipindi kunyuma, Nikodema waile kudi Yesu bufuku waitabija mudi Yesu. Pano Nikodema wanena’mba: “Bijila byetu kebityibilangapo muntu mambo poso mwamwivwana bidi ne kuyuka byalonga, mwene i amo?” Le uyukile byamulondolola balwana na Yesu? Abo’mba: “Le abe nobe wi mutambe ku Ngadilea’ni? Kimba usa kumona’mba i kutupu mupolofeto wa kutamba ku Ngadilea.”—Yoano 7:51, 52.

Bisonekwa kebilombolangapo patōkelela amba mupolofeto ukatamba ku Ngadilea. Nansha nankyo, Kinenwa kya Leza i kinene myanda ilombola’mba Kidishitu ukatamba kwine’kwa; mwanda kyēsambīle pa “kitōkeji kikatampe” kyadi kya kumona “Ngadilea wa mizo.” (Isaya 9:1, 2; Mateo 4:13-17) Kadi monka mokyālailwe, Yesu wabutwidilwe mu Betelema, kadi i wa ku lutundu lwa Davida. Nansha Bafadiseo byobayukile uno mwanda, abo basambakanyanga mu bantu myanda mivule ya bubela itala padi Yesu.