Yesu apwile lika muYelusalema kuChiwanyino chaJitavanaku (chipwe chaVisakila). Awahililile mwomwo “vavavulu haliyongomena vamufwelelele.” Oloze chuma kana kachasuulwishile vatwamina vamukwitavako. Vatumine tupasu, vaze vapwile nge tupokola vamukwitava vakakwate Yesu. (Yowano 7:31, 32) Yesu nawa kaliswekeleko.

Oloze atwalileho lika kunangula vatu muYelusalema, kaha ambile ngwenyi: “Nanguchitwama nayenu hakatando kakandende, numba nguyenga kuli Uze angutumine. Namukangutonda, oloze kamweshi kukanguwanako, kaha kuze nangukapwa ami, enu kamweshi kukahasa kwizakoko.” (Yowano 7:33, 34) VaYuleya kavatachikijile mwalumbunukilile mazu enyiko, shikaho vambile ngwavo: “Kulihize mwasaka kuya ou mutu numba etu tuhone kumuwana? Uno mwasaka kuya kuli vaYuleya vaze vanalimwangila muli vaHelase nakunangula nawa vaHelase tahi? Uno natalikisa mulihi hakwamba ngwenyi, ‘Namukangutonda, oloze kamweshi kukanguwanako, kaha kuze nangukapwa ami, enu kamweshi kukahasa kwizakoko’?” (Yowano 7:35, 36) Yesu apwile nakuhanjika vyakufwa nakusanguka chenyi nakuya mwilu, kaha vaka-kole jenyi kaveshi kuhasa kumukavangiza mwiluko.

Likumbi lyachiwanyino lyakusokesa 7 lyahetele. Hakumbi hakumbi nachimene, kapilishitu amwangilenga meya aze aswichilenga muChijiva chaShilowame mangana ashindumukile kushina yalijiko lyakulumbila lyakutembele. Yesu pamo hakusaka kwanukisa vatu chuma kanechi, atambakanyine ngwenyi: “Kachi nge mutu umwe nevu lipwila, ezenga kuli ami anwenga meya. Weshowo mwangufwelela, ‘Mutulo yenyi namulovokanga tulwiji vameya akuyoya’ nganomu chahanjika chisoneka.”—Yowano 7:37, 38.

Yesu apwile nakuhanjika vyuma navikasoloka kuli tumbaji twenyi omu navakavawavisa nashipilitu yajila nakuvalingisa vakapwe nakuyoya chamwilu. Echi kuwavisa chatelele kulingiwa nge Yesu  nafu lyehi. Kuputuka halikumbi lyaPendekoseta mumwaka wakavangijileho, tulwiji vameya akuyoya ambwambumukilenga omu tumbaji vakuwavisa nashipilitu vaputukile kwazana muchano navatu.

Hakwivwa vyuma anangwile Yesu, vamwe vambile ngwavo: “Chikupu vene, ou hiKapolofweto,” kulumbununa pamo kapolofweto uze vashikile wakuhambakana hali Mose. Veka vambile ngwavo: “Ou ikiye vene Kulishitu.” Oloze veka vambile cheka ngwavo: “Kutala Kulishitu mwafuminyina kuNgalileya numba? Uno visoneka kavyahanjika ngwavyo Kulishitu mwakafuminyina kutanga yaNdavichi, nakuMbetelema, limbo lize apwilenga Ndavichiko nyi?”—Yowano 7:40-42.

Ngocho liyongomena kana lyalipulile mukachi. Numba tuhu vamwe vasakile ngwavo Yesu vamukwate, oloze naumwe wauchi ahamukile kulinga ngocho. Omu vaze tupasu vakindulukile kuli vatwamina vamukwitava chakuzeneka Yesu, vapilishitu vavalemu navaFwaliseu vavahulishile ngwavo: “Mwomwo ika munazenekela kumuneha kuno?” Vaze tupasu vakumbulwile ngwavo: “Kanda kuchipwengaho lyehi mutu ahanjika nganako.” Ngocho vatwamina vamukwitava vapihililile chikuma nakwamba ngwavo: “Uno nayenu vanamihungumwisa tahi? Hali vaka-kuyula chipwe hali vaFwaliseu kaheshi mutu umwe namufwelelako. Oloze liyongomena eli lyakuhona kutachikiza Jishimbi lyapwa lyakwangula.”—Yowano 7:45-49.

Ngocho Nyikotemu, kaFwaliseu uze apwile mulizavu lyavaka-Sunendeline ahakwililile Yesu. Myaka yivali nachimbwa yahichile kunyima, Nyikotemu ayile kuli Yesu naufuku nakusolola lufwelelo muli ikiye. Kaha Nyikotemu ambile ngwenyi: “Ngwetu Jishimbi jetu kajeshi kusopesa mutuko kuvanga chatete vanamwivwilila ivene nakutachikiza vyuma ali nakulinga, nyi mweka?” Uno vakiko vakumbulwile ngachilihi? Vambile ngwavo: “Uno nayove nawa wafuma kuNgalileya tahi? Talatala muVisoneka, kaha naumona ngwove kakweshi kapolofweto mwakafuminyina kuNgalileyako.”—Yowano 7:51, 52.

Visoneka kavyasolola hatoma nge muNgalileya namukafuma kapolofwetoko. Chipwe ngocho Mazu aKalunga asolola nge Kulishitu mwakafuma kuze, kaha ahanjikile ngwawo ‘muNgalileya yavaka-mafuchi’ navakamonamo “kumunyika chachinene.” (Isaya 9:1, 2; Mateu 4:13-17) Ngana muze vahanjikile chimweza, Yesu asemukilile muMbetelema, kaha apwile muka-tanga yaNdavichi. Numba tuhu vaFwaliseu vatachikijile vyuma kana nyi chiku, oloze vakiko valingishile vatu vapwenga navishinganyeka vyakuhenga hali Yesu.