Jesu aciri ku Jerusarema ku Dhiri ro Taberinake (kana, Mucaca). Iyena wakadakara ngo kuti “vazinji vakamutenda.” Asi izvo azvidakajisi vatungamiriri vo zviara zvo ciJudha. Ivona vanotuma vangwariri kuti vaviye kuzomusunga. (Johani 7:31, 32) Jesu aaeji kuvafindarira.

Iyena anoenderera mberi ecijijisa mu Jerusarema eciti: “Ndicinemwi nguva padoko, sure kwabzo ndozohwirira ka wiya wakandituma. Munozondipsanga, amuzondiwani. Ko ndinoenda apana wenyu anokwanisa kuguma.” (Johani 7:33, 34) Zvecivoneka kuti vaJudha avazwisisi, ivona vanojibvunjisa kuti: “Yena anoda kuenda kwapi, kuti titame kumuwana? Angazoenda kuno vokuparajika, pakati po vonyikanja, kuti avajijise? Anonangisa kudini kuti: ‘Munozondipsanga, amuzondiwani,’ nokuti: ‘Kondinoenda amukwanisi kugumeyo’?” (Johani 7:35, 36) Jesu ari kunanga ngo rufu hwake no kumuka kuti aende korarama kudenga, kucikagumiki ngo muvengi wake.

Yaguma ndhiya yo cinomwe yo dhiri. Pa mukuvo wo dhiri, mangwananiwo ese mupiri ari kudururira mu basia kumwa yabviswa mu gandwa ro Siroe, kuitira kuti ipopome mbhera pasi pakatangira dandiro. Eciita inga ari kuceujira vandhu ngo pamusoro po kuita izvi, Jesu anonanga kudari ngo izvi guru: “Ndiani ano nyota ngaaze kondiri, amwe. Uwo anonditenda, ngokuteveja Matahwa, mu mwoyo make munozobva murambo yo kumwa inopona.”—Johani 7:37, 38.

Jesu anonangira zvinozoitika ku vajiji vake pavanozojwa ngo mujimu mucena, zve vodaninjwa kuti vave no vetero yo kurarama kudenga. Kuzojwa uku kunozoitika pasure po kufa kwa Jesu. Pa njiku yo Pentekoste yo gore rinotevera, kupopoma ko kumwa inopa upenyu kwaizotanga kuitika, vajiji vakazojwa ngo mujimu pavanonga vecicumaera cokwadi ku vandhu.

 Ngo pamusoro po jijiso ya Jesu, pano vandhu vanonanga kuti: “Bzokadi uu ndiyena muporofeti!” Kangaije vecinangira muporofita wainga akagondeswa. Muporofita mukuru kupinda Mosi. Vamweni vanonanga kuti: “Uu ndi Kristu!” Asi vamwenizve vanonanga kuti: “Kristu angabva Galileya, kani? Abzizivi kutahwa here kuti Kristu anobva mu bvumbo ra Davidi, mu Betrehema, mutundhu wa Davidi?”—Johani 7:40-42.

Ngo kudaro mbungano yainga yakaparajana. Vamweni vanoda kuti Jesu akonyehwe, asi apana anokwanisa kumupsasa. Vangwariri pavanoviya ku vatungamiriri vo zviara zvo ciJudha vacina Jesu, vapiri vakuru no vaFarisi vanobvunjisa kuti: “Matama ngenyi kuvia naye?” Vanarume ava vakadavira kuti: “Cingobzo apana mundhu wakavereketa inga mundhu uu!” Vatungamiriri vo zviara vakanyangajwa maningi votanga kuvashora veciti: “Imwimwivo makacengejwavo kani? Aripo pakati po Vatungamiriri, dangani vaFarisi, mundhu umwe anomutenda? Vandhu ava vacikazivi mupango, vakatukwa.”—Johani 7:45-49.

Ngo kudaro, Nikodhemo, muFarisi zve umwe wo mubanje ro Sinedrio, woinikira Jesu. Pa makore maviri no mweji mutandhatu sure, Nikodhemo wainga akamboenda kuna Jesu cousiku wovonesa rutendo kwaari. Wari Nikodhemo anoti: “Mupango wedu unokwanisa here kutongera nyatwa mundhu, ucikamuzwi no kuziva maitiro ake?” Vanarume ava vanojijivirira veciti: “Iwewevo uri muGalileya kani? Psangai, Uvone kuti ku Galileya akubvi muporofeti!”—Johani 7:51, 52.

Bhaibheri arinasi kujekesa kuti muporofita waizobva ku Garireya. Asi Soko ra Mwari rinonanga kuti Kristu waizoviya ngo Garireya. Irona rainga rakananga kuti “rujeko hukuru” hwaizovoneka ku “Galileya ro vonyikanja.” (Isaia 8:23; Isaia 9: 1; Mateu 4:13-17) Kunja kwa izvi, Jesu wakabarihwa mu Beterehema zve wakabarihwa mu mubarihwana wa Dhavhidhi inga zvainga zvakaporofithwa. VaFarisi vaizviziva, pikija zvakadaro zvingaita kuti ndivona vakandhandhanisa masoko akashata ngo pamusoro pa Jesu.