Yesu nlelo ori o Yerusalemu ntakhara Efesta ya Misakala. Owo onnahakalala woona wi “antxipale yàmwemererya.” Nyenya haahakalanle ni ahooleli a malapelo. Awo ahaarumiha amulapeli, yaawo analapa ntoko mapilisa a malapelo, wi emphare Yesu. (Yohani 7:31, 32) Naamwi hiiha, Yesu haneererya wiipitha.

Opwaha yeeyo, Yesu onnatitelela ohusiha vanlakani o Yerusalemu, alocaka: “Elukuluku vakhani kiri ni nyuwo, nave kinaya wa yole okirumme. Nyuwo munamukasya nave himukiphwanya, ni weiwo kinayakawo, nyuwo himunawerya oyawo.” (Yohani 7:33, 34) Ayuta haniiwexexa, mwawiihiiha awo annaloca yaawoyaawo eriki: “Onaya wowi, vawi hiyo nihiwerye omphwanya? Wakhweya onaya wa yawo amwalamwalenle mwa Agrego, wi àhusihe Agrego? Anataphulelani masu ala onlenlèiye ariki: ‘Nyuwo munamukasya, nave himunakiphwanya, ni weiwo kinayakawo nyuwo himunawerya oyawo’?” (Yohani 7:35, 36) Mwawiihiiha, Yesu onaloca sa okhwa ni ovinya wawe mookhwani wi aye wirimu, nave amwiicani awe heni ewerye omuchara weiwo.

Nihiku naneethanu napiili ninnaphiya. Woosiiselo ori woothene va efesta, namukucho onnayeeherya maahi yaawo anakhuma va nchiya no Silowe, mwawiihiiha awo yaananaaniha va altare mu empa ya Muluku. Mwawooneya awuupuseryaka achu meerelo yaawo, Yesu onnakhuwela: “Akhanle orino nthanana, arwe wa miyo ni awurye. Onakemererya miyo, ntoko sorempwa inalotxaya, mwa mutxhu yowo onamphatxuwamo mihitxe sa mahi a ekumi.”—Yohani 7:37, 38.

Yesu onaloca sa yeeyo eni yeereye vaavaa amuhuserya awe aneeraaya ethanliwe ni munepa waweela nave yiichaniwe wi ekhale va nikhuuru na okumi wa wirimu. Othanliwa wuuwu onneereya Yesu amanle okhwa. Opacerya mu Pentekoste mu eyaakha yoocharela, mihice  sa maahi a ekumi sinnapacerya weeca vaavaa amuhuserya ntoko oothanliwa ni munepa anuukaaya eparipari ni achu.

Mu waakhulela nihusiheryo na Yesu, akina annaloca: “Ola ori epariparyene mulipa a miririmu!” Mwawooneya anamwaaha yoowo aaloheryiwe ni alipa miririmu yoowo ori mutokotoko ompwaha Mose. Akina annaloca: “Ti yola Kristu” nyenya akina annavaanya: “Wakhweya Kristu onawerya orwa o Galileya? Sorempwa hinalotxa wi Kristu oni akhume mwa nloko na Davide, ni oni arwe o Betlehemu, epoma ya Davide?”—Yohani 7:40-42.

Mwawiihiiha muloko ori wookawanyeya. Naamwi akina echunaka omphara Yesu, haavovo naari mmoha mano aamutannyile. Vaavaa amulapeli anakookelaaya wa Ayuta ehimphanre Yesu, atokweene a anamukucho ni Afarisi annaakoha: “Muhimuruheleni?” Amulapeli annaakhula: “Hintonko omona mutxhu olontxe ntoko yowo!” Ahooleli a malapelo moonyeenyeya annaakhula moopwaalu nave eruwanaka: “Nyuwotho mowokiwa? Akina wa asitokwene ni wa afarisi wakhweya annamwemererya yowo? Nto atxhu ale ahisuwenle malamulo ari awulumeliwa!”—Yohani 7:45-49.

Mu elukuluku yeela Nikotemu mmoha a nikhuuru noothoriha na Ayuta, aahichuna oloca saphaama vooloca sa Yesu. Mu iyaakha piili ni emeya soopacerya, Nikotemu aahirwa wa Yesu ohiyu omoha nave aahimweemererya yoowo. Vano Nikotemu onnaloca: “Malamulo ahu annamuthorihela mutxhu ekoi, ehipatxenryetoko wiwiwa ni osuweliwa etxhu ene enreiye?” Tinivi nri naakhulo naya na wiisaakiha. “Weyanotho wà mugalileya? Ohuserye ni onamusuwela wi o Galileya honarwawo mulipa a miririmu.”—Yohani 7:51, 52.

Soorempwa hasinaloca mooluluwanya wi mulipa a miririmu ahaala okhuma o Kalileya. Nyenya Masu a Muluku yaahimuthoonya Kristu wi aahaala orweela weiwo; awo yaahilaiherya wi “ekamama etokwene” enahaala wooniwa o “ Kalileya amankewo maloko.” ( Isaiya 9:1, 2; Mateu 4:13-17) Opwaha yeeyo, ntoko yaaloheryiwaaya, Yesu oyariwe o Petelehemu, nave owo muyareriwo wa Tavite. Naamwi Afarisi esuwelaka yeela, ti yaawo anamwaramwasa moonelo woonanara achu aryaayano vooloca sa Yesu.