O loo iai pea Iesu i Ierusalema mo le Tausamiga o Faleapitaga (po o Fale Lauvao). Ua fiafia o ia ona “ua faatuatua iā te ia le toʻatele o le motu o tagata.” Ae e lē o fiafia taʻitaʻi lotu ma ua latou auina atu leoleo e puʻe iā Iesu. (Ioane 7:31, 32) Peitaʻi, e leʻi taumafai Iesu e lafi.

Ua aʻoaʻo atu pea Iesu i Ierusalema e faapea: “Ou te toe nofo ma outou mo ni nai aso, ae ou te leʻi alu atu i lē na auina mai aʻu. Tou te saʻili mai iā te aʻu ae tou te lē maua, o le mea foʻi ou te iai, e lē mafai ona outou ō mai i ai.” (Ioane 7:33, 34) E lē o malamalama tagata Iutaia i le uiga o le fetalaiga a Iesu. O lea ua latou fetalanoaaʻi ai: “O fea ea e fuafua lenei tagata e alu i ai, ae tatou te lē maua o ia? Po o fuafua o ia e alu atu i tagata Iutaia o loo taapeape i Eleni, ma aʻoaʻo atu i tagata Eleni? O le ā le uiga o lana fetalaiga, ʻTou te saʻili mai iā te aʻu, ae e tou te lē maua aʻu, o le mea foʻi ou te iai, e lē mafai ona outou ō mai i ai’?” (Ioane 7:35, 36) O loo talanoa Iesu e faatatau i lona maliu ma lona toetū i le lagi, ma e lē mafai ona ō atu ai i inā ona fili.

Ua oo nei i le aso lona fitu o le tausamiga. I taeao taʻitasi o le tausamiga, e sasaa ai e le ositaulaga ni vai na ia asuina aʻe mai i le Taelega i Seloa i se faatanoa, ina ia tafe atu ai i le mea o loo tū ai le fata faitaulaga. Atonu ina ia faamanatu atu i tagata lenei gaoioiga masani, ua alaga atu ai Iesu: “Afai e fia inu se tasi, inā sau ia iā te aʻu e inu ai. O lē e faatuatua mai iā te aʻu, e pei ona fai mai ai Tusitusiga Paia, ʻE tafe mai vai o le ola mai i totonu iā te ia.’”—Ioane 7:37, 38.

O loo faatatau atu le fetalaiga a Iesu i le mea o le a tupu pe a faauuina ona soo i le agaga paia, ma maua le faamoemoe mo le ola i le lagi. O le a tupu lenā mea i le Penetekoso i le 33 T.A., pe a mavae le maliu o Iesu. I lenā aso, o le a amata ona faailoa atu ai e soo ua faauuina i le agaga paia upu moni i tagata, ma o le a amata ai foʻi ona tafe mai vai o le ola.

Ua tali atu nisi i aʻoaʻoga a Iesu e faapea: “E moni lava o Le Perofeta lenei.” E faasino atu lenā faaupuga i le perofeta na valoia e sili atu i lo o Mose. Ua faapea mai isi: “O le Keriso lenei.” Ae ua finau atu isi: “Pe e tupu mai le Keriso mai i Kalilaia? Pe e lē o fai mai ea Tusitusiga Paia, e tupuga mai le Keriso mai i le fanau a Tavita, ma mai i Peteleema le aai sa nofo ai Tavita?”—Ioane 7:40-42.

Ua fevaevaeaʻi le motu o tagata ona o lenei mea. E ui lava ua mananaʻo nisi e puʻe iā Iesu, ae e leai se tasi ua oo lona lima iā te ia. Ina ua toe foʻi atu leoleo i taʻitaʻi lotu e aunoa ma Iesu, ua fesili atu le ʻaufaitaulaga sili ma le ʻau Faresaio: “Aiseā ua outou lē aumaia ai o ia?” Ua tali mai leoleo: “E leai lava se tagata ua tautala e pei o lenei tagata.” Ua feita taʻitaʻi lotu ma taufaifai atu e faapea: “Po ua faasesēina foʻi ma outou? Po ua faatuatua ea iā te ia se tasi o faipule po o le ʻau Faresaio? Peitaʻi, ua faamalaiaina lenei motu o tagata, o ē e lē iloa le Tulafono.”—Ioane 7:45-49.

O le taimi lea ua tulaʻi atu ai Nikotemo o se Faresaio ma o se sui o le Saniterini, ma tautala atu ma le lototele e lagolagoina Iesu. Pe tusa ma le lua ma le ʻafa tausaga ua mavae, na alu atu ai Nikotemo iā Iesu i le pō ma faailoa atu lona faatuatua iā te ia. Ae o lea ua ia faapea atu: “Pe e faamasinoina i la tatou tulafono se tagata, ae e leʻi faalogologo muamua iā te ia ma iloa lana mea na fai?” O le ā le tali a nei taʻitaʻi lotu? Ua latou faapea mai ma le lototigā: “Po o oe foʻi o se Kalilaia? Ia saʻili ma iloa, e leai se perofeta e sau mai i Kalilaia.”—Ioane 7:51, 52.

E lē o taʻu saʻo mai i Tusitusiga Paia e iai se perofeta o le a sau mai i Kalilaia. Peitaʻi, ua faailoa mai i le Afioga a le Atua o le a sau mai i inā le Keriso, e ala i le valoaga e faapea: ʻO le a vaaia le malamalama tele i Kalilaia lea ua nofoia e tagata o nuu ese.’ (Isaia 9:1, 2; Mataio 4:13-17) Sa fanau foʻi Iesu i Peteleema e pei lava ona valoia, ma o ia o sē e tupuga mai iā Tavita. E ui atonu ua iloa e le ʻau Faresaio nei mea, ae e foliga mai o i latou le pogai o le salalau atu o faamatalaga sesē e faatatau iā Iesu.