Pa nyengu iyi, Yesu wenga weche ku Yerusalemu ku Phwandu la Mahema (pamwenga kuti Misasa). Iyu wangukondwa ukongwa chifukwa ŵanthu anandi “ŵenga ndi chivwanu mwaku iyu.” Kweni venivi vinguŵakondwesa cha alongozgi achisopa. Mwaviyo, angutuma asilikali kuti akako Yesu. (Yohane 7:31, 32) Kweni Yesu wangubisama cha.

M’malu mwaki, Yesu wangulutirizga kusambiza ŵanthu mu Yerusalemu ndipu wangukamba kuti: “Ndijengepu namwi dankha kwa kanyengu ndechendaluti kwaku Yo wakundituma. Mundipenjengi kweni mundisaniyengi cha, ndipu kweniko ndiluta mungazaku cha.” (Yohane 7:33, 34) Ayuda anguvwisa cha vo iyu wang’anamuwanga. Mwaviyo, akambiskananga kuti: “Munthu uyu wakhumba kuluta pani kuti isi titondeki kuchimusaniya? Kumbi wakhumba kuluta kwa Ayuda wo akumbininikiya kwa Agiriki ndi kuchisambiza Agiriki? Kumbi wang’anamuwanji pakukamba kuti, ‘Mundipenjengi kweni mundisaniyengi cha, ndipu kweniko ndiluta mungazaku cha’?” (Yohane 7:35, 36) Yapa, Yesu wang’anamuwanga kuti iyu wabayikengi ndipu pavuli paki wazamuyuskika ndi kuluta kuchanya ko arwani ŵaki angamulondo cha.

Zuŵa la 7 la Phwandu la Mahema lingukwana. Pa nyengu yosi ya phwandu, mulenji wewosi wasembi watunganga maji pa Thaŵali la Silowamu ndipu wangadiranga pamalu ngakupereke sembi munyumba yakusopiyamu. Ndipu maji ngenanga ngayenderiyanga mpaka kufika pasi pa malu ngakuperekiyapu sembi. Yesu watenere kuti wakhumbanga kukumbusa ŵanthu mwambu wo yiwu achitanga. Mwaviyo, wangudaniriza kuti: “Weyosi yo we ndi nyota wazi kwaku ini kuti wazimwi. Weyosi yo we ndi chivwanu mwaku ini, lemba likamba kuti: ‘Mukati mwaki chayimu mwazamutuwa misinji ya maji ngaumoyu.’”—Yohane 7:37, 38.

Yapa, Yesu wang’anamuwanga vo vazamuchitika asani akusambira ŵaki asankhika ndi mzimu wakupaturika kuti amuja kuchanya. Kusankhika kwenuku kungwamba kuchitika pavuli pakuti Yesu wabayika ndi kuyuskika. Pa nyengu yeniyi, misinji ya maji nga umoyu yingwamba kwenda. Venivi vingwamba kuchitika  pa Pentekositi, akusambira wo angusankhika ndi mzimu wakupaturika, ŵati ayamba kupharazgiya ŵanthu uneneska.

Ŵanthu anyaki ŵati ŵavwa vo Yesu wasambizanga, angukamba kuti: “Munthu uyu ndi Mchimi nadi.” Yiwu akambanga za mchimi mura kuluska Mozesi yo wangukambikiya limu. Ndipu anyaki akambanga kuti: “Munthu uyu ndi Khristu.” Kweni anyaki asuskanga venivi ndipu akambanga kuti: “Khristu wangatuliya ku Galileya? Asi lemba likamba kuti Khristu wazamutuliya mu banja laku Davidi kweniso ku Betelehemu, kumuzi ko Davidi wajanga?”—Yohane 7:40-42.

Ŵanthu ŵenga ndi maŵanaŵanu ngakupambana pa nkhani yaku Yesu. Chinanga kuti anyaki akhumbanga kuti Yesu wamangiki, kweni pengavi yo wangumukwaska. Asilikali ŵati awere kwa alongozgi achisopa kwambula Yesu, ŵara ŵa asembi ndi Afarisi, anguŵafumba kuti: “Mwalekiyanji kuza nayu kunu?” Asilikali wo angumuka kuti: “Palivi munthu yo wakuŵereŵetapu nge munthu uyu.” Alongozgi achisopa angukwiya ukongwa ndipu angwamba kunyoza asilikali ŵenaŵa kuti: “Kwali namwi mwalandizgika kwali? Kumbi walipu mulongozgi pamwenga Mfarisi yo we ndi chivwanu mwaku iyu? Kweni ŵanthu ambula kuziŵa Dangu yaŵa mbakutembeka.”—Yohane 7:45-49.

Nikodimu, yo wenga Mfarisi kweniso wakuyeruzga mu Mphara Yikulu ya Milandu, wanguŵikiya Yesu kuvuli wati wavwa vo ŵanthu akambanga. Vyaka viŵi ndi hafu kuvuli, Nikodimu wanguluta kwaku Yesu ndi usiku ndipu wangulongo kuti wavwananga mwaku iyu. Mwaviyo, Nikodimu wangukamba kuti: “Asi Dangu lidu liyeruzga cha munthu kwambula kuvwa dankha kwaku iyu kweniso kuziŵa vo wachita?” Kumbi ŵanthu ŵenaŵa angumumuka wuli? Yiwu anguti: “Kumbi nawi ndiwi waku Galileya? Fufuza ndipu uwonengi kuti palivi mchimi wakutuliya ku Galileya.”—Yohane 7:51, 52.

Malemba ngangukamba cha kuti mchimi wazamutuliya ku Galileya. Kweni Mazu Ngaku Chiuta ngangulongo kuti Khristu wazamutuliya kwenuku. Ndipu ngangukamba kuti “ukweru ukulu” wazamuwoneka ku “Galileya wa ŵanthu amitundu yinyaki.” (Yesaya 9:1, 2; Mateyu 4:13-17) Kusazgapu pa fundu yeniyi, mwakukoliyana ndi mo Malemba ngangukambiya limu, Yesu wanguwiya ku Betelehemu ndipu wenga mphapu yaku Davidi. Chinanga kuti Afarisi aziŵanga umampha venivi, kweni yiwu ndiwu achitiskanga kuti ŵanthu agomezgengi vinthu vaboza vakukwaskana ndi Yesu.