Jesu ucili ku Jerusalemu ku Pobwe lya Zivwuka. Ulikkomene kuti ‘bantu banji munkamu bamusyoma.’ Pele eeci tiicabakonda pe basololi babukombi. Batuma bakapaso, ibabeleka kabali bamapulisa bacikombelo, kuti bakamujate. (Johane 7:31, 32) Nokuba boobo, Jesu tanaayuba pe.

Muciindi cakuyuba, Jesu wazumanana kuyiisya abuleya mu Jerusalemu, ulaamba: “Ndinoocili andinywe kwaciindi cisyoonto kanditanaunka kuli yooyo wakandituma. Muyoondiyandaula, pele tamukandijani pe, alimwi ooko nkonduunka tamukonzyi kusika.” (Johane 7:33, 34) Ba Juda tiibacimvwisya pe eeci, aboobo batalika kubuzyanya mulicabo kuti: “Ino muntu ooyu ukanza kuunka kuli ooko nkotutakamujani? Sena ukanza kuunka kuba Juda bamwaikide ibakkede akati kaba Giriki akuyooyiisya ba Giriki aabo? Ino upandulula nzi naamba kuti, ‘Muyoondiyandaula pele tamukandijani pe, alimwi ooko nkonduunka tamukonzyi kusika’?” (Johane 7:35, 36) Pele Jesu waamba lufwu lwakwe akubusyigwa kubuumi bwakujulu, kwalo nkobatakonzyi kutobela basinkondonyina.

Buzuba bwaciloba bwapobwe bwasika. Mafwumofwumo lyoonse ciindi capobwe, mupaizi walikutila maanzi ngaali kuteka mu Cizyiba ca Siloamu, cakunga alikukunka kusika ansi aacipaililo cakutempele. Ambweni kayeezya bantu kujatikizya cilengwa eeci, Jesu waamba kuti: “Ikuti naa kuli muntu uufwide nyota, kaboola kulindime anywe. Kufwumbwa ooyo uundisyoma mbubonya mbwaamba magwalo: ‘Mukati mulinguwe muyoozwa tulonga tukunka maanzi aapa buumi.’”—Johane 7:37, 38.

Aawa Jesu waamba ciyoocitika basikwiiya bakwe baakunanikwa amuuya uusalala akwiitwa kuti babe abuumi bwakujulu. Kunanikwa ooku kuyoocitika lwaakwiinda lufwu lwa Jesu. Kuzwa mubuzuba bwa Pentekoste mwaka uuboola, tulonga  twamaanzi aabuumi tuyootalika kukunka eelyo basikwiiya bananikidwe amuuya baakutalika kwaambila bamwi kasimpe.

Akaambo kakubona mbwayiisya Jesu, bamwi batalika kwaamba kuti: “Ooyu masimpe ngo Musinsimi,” cakutadooneka baamba musinsimi iwakasinsimwa imupati kwiinda Musa. Bamwi baamba kuti: “Ooyu ngo Kristo.” Pele bambi bakazya balaamba: “Sena Kristo inga wazwa mu Galilaya? Sena lugwalo talwaambi kuti Kristo uyoozwa mulunyungu lwa Davida, alimwi aku Betelehemu imunzi nkwaakali kukkala Davida?”—Johane 7:40-42.

Aboobo nkamu yaandaana. Nokuba kuti bamwi bayanda kuti Jesu aangwe, kunyina wasola kumujata. Bakapaso nobajoka kubasololi babukombi kabatamujisi Jesu, basilutwe babapaizi aba Farisi bababuzya kuti: “Nkaambo nzi ncomwatamujata akumuleta?” Bakapaso baingula kuti: “Takunabede muntu waambaula bobuya.” Mpoonya kabanyemede basololi babukombi batalika kubafwubaazya akubasampaula balaamba: “Sena anywebo mweenwa? Sena kuli muleli naa mu Farisi naba omwe wamusyoma? Pele nkamu yabantu eeyi iitazyi Mulawo mbantu basinganizyidwe.”—Johane 7:45-49.

Abone boobu Nikodemo, imu Farisi alimwi umwi wamu Nkuta Mpati Yaba Juda, walisungula kwaamba kwiiminina Jesu. Myaka yobilo acisela yainda, Nikodemo wakaboola kuli Jesu masiku akutondezya lusyomo lwakwe mulinguwe. Lino Nikodemo waamba kuti: “Sena Mulawo wesu ubeteka muntu kakunyina kusaanguna kumuswiilila akuzyiba ncaacita?” Ino baingula buti kutegwa bakazye kaambo aaka? Baamba kuti: “Sena ayebo uzwa mu Galilaya? Kovwuntauzya eelyo ulajana kuti kunyina musinsimi weelede kuzwa mu Galilaya.”—Johane 7:51, 52.

Magwalo taambi cacigaminina kuti musinsimi wakali kuyakuzwa mu Galilaya. Nokuba boobo, Jwi lya Leza lyakaamba kuti nkumunya ooko Kristo nkwayakuzwa; lyakasinsima kuti “mumuni mupati” uyakulibonya mu “Galilaya wabamasi.” (Isaya 9:1, 2; Matayo 4:13-17) Kuyungizya waawo, mbubonya mbokwakasinsimwa Jesu wakazyalilwa mu Betelehemu, alimwi mwana wa Davida. Nokuba kuti ba Farisi inga kabaazyi makani aaya, kuboneka kuti mbambabo bamwaya makani aakubeja manji aayo aapa bantu kumuyeeyela bumbi Jesu.