Yesu handi o kasi vo Yerusalãi Kocipito Colosinge (ale colombalaka). Eye o kuata esanju, momo “owiñi walua pokati kavo wo kolela.” Eci ka ci sanjuisa asongui vetavo va tuma olondavululi oco vi kuate Yesu. (Yoano 7:31, 32) Pole, Yesu ka seteka oku salama.

Yesu amamako oku longisa owiñi vo Yerusalãi hati: “Ndi kala naito lene osimbu sia endele ku Una wa numa. Vu ndi sandiliya pole ka vu ndi sangi kuenda oku [ngenda] ka vu tẽla oku pitĩlako.” (Yoano 7:33, 34) Omo okuti va Yudea ka va kuata elomboloko liolondaka viaco, va li pula pokati vati: “Ulume u, pi a yongola oku enda okuti ka tu tẽla oku pitĩlako? Anga o yongola oku enda ku va Yudea va sandokaila pokati ka va Helasi loku longisa va Helasi? Ca lomboloka nye eci a popia hati, ‘Vu ndi sandiliya pole ka vu ndi sangi kuenda oku [ngenda] ka vu tẽla oku pitĩlako’?” (Yoano 7:35, 36) Yesu o kasi oku popia eci catiamẽla kolofa viaye kuenda kepinduko liaye oco a kuate omuenyo kilu kuenda ovanyãli vaye ka va pondola oku u kuama kocitumãlo caco.

Lia pitĩlapo eteke liepanduvali liocipito. Vokuenda kuocipito, oloneke viosi komẽle, ocitunda cimue ci pesaila ovava vombasiya yimue okuti, ovava aco opiwa vociva co Siloama, oco a lokile toke vemẽhi liutala. Citava okuti oco Yesu a ivaluise omanu ovituwa viavo ka via sungulukile, o kaluka lolukandi hati: “Nda umue o kuete enyona, eye kokuange, oco a nyue ovava. Wosi o ñolela, ndeci Ocisonehua ca popia, ‘Vutima waye mu tunda olondui viovava omuenyo.’”—Yoano 7:37, 38.

Yesu o kasi oku tukula ovina vi laika oku pita eci olondonge viaye vi ka wavekiwa lespiritu sandu kuenda oku kovongiwa oco va kuate elavoko liomuenyo kilu. Oku wavekiwa kuaco, ku laika oku pita noke yolofa via Yesu. Keteke lio Pendekoste liunyamo wu kuaimo, olondui viovava omuenyo  vi ka fetika oku tumõha eci olondonge vina via wavekiwa lespiritu sandu vi ka sandeka ocili komanu.

Eci va yeva alongiso aco a Yesu, vamue pokati kowiñi va popia vati: “Ocili, u Uprofeto,” citava okuti va kasi oku tiamisila olondaka viaco kuprofeto wa likuminyiwa okuti wa velapo, Mose ci sule. Vakuavo vati: “U eye Kristu.” Pole, vamue vati: “Anga Kristu o tunda ko Galilea? Ocisonehua ka ca popele hẽ okuti Kristu o tunda kombuto ya Daviti, ko Beteleme kimbo kuna kua tungile Daviti?”—Yoano 7:40-42.

Kuenje owiñi u kuata ovisimĩlo via litepa. Vamue va yongola oku kuata Yesu, pole, lomue o kuete utõi woku ci linga. Eci olondavululi vi tiukila kasongui vetavo okuti ka vambatele Yesu, ovitunda via velapo la va Fariseo, va pula vati: “Momo lie ka wo neneleli?” Asualali va tambulula vati: “Lomue omunu wa la popia ndeye.” Asongui vetavo va tema calua kuenje va fetika oku yola epembe asualali loku va pembula poku popia hati: “Anga lenevo wa yapuisiwi? Siti pokati kasongui ale ka va Fariseo lomue wo kolela? Owiñi owu okuti ka wa kũlĩhĩle Ocihandeleko, wa siñaliwa.”​—Yoano 7:45-49.

Noke Nikodemo u Fariseo haeye o panga onepa Kekanga Linene, o vangula lutõi poku teyuila Yesu. Pa pita ale anyamo avali lolosãi epandu tunde eci Nikodemo a endele ku Yesu luteke kuenje wa lekisa ekolelo kokuaye. Cilo Nikodemo o popia hati: “Anga Ocihandeleko cetu ci pisa omunu osimbu ka vo yevele, loku kũlĩhĩsa eci a linga?” Ovo va tambulula vati: “Lovevo u Galilea? Kũlĩhĩsa lutate kuenje limbuka okuti lomue uprofeto o tunda vo Galilea.”—Yoano 7:51, 52.

Ovisonehua ka vi popi okuti vo Galilea mua laikele oku tunda uprofeto umue. Pole, catiamẽla ku Kristu Ondaka ya Suku yi popia okuti wa laikele muẽle oku tunda vo Galilea. Oyo ya popele okuti, “ocinyi [cimue] ca piãla” ca laikele oku muiwa vo “Galilea yolofeka.” (Isaya 9:1, 2; Mateo 4:13-17) Handi vali, ndomo ca popiwa vocitumasuku, Yesu wa citiwila vo Beteleme kuenda ukuacitumbulukila ca Daviti. Ndaño okuti va Fariseo va kũlĩha ovina viaco, citava okuti va kuete eko koku sandeka alongiso alua esanda a vetiya omanu oku kuata ovisimĩlo ka via sungulukile viatiamẽla ku Yesu.